മോസ്കോ: റഷ്യ ലോകത്തെ ഞെട്ടിച്ച് തങ്ങളുടെ ഏറ്റവും പുതിയ ആണവ അന്തർവാഹിനി ‘ഖബറോവ്സ്ക്’ നീറ്റിലിറക്കിയിരിക്കുന്നു. കേൾക്കുമ്പോൾ സാധാരണ വാർത്തയായി തോന്നാമെങ്കിലും, ഇതിലെ പ്രധാന ആയുധമാണ് ലോകരാജ്യങ്ങളെ ഭയപ്പെടുത്തുന്നത്. ‘ഡൂംസ്ഡേ മിസൈൽ’ (യുഗാന്തത്തിന്റെ മിസൈൽ) എന്ന് അറിയപ്പെടുന്ന ആണവ ശേഷിയുള്ള ‘പോസിഡോൺ’ ഡ്രോൺ ഘടിപ്പിക്കാൻ വേണ്ടിയാണ് ഈ അന്തർവാഹിനി രൂപകൽപ്പന ചെയ്തിരിക്കുന്നത്. നാവിക സേനാ മേധാവി അഡ്മിറൽ അലക്സാണ്ടർ മൊയ്സെയേവ് ഉൾപ്പെടെയുള്ള ഉന്നത ഉദ്യോഗസ്ഥരുടെ സാന്നിധ്യത്തിൽ സെവെറോഡ്വിൻസ്കിലെ സെവ്മാഷ് കപ്പൽ നിർമ്മാണശാലയിൽ വെച്ചാണ് വലിയ ചടങ്ങ് നടന്നത്. പ്രതിരോധ മന്ത്രി ആൻഡ്രി ബെലോസോവ് ഇത് റഷ്യയുടെ നാഴികക്കല്ലാണെന്ന് പ്രഖ്യാപിച്ചു.
എന്താണ് ഈ ‘പോസിഡോൺ’ ഡ്രോണിന്റെ പ്രത്യേകത? ഒറ്റ വാക്കിൽ പറഞ്ഞാൽ, തീരദേശ രാജ്യങ്ങളെ മൊത്തത്തിൽ ‘തുടച്ചുനീക്കാൻ’ ശേഷിയുള്ള ആയുധമാണിത്. ആണവ റിയാക്ടർ ഘടിപ്പിച്ച പോസിഡോൺ, ലോകത്ത് നിലവിലുള്ള അന്തർവാഹിനികളെയും ടോർപ്പിഡോകളെയും അപേക്ഷിച്ച് വളരെ വേഗത്തിൽ, കൂടുതൽ ആഴത്തിൽ, ഭൂഖണ്ഡാന്തര ദൂരത്തിൽ സഞ്ചരിക്കാൻ കഴിവുള്ളതാണ്. അതായത്, ഇതിനെ കണ്ടെത്താനോ തടയാനോ എളുപ്പമല്ല. റഷ്യൻ പ്രസിഡന്റ് വ്ളാഡിമിർ പുടിൻ അടുത്തിടെ ഇതിന്റെ ആണവോർജ്ജ പ്രൊപ്പൽഷൻ സിസ്റ്റം വിജയകരമായി പരീക്ഷിച്ചതായി അറിയിച്ചിരുന്നു.
ഈ പുതിയ അന്തർവാഹിനിയും പോസിഡോൺ ഡ്രോണും റഷ്യയുടെ സമുദ്രാതിർത്തി സുരക്ഷ ഉറപ്പാക്കാനും ലോക സമുദ്രങ്ങളിലെ അവരുടെ താൽപ്പര്യങ്ങൾ സംരക്ഷിക്കാനും സഹായിക്കുമെന്നാണ് പ്രതിരോധ മന്ത്രാലയം പറയുന്നത്. ഖബറോവ്സ്ക് ക്ലാസ് അന്തർവാഹിനികളായിരിക്കും ഈ ഭീകരമായ ആയുധത്തിന്റെ പ്രധാന വാഹകർ. റഷ്യൻ സുരക്ഷാ കൗൺസിൽ ഡെപ്യൂട്ടി ചെയർമാൻ ദിമിത്രി മെദ്വദേവ് ഇതിനെ “ഡൂംസ്ഡേ മിസൈൽ” എന്ന് വിശേഷിപ്പിച്ചത് വെറുതെയല്ല. ഒരുവശത്ത് ആണവശക്തിയുള്ള ഒരു ‘തുടച്ചുനീക്കൽ’ ആയുധം നീറ്റിലിറങ്ങുമ്പോൾ, തീരദേശ അതിർത്തികളുള്ള എല്ലാ രാജ്യങ്ങളും ഇപ്പോൾ അതീവ ആശങ്കയിലാണ്.
ഇന്ത്യയെ സംബന്ധിച്ച് ഒരു കൗതുകകരമായ വസ്തുതയും വാർത്തയിലുണ്ട്.ഈ അന്തർവാഹിനി ഉണ്ടാക്കിയ സെവ്മാഷ് കപ്പൽശാല തന്നെയാണ്, മുൻപ് ഇന്ത്യയുടെ വലിയ കപ്പലായ ഐഎൻഎസ് വിക്രമാദിത്യയെയും പുതിയതാക്കിയത് എന്നൊരു പ്രത്യേകതയുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Russia's 'doomsday drone' launched into the sea by submarine: Coastal countries are concerned!
