ഒട്ടാവ : കാനഡയിൽ നിർമ്മിക്കാത്ത ഉൽപ്പന്നങ്ങൾക്ക് ‘പ്രൊഡക്റ്റ് ഓഫ് കാനഡ’ എന്ന ലേബൽ നൽകി ഉപഭോക്താക്കളെ തെറ്റിദ്ധരിപ്പിച്ചതിന് റിയൽ കനേഡിയൻ സൂപ്പർസ്റ്റോറിന് 10,000 ഡോളർ പിഴ ചുമത്തി. കനേഡിയൻ ഫുഡ് ഇൻസ്പെക്ഷൻ ഏജൻസിയാണ് നടപടി സ്വീകരിച്ചത്. ടൊറന്റോയിലെ 51 ഗെറി ഫിറ്റ്സ്ജെറാൾഡ് ഡ്രൈവിലുള്ള സ്റ്റോറിലെ ഡിസ്പ്ലേകളിലാണ് നിയമലംഘനം കണ്ടെത്തിയത്.
കാനഡയിൽ ഉത്പാദിപ്പിക്കാത്ത ഉൽപ്പന്നങ്ങളുടെ വിവരങ്ങൾക്കൊപ്പം കാനഡയുടെ ദേശീയ ചിഹ്നമായ മേപ്പിൾ ലീഫ് സ്റ്റിക്കറുകൾ പതിച്ചതായാണ് സി.എഫ്.ഐ.എ കണ്ടെത്തിയത്. സേഫ് ഫുഡ് ഫോർ കാനഡ ആക്ട് (SFCA) സെക്ഷൻ 6.1 പ്രകാരം റീട്ടെയിലർമാർ ഉൽപ്പന്നങ്ങൾ പാക്ക് ചെയ്യുമ്പോഴോ പരസ്യം ചെയ്യുമ്പോഴോ കൃത്യമായ വിവരങ്ങൾ നൽകണമെന്ന് നിർബന്ധമുണ്ട്. ജനുവരി 15-നാണ് ഏജൻസി ഈ പിഴ ശിക്ഷ വിധിച്ചത്.
ലേബലിംഗിലെ പിഴവ് മനുഷ്യസഹജമായ തെറ്റാണെന്ന് ലോട്ടോ ഗ്രൂപ്പിന്റെ ഉപകമ്പനിയായ റിയൽ കനേഡിയൻ സൂപ്പർസ്റ്റോർ വ്യക്തമാക്കി. ഉൽപ്പന്നങ്ങൾ മാറിവരുന്നതിന് അനുസരിച്ച് ബോർഡുകൾ മാറ്റുന്നതിൽ വന്ന കാലതാമസമാണ് ആശയക്കുഴപ്പത്തിന് കാരണമായതെന്ന് കമ്പനി വക്താവ് അറിയിച്ചു. ഉപഭോക്താക്കൾക്കുണ്ടായ ബുദ്ധിമുട്ടിൽ ക്ഷമാപണം നടത്തിയ കമ്പനി, ഇത്തരം കാര്യങ്ങൾ ഒഴിവാക്കാൻ കർശന നടപടികൾ സ്വീകരിക്കുമെന്നും അറിയിച്ചു.
അമേരിക്കൻ തീരുവകളും മറ്റ് ഭീഷണികളും നിലനിൽക്കുന്ന പശ്ചാത്തലത്തിൽ ‘ബൈ കനേഡിയൻ’ പ്രസ്ഥാനത്തിന് രാജ്യത്ത് വലിയ പ്രചാരം ലഭിച്ചുവരികയാണ്. ഈ സാഹചര്യത്തിൽ ഉൽപ്പന്നങ്ങളുടെ ഉറവിടത്തെക്കുറിച്ച് തെറ്റായ വിവരങ്ങൾ നൽകുന്നത് ഗൗരവകരമായ നിയമലംഘനമായാണ് അധികൃതർ കണക്കാക്കുന്നത്. ഒരു ഉൽപ്പന്നത്തിലെ ഭൂരിഭാഗം ചേരുവകളും നിർമ്മാണവും കാനഡയിലാണെങ്കിൽ മാത്രമേ ‘പ്രൊഡക്റ്റ് ഓഫ് കാനഡ’ ലേബൽ ഉപയോഗിക്കാൻ നിയമപരമായി അനുവാദമുള്ളൂ.
കഴിഞ്ഞ വർഷം മാർച്ചിൽ വ്യാപാര തർക്കങ്ങൾ ആരംഭിച്ചത് മുതൽ ഉൽപ്പന്നങ്ങളുടെ ഉറവിടത്തെക്കുറിച്ചുള്ള പരാതികളിൽ വർദ്ധനവുണ്ടായതായി സി.എഫ്.ഐ.എ വ്യക്തമാക്കി. ലേബലിംഗുമായി ബന്ധപ്പെട്ട ആക്ഷേപങ്ങൾ റിപ്പോർട്ട് ചെയ്യാൻ ഉപഭോക്താക്കളോട് ഏജൻസി നിർദ്ദേശിച്ചിട്ടുണ്ട്. ബിസിനസ് ലാഭത്തിന് വേണ്ടി നടത്തുന്ന ഇത്തരം ലംഘനങ്ങളെ ‘അതിഗൗരവമായ വിഭാഗത്തിലാണ്’ ഉൾപ്പെടുത്തിയിരിക്കുന്നതെന്നും ഏജൻസി അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
CFIA fines Real Canadian Superstore $10,000 for displaying incorrect label
