ഗ്രാൻഡ് പ്രയറി: ആൽബർട്ടയിലുള്ള ഗ്രാൻഡ് പ്രയറിക്ക് സമീപം ചാർട്ടർ ബസ് മറിഞ്ഞുണ്ടായ അപകടത്തിൽ 50 വയസ്സുകാരിക്ക് ദാരുണാന്ത്യം. പരിക്കേറ്റ 22 പേരെ വിവിധ ആശുപത്രികളിൽ പ്രവേശിപ്പിച്ചു. ശനിയാഴ്ച രാത്രി 10:30-ഓടെ ഡീബോൾട്ട് പട്ടണത്തിന് പടിഞ്ഞാറ് ഹൈവേ 43-ലാണ് അപകടം നടന്നതെന്ന് ആർസിഎംപി (RCMP) അറിയിച്ചു. ഗ്രാൻഡ് പ്രയറി സ്വദേശിയായ സ്ത്രീ സംഭവസ്ഥലത്തുതന്നെ മരണപ്പെട്ടതായും പരിക്കേറ്റവരിൽ ആറ് പേരുടെ നില അതീവ ഗുരുതരമാണെന്നും പോലീസ് വ്യക്തമാക്കി. നിസ്സാര പരിക്കേറ്റ 16 പേരെ പ്രാഥമിക ചികിത്സയ്ക്ക് ശേഷം വിട്ടയച്ചു.
കുട്ടികളും മുതിർന്നവരുമടക്കം 37 യാത്രക്കാരാണ് ബസിലുണ്ടായിരുന്നത്. ബസ് റോഡിലെ മീഡിയനിൽ തട്ടിയ ശേഷം മറിയുകയായിരുന്നുവെന്ന് പ്രാഥമിക അന്വേഷണത്തിൽ വ്യക്തമായിട്ടുണ്ട്. അപകടസമയത്തെ മോശം റോഡ് അവസ്ഥയാണ് ദുരന്തത്തിന് കാരണമായതെന്നാണ് പോലീസിന്റെ വിലയിരുത്തൽ. പരിക്കേൽക്കാത്ത യാത്രക്കാരെ ഡീബോൾട്ട് ഫയർ ഹാളിലേക്ക് മാറ്റിയതായും സംഭവത്തിൽ കൂടുതൽ അന്വേഷണം നടന്നുവരികയാണെന്നും അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
