സെന്റ് ജോൺസ്: ന്യൂഫൗണ്ട്ലാൻഡ് ആൻഡ് ലാബ്രഡോർ (NL) പ്രവിശ്യയിൽ ഇൻഫ്ലുവൻസ കേസുകൾ അതിവേഗം വർധിക്കുന്നതായി മുന്നറിയിപ്പ് നൽകി ആരോഗ്യവകുപ്പ് അധികൃതർ. ഡിസംബർ പകുതിയോടെ ആരംഭിച്ച പനി ഇപ്പോൾ ജനുവരി ആദ്യവാരത്തിലും തുടരുകയാണ്. നിലവിൽ പടരുന്ന പനികളിൽ പ്രധാന വില്ലൻ ഇൻഫ്ലുവൻസയുടെ ‘എച്ച്3എൻ2’ (H3N2) എന്ന വകഭേദമാണെന്ന് എൻ.എൽ ഹെൽത്ത് സർവീസസ് മെഡിക്കൽ ഓഫീസർ ഡോ. മാർക്ക് മക്കെൽവി വ്യക്തമാക്കി.
പുതുവർഷത്തിന് തൊട്ടുമുമ്പുള്ള ആഴ്ചകളിൽ പ്രതിവാരം നൂറിലധികം കേസുകൾ റിപ്പോർട്ട് ചെയ്തിരുന്നു. അഞ്ച് വയസ്സിൽ താഴെയുള്ള കുട്ടികൾ, മുതിർന്ന പൗരന്മാർ, മറ്റ് ഗുരുതര രോഗങ്ങളുള്ളവർ എന്നിവരെയാണ് നിലവിലെ സാഹചര്യം കൂടുതൽ ബാധിക്കുന്നത്. ഇൻഫ്ലുവൻസയ്ക്ക് പുറമെ കോവിഡ്-19, ആർ.എസ്.വി (RSV) തുടങ്ങിയ ശ്വാസകോശ സംബന്ധമായ അസുഖങ്ങളും പ്രവിശ്യയിൽ നിലനിൽക്കുന്നുണ്ടെന്ന് അധികൃതർ ചൂണ്ടിക്കാട്ടി.
ശക്തമായ ചുമ, ജലദോഷം, പനി എന്നിവയാണ് പ്രധാന ലക്ഷണങ്ങൾ. ഇവ പല രോഗങ്ങളിലും സമാനമായതിനാൽ പരിശോധനയില്ലാതെ രോഗം തിരിച്ചറിയുക പ്രയാസമാണെന്ന് ഡോ. മക്കെൽവി പറഞ്ഞു. ലക്ഷണങ്ങൾ കഠിനമായാൽ മാത്രം പരിശോധന നടത്തിയാൽ മതിയാകും. ലഘുവായ ലക്ഷണങ്ങളുള്ളവർ വിശ്രമിക്കുന്നതിലൂടെയും ധാരാളം വെള്ളം കുടിക്കുന്നതിലൂടെയും രോഗമുക്തി നേടാനാകും. നിലവിൽ ആശുപത്രിയിൽ പ്രവേശിപ്പിക്കപ്പെടുന്നവരുടെ എണ്ണത്തിൽ ആശങ്കാജനകമായ വർധനവില്ലാത്തത് ആശ്വാസകരമാണ്.
രോഗവ്യാപനം തടയാൻ വാക്സിനേഷൻ സ്വീകരിക്കുക എന്നതാണ് ഏറ്റവും ഫലപ്രദമായ മാർഗ്ഗമെന്ന് ആരോഗ്യവകുപ്പ് അറിയിച്ചു. ആറ് മാസത്തിന് മുകളിൽ പ്രായമുള്ള എല്ലാവർക്കും വാക്സിൻ ലഭ്യമാണ്. നിലവിലെ എച്ച്3എൻ2 വകഭേദത്തിനെതിരെ വാക്സിൻ എത്രത്തോളം ഫലപ്രദമാണെങ്കിലും, രോഗം ഗുരുതരമാകുന്നത് തടയാൻ ഇത് സഹായിക്കും. അസുഖമുള്ളവർ വീട്ടിൽ തന്നെ കഴിയുക, കൈകൾ ഇടയ്ക്കിടെ ശുചിയാക്കുക, പൊതുസ്ഥലങ്ങളിൽ മാസ്ക് ധരിക്കുക തുടങ്ങിയ മുൻകരുതലുകൾ പാലിക്കണമെന്നും അധികൃതർ നിർദ്ദേശിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
H3N2 spreading in Newfoundland; Children and adults should be cautious, health department warns
