വാങ്കൂവർ: അമേരിക്കയുമായുള്ള വ്യാപാര യുദ്ധത്തിൽ കാനഡയുടെ സാമ്പത്തിക താത്പര്യങ്ങൾ സംരക്ഷിക്കുമെന്ന ഉറച്ച പ്രഖ്യാപനവുമായി അധികാരമേറ്റ പ്രധാനമന്ത്രി മാർക്ക് കാർണിക്ക് ഭരണത്തിന്റെ ഒന്നാം വാർഷികത്തിൽ കടുത്ത വെല്ലുവിളി. രാജ്യത്തിന്റെ സാമ്പത്തിക അടിത്തറ ഭദ്രമാക്കാൻ കാർണി നടപ്പിലാക്കുന്ന വൻകിട പദ്ധതികൾ തദ്ദേശീയ വിഭാഗങ്ങളുടെ കടുത്ത പ്രതിഷേധത്തിന് വഴിതുറന്നിരിക്കുകയാണ്. വിഭവസമൃദ്ധമായ തദ്ദേശീയ ഭൂമികളിൽ അവരുടെ അനുമതിയില്ലാതെ ഖനനവും ഊർജ്ജ പദ്ധതികളും വേഗത്തിലാക്കാനുള്ള നീക്കമാണ് സർക്കാരിനെ പ്രതിസന്ധിയിലാക്കുന്നത്.
കാനഡ സെൻട്രൽ ബാങ്കിന്റെ മുൻ മേധാവിയായിരുന്ന മാർക്ക് കാർണി 2025 മാർച്ച് 14-നാണ് പ്രധാനമന്ത്രിയായി ചുമതലയേറ്റത്. അമേരിക്കയിൽ നിന്നുള്ള വ്യാപാര ഭീഷണികളെ ‘കൈമുട്ട് കൊണ്ട് പ്രതിരോധിക്കും’ (Elbows up) എന്ന അദ്ദേഹത്തിന്റെ നയം തുടക്കത്തിൽ വലിയ ജനപിന്തുണ നേടിയിരുന്നു. ഇതിന്റെ ഭാഗമായി 116 ബില്യൺ കനേഡിയൻ ഡോളർ ചെലവ് വരുന്ന 10 മെഗാ പ്രോജക്റ്റുകൾക്ക് അതിവേഗ അനുമതി നൽകാൻ ‘മേജർ പ്രോജക്ട്സ് ഓഫീസ്’ അദ്ദേഹം രൂപീകരിച്ചു.
ബ്രിട്ടീഷ് കൊളംബിയയിലെ കൂറ്റൻ പ്രകൃതിവാതക (LNG) പ്ലാന്റുകൾ, ഒന്റാറിയോയിലെ ആണവനിലയം, ക്യുബെക്കിലെ ഷിപ്പിംഗ് ടെർമിനൽ എന്നിവ ഇതിൽ ഉൾപ്പെടുന്നു. രാജ്യത്തിന്റെ സാമ്പത്തിക പരമാധികാരം ഉറപ്പാക്കാൻ ഇത്തരം പദ്ധതികൾ അത്യാവശ്യമാണെന്നാണ് കാർണിയുടെ വാദം. എന്നാൽ, ഈ മുന്നേറ്റത്തിനിടയിൽ തദ്ദേശീയരുടെ ഭരണഘടനാപരമായ അവകാശങ്ങൾ ബലികഴിക്കപ്പെടുന്നുവെന്ന ആരോപണം ശക്തമാണ്.
പദ്ധതികൾ വേഗത്തിലാക്കാനുള്ള നീക്കത്തിനിടെ ആൽബർട്ടയുമായി ഒപ്പിട്ട എണ്ണ പൈപ്പ് ലൈൻ കരാർ സർക്കാരിനുള്ളിൽ തന്നെ പൊട്ടിത്തെറിക്ക് കാരണമായി. തദ്ദേശീയ വിഭാഗങ്ങളുമായി കൂടിയാലോചന നടത്താത്തതിൽ പ്രതിഷേധിച്ച് സാംസ്കാരിക മന്ത്രി കഴിഞ്ഞ നവംബറിൽ രാജി വെച്ചിരുന്നു. 600-ലധികം തദ്ദേശീയ ഗോത്രത്തലവന്മാരെ പ്രതിനിധീകരിക്കുന്ന അസംബ്ലി ഓഫ് ഫസ്റ്റ് നേഷൻസ് (AFN) പൈപ്പ് ലൈൻ പദ്ധതിക്കെതിരെ അടിയന്തര പ്രമേയം പാസാക്കി. “അമേരിക്കയുടെ നികുതി ഭീഷണികൾക്കെതിരെ ഞങ്ങൾ കാനഡയ്ക്കൊപ്പമുണ്ട്, പക്ഷേ അത് ഞങ്ങളുടെ അവകാശങ്ങൾ ഇല്ലാതാക്കിക്കൊണ്ടാകരുത്,” എന്ന് എഎഫ്എൻ നാഷണൽ ചീഫ് സിണ്ടി വുഡ് ഹൗസ് നെപിനാക് വ്യക്തമാക്കി.
അതേസമയം, എല്ലാ തദ്ദേശീയ വിഭാഗങ്ങളും പദ്ധതികളെ എതിർക്കുന്നില്ല എന്നതും ശ്രദ്ധേയമാണ്. പ്രകൃതിവാതക പദ്ധതികൾ തങ്ങളുടെ സാമ്പത്തിക ഉന്നമനത്തിന് സഹായിക്കുമെന്ന് വിശ്വസിക്കുന്ന വിഭാഗങ്ങളുമുണ്ട്. നിസ്ഗ (Nisga’a) ഗോത്രവർഗ്ഗക്കാർ പങ്കാളികളായ ബിസിയിലെ കൂറ്റൻ എൽഎൻജി പ്ലാന്റ് ഇതിന് ഉദാഹരണമാണ്. എന്നാൽ, ഒരു വിഭാഗത്തിന്റെ പിന്തുണ കാണിച്ച് മറ്റുള്ളവരുടെ ഭൂമി കൈയേറുന്നത് നിയമപരമായി നിലനിൽക്കില്ലെന്ന് വിദഗ്ധർ ചൂണ്ടിക്കാട്ടുന്നു. തദ്ദേശീയരുടെ ‘സ്വതന്ത്രവും മുൻകൂട്ടിയുള്ളതുമായ അനുമതി’ (Free, prior and informed consent) ഇല്ലാതെ മുന്നോട്ട് പോകുന്നത് പദ്ധതികൾ കോടതി കയറാനും വൈകാനും കാരണമായേക്കും.
സാമ്പത്തിക ഭദ്രതയും മനുഷ്യാവകാശ സംരക്ഷണവും തമ്മിലുള്ള നൂൽപ്പാലത്തിലൂടെയാണ് മാർക്ക് കാർണി ഇപ്പോൾ സഞ്ചരിക്കുന്നത്. രാജ്യത്തിന്റെ ഉന്നമനത്തിനായി കൈക്കൊള്ളുന്ന തീരുമാനങ്ങൾ ജനതയെ ഭിന്നിപ്പിക്കുമോ എന്നതാണ് രാഷ്ട്രീയ നിരീക്ഷകർ ഉറ്റുനോക്കുന്നത്. വരും മാസങ്ങളിൽ തദ്ദേശീയ നേതാക്കളുമായി കാർണി നടത്തുന്ന ചർച്ചകൾ കാനഡയുടെ സാമ്പത്തിക ഭാവിയെ സംബന്ധിച്ചിടത്തോളം നിർണ്ണായകമാകും.
carneys-build-big-and-build-fast-push-is-dividing-canadas-indigenous
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
