സോഫ്റ്റ്‌വുഡ് മരവ്യവസായത്തെ കരകയറ്റാൻ സഹായ പദ്ധതികൾ പ്രഖ്യാപിച്ച് മാർക്ക് കാർണി

കാനഡയിലെ സോഫ്റ്റ്‌വുഡ് മരവ്യവസായത്തെ സംരക്ഷിക്കാൻ ലക്ഷ്യമിട്ട് ഫെഡറൽ സർക്കാർ 1.2 ബില്യൺ ഡോളറിൻ്റെ സഹായ പാക്കേജ് പ്രഖ്യാപിച്ചു. അമേരിക്കൻ താരിഫുകൾ വർദ്ധിച്ച സാഹചര്യത്തിലാണ് ഈ പുതിയ നീക്കം. പ്രധാനമന്ത്രി മാർക്ക് കാർണി വെസ്റ്റ് കെലോണയിലെ ഗോർമൻ ബ്രോസ് ലംബർ മില്ലിൽ വെച്ച് നടത്തിയ പ്രസംഗത്തിലാണ് ഈ പ്രഖ്യാപനം നടത്തിയത്. ഈ പാക്കേജിന്റെ ഭാഗമായി 700 മില്യൺ ഡോളർ അടിയന്തിര വായ്പാ ഗ്യാരൻ്റിയായും, 500 മില്യൺ ഡോളർ പുതിയ കയറ്റുമതി വിപണികൾ കണ്ടെത്താനും ഉൽപ്പന്നങ്ങൾ വികസിപ്പിക്കാനുമുള്ള ദീർഘകാല സഹായമായും വിനിയോഗിക്കും.

അമേരിക്കൻ താരിഫുകൾക്കെതിരെ പ്രതിരോധം തീർക്കുക എന്നതിലുപരി, കാനഡയുടെ സ്വന്തം ആവശ്യങ്ങൾക്കായി കനേഡിയൻ മരങ്ങൾ കൂടുതലായി ഉപയോഗിക്കാനും സർക്കാർ ലക്ഷ്യമിടുന്നുണ്ട്. പ്രധാനമന്ത്രി കാർണി പ്രഖ്യാപിച്ച പുതിയ ഭവന നിർമ്മാണ പദ്ധതികൾക്കായി കനേഡിയൻ സോഫ്റ്റ്‌വുഡ് ലംബറുകൾക്ക് മുൻഗണന നൽകും. അടുത്ത പത്ത് വർഷത്തിനുള്ളിൽ പ്രതിവർഷം 500,000 പുതിയ വീടുകൾ നിർമ്മിക്കാൻ ലക്ഷ്യമിടുന്നുണ്ട്. ഇത് കാനഡയിലെ മരവ്യവസായത്തിന് വലിയ ഉത്തേജനം നൽകുമെന്നാണ് വിലയിരുത്തൽ. കൂടാതെ, വന മേഖലയിലെ തൊഴിലാളികൾക്കായി 50 മില്യൺ ഡോളർ ചെലവിൽ പുതിയ പരിശീലന പരിപാടികളും പ്രഖ്യാപിച്ചിട്ടുണ്ട്.

കനേഡിയൻ സോഫ്റ്റ്‌വുഡ് ലംബർ വ്യവസായത്തിന് കഴിഞ്ഞ കുറേ വർഷങ്ങളായി അമേരിക്കൻ താരിഫുകളിൽ നിന്ന് കടുത്ത വെല്ലുവിളി നേരിടുന്നുണ്ട്. ഏറ്റവും പുതിയ പ്രഖ്യാപനം അനുസരിച്ച്, ആന്റി-ഡമ്പിങ് താരിഫ് 20 ശതമാനത്തിലധികമായി ഉയർത്താൻ അമേരിക്കൻ വാണിജ്യ വകുപ്പ് തീരുമാനിച്ചിട്ടുണ്ട്. ഇതോടെ മൊത്തം താരിഫ് 35 ശതമാനത്തിനടുത്ത് എത്തും. ഈ സാഹചര്യത്തിലാണ് കാനഡയുടെ പുതിയ സഹായ പാക്കേജ് വരുന്നത്. ഈ സഹായങ്ങൾ താത്കാലിക ആശ്വാസം നൽകുമെന്നും, അതേസമയം അമേരിക്കയുമായുള്ള വ്യാപാര തർക്കങ്ങൾ പരിഹരിക്കാൻ സർക്കാരിന് കൂടുതൽ സമയം ലഭിക്കുമെന്നും ബ്രിട്ടീഷ് കൊളംബിയയുടെ ഫോറസ്റ്റ് മിനിസ്റ്റർ രവി പർമർ അഭിപ്രായപ്പെട്ടു.

ഈ പ്രഖ്യാപനത്തെ വ്യവസായ മേഖല സ്വാഗതം ചെയ്തു. ഗോർമൻ ഗ്രൂപ്പ് സിഇഒ നിക്ക് ആർക്കിൾ, ബിസി ലംബർ ട്രേഡ് കൗൺസിൽ പ്രസിഡന്റ് കുർട്ട് നിക്വിഡെറ്റ് എന്നിവരെല്ലാം സർക്കാരിൻ്റെ നീക്കത്തെ പ്രശംസിച്ചു. അതേസമയം, ഒട്ടാവ ഈ വ്യവസായത്തിന് നൽകുന്ന ശ്രദ്ധ വളരെ വലുതാണെന്നും, എന്നാൽ അമേരിക്കയുമായുള്ള തർക്കം പരിഹരിക്കുന്നതിന് സർക്കാർ മുൻഗണന നൽകണമെന്നും അവർ ആവശ്യപ്പെട്ടു.
പ്രധാനമന്ത്രി കാർണിയുടെ വാക്കുകളിൽ, കാനഡയുടെ മറ്റ് വ്യവസായങ്ങളെപ്പോലെ മര വ്യവസായവും പ്രധാനപ്പെട്ടതാണ്. ഈ പ്രതിസന്ധി ഘട്ടത്തിൽ ഒരു വ്യവസായത്തെയും തളർത്താൻ സർക്കാർ അനുവദിക്കില്ലെന്നും, എല്ലാ വ്യവസായങ്ങൾക്കും മികച്ച കരാറുകൾ നേടാൻ സർക്കാർ പ്രവർത്തിക്കുമെന്നും അദ്ദേഹം കൂട്ടിച്ചേർത്തു.