എന്തെല്ലാം ഉൽപന്നങ്ങളാണ് ഉൾപ്പെടുത്തിയിരിക്കുന്നത്?
ചൈന അമേരിക്കൻ ഉൽപന്നങ്ങൾക്കായി ‘Whitelist’ സംവിധാനം ഏർപ്പെടുത്തിയതായി റോയിട്ടേഴ്സിന് വിവരം ലഭിച്ചു. 125% താരിഫിൽ നിന്ന് ഒഴിവാക്കപ്പെടുന്ന ഉൽപന്നങ്ങളുടെ പട്ടിക പരസ്യമാക്കിയിട്ടില്ലെങ്കിലും കമ്പനികളെ രഹസ്യമായി അറിയിച്ചിട്ടുണ്ട്. അമേരിക്കയ്ക്കെതിരെയുള്ള വ്യാപാര പോരാട്ടത്തിൽ ചൈനയുടെ ശക്തമായ നിലപാടിന് വിരുദ്ധമായ വാർത്തകൾ പുറത്തുവരാതിരിക്കാനാണ് ഈ രഹസ്യ നീക്കം.
മരുന്നുകൾ, മൈക്രോചിപ്പുകൾ, വിമാന എഞ്ചിനുകൾ, ഈഥേൻ തുടങ്ങിയ ഉൽപന്നങ്ങൾ നേരത്തേ തന്നെ താരിഫിൽ നിന്ന് ഒഴിവാക്കപ്പെട്ടിട്ടുണ്ട്. ചില ചൈനീസ് കമ്പനികൾ ഇപ്പോഴും അമേരിക്കൻ സാങ്കേതികവിദ്യയെ ആശ്രയിക്കുന്നതിനാൽ ആഭ്യന്തര സപ്ലൈ ചെയിൻ സമ്മർദ്ദങ്ങൾ കുറയ്ക്കുക എന്ന ലക്ഷ്യത്തോടെയാണ് ഈ ഇളവുകൾ ഏർപ്പെടുത്തിയിരിക്കുന്നത്.
അതേസമയം, താരിഫ് യുദ്ധത്തിന്റെ സാമ്പത്തിക ആഘാതം വിലയിരുത്താൻ ചൈനീസ് അധികാരികൾ വ്യാപാര സ്ഥാപനങ്ങളിൽ സർവേ നടത്തുന്നുണ്ട്. “വ്യാപാര നയത്തിൽ നിർണായക ഘട്ടത്തിലാണ് നാം. ചൈനീസ് കമ്പനികളുടെ താൽപ്പര്യങ്ങൾ സംരക്ഷിക്കുന്നതോടൊപ്പം തന്നെ ആഗോള വ്യാപാര ബന്ധങ്ങൾ ശക്തിപ്പെടുത്തുക എന്നതാണ് ഞങ്ങളുടെ ലക്ഷ്യം,” എന്ന് ചൈനീസ് വാണിജ്യ മന്ത്രാലയത്തിലെ ഉന്നത ഉദ്യോഗസ്ഥൻ അഭിപ്രായപ്പെട്ടു.
യു.എസ് പ്രസിഡന്റ് ഡൊണാൾഡ് ട്രംപ് നീതിപൂർവകമായ വ്യാപാര ഉടമ്പടിക്ക് തയ്യാറാണെന്ന സൂചന നൽകുന്നതിനിടെയാണ് ചൈനയുടെ ഈ നീക്കം.
