ഉന്നതതല നിയമനങ്ങളിൽ സുതാര്യത കുറയുന്നതായി റിപ്പോർട്ട്; ട്രൂഡോയുടെ പരിഷ്കാരങ്ങൾ മറികടന്ന് കാർണി സർക്കാർ

ഒട്ടാവ : കാനഡയിൽ ഉന്നതതല ഉദ്യോഗസ്ഥ നിയമനങ്ങളിൽ സുതാര്യത ഉറപ്പാക്കാൻ മുൻ സർക്കാർ കൊണ്ടുവന്ന പരിഷ്കാരങ്ങൾ അട്ടിമറിക്കപ്പെടുന്നതായി റിപ്പോർട്ടുകൾ. പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള പുതിയ സർക്കാർ, ജസ്റ്റിൻ ട്രൂഡോ നടപ്പിലാക്കിയ മെറിറ്റ് അധിഷ്ഠിത നിയമന രീതികളിൽ നിന്ന് പിന്നോട്ട് പോകുന്നു എന്ന ആക്ഷേപം ശക്തമാവുകയാണ്. രാജ്യത്തെ ആദ്യ ഫോറിൻ ഇൻഫ്ലുവൻസ് ട്രാൻസ്പരൻസി കമ്മീഷണറുടെ നിയമനം ഉൾപ്പെടെയുള്ളവയിൽ പരസ്യമായ അപേക്ഷകൾ ക്ഷണിക്കാത്തത് ഭരണതലത്തിലെ രാഷ്ട്രീയ സ്വാധീനത്തെക്കുറിച്ചുള്ള ആശങ്കകൾക്കും ചർച്ചകൾക്കും വഴിവെച്ചിരിക്കുകയാണ്.

യോഗ്യതയുടെ അടിസ്ഥാനത്തിൽ സുതാര്യമായ തിരഞ്ഞെടുപ്പ് ഉറപ്പാക്കാൻ 2016-ലാണ് ട്രൂഡോ നിയമന രീതികളിൽ വിപ്ലവകരമായ മാറ്റങ്ങൾ കൊണ്ടുവന്നത്. രാഷ്ട്രീയ സ്വാധീനം ഒഴിവാക്കി കഴിവുള്ളവരെ കണ്ടെത്താനായി എല്ലാ നിയമനങ്ങളും പരസ്യപ്പെടുത്തണമെന്നായിരുന്നു വ്യവസ്ഥ. എന്നാൽ 2025 മാർച്ചിന് ശേഷം ഗവൺമെന്റ് നിയമന വെബ്‌സൈറ്റിൽ ആകെ ഒരു തസ്തികയിലേക്ക് മാത്രമാണ് അപേക്ഷ ക്ഷണിച്ചത്. നിലവിൽ വെബ്‌സൈറ്റിൽ പുതിയ അവസരങ്ങളൊന്നും പ്രസിദ്ധീകരിച്ചിട്ടില്ല.

കാർണി സർക്കാർ അധികാരമേറ്റ ശേഷം ഇതുവരെ 122 ഗവർണർ ഇൻ കൗൺസിൽ നിയമനങ്ങൾ നടത്തിയിട്ടുണ്ട്. ഇതിൽ പല തസ്തികകളും വർഷങ്ങൾക്ക് മുമ്പ് പരസ്യം ചെയ്തവയാണ്. ചീഫ് പബ്ലിക് ഹെൽത്ത് ഓഫീസർ ഉൾപ്പെടെയുള്ള പ്രധാന തസ്തികകളിൽ ഇപ്പോഴും സ്ഥിരം നിയമനം നടന്നിട്ടില്ല. സെനറ്റിലെ 105 സീറ്റുകളിൽ ഏഴെണ്ണം ഒഴിവുണ്ട്. കൂടാതെ ഗവർണർ ജനറൽ മേരി സൈമണിന്റെ കാലാവധി ഈ വേനൽക്കാലത്ത് അവസാനിക്കാനിരിക്കെ, പുതിയ നിയമന പ്രക്രിയകളെക്കുറിച്ച് സർക്കാർ വ്യക്തത നൽകുന്നില്ല.

തിരഞ്ഞെടുപ്പ് പ്രക്രിയ സുതാര്യമാണെന്നും ബിസിനസ്, ധനകാര്യം, നിയമം തുടങ്ങിയ മേഖലകളിൽ നിന്നുള്ള പ്രഗത്ഭരെയാണ് നിയമിക്കുന്നതെന്നുമാണ് പ്രധാനമന്ത്രിയുടെ ഓഫീസ് നൽകുന്ന വിശദീകരണം. പ്രിവി കൗൺസിൽ ക്ലർക്കിന്റെ ശുപാർശ പ്രകാരമാണ് ചില പ്രധാന നിയമനങ്ങൾ നടത്തിയതെന്ന് കാർണിയുടെ പ്രസ് സെക്രട്ടറി ലോറ സ്കാഫിഡി അറിയിച്ചു. എന്നാൽ സെനറ്റർമാരെയും ഗവർണർ ജനറലിനെയും തിരഞ്ഞെടുക്കുന്ന രീതിയെക്കുറിച്ചുള്ള വിവരങ്ങൾ യഥാസമയം ലഭ്യമാക്കുമെന്നാണ് പ്രിവി കൗൺസിൽ ഓഫീസ് വ്യക്തമാക്കിയത്.

ഓരോ പ്രധാനമന്ത്രിയും നിയമനങ്ങളിൽ സ്വന്തമായ ശൈലി പിന്തുടരാറുണ്ടെന്ന് മുൻ പ്രിവി കൗൺസിൽ ക്ലർക്ക് മൈക്കൽ വെർണിക് അഭിപ്രായപ്പെട്ടു. സ്റ്റീഫൻ ഹാർപ്പറും ജസ്റ്റിൻ ട്രൂഡോയും ഭരണത്തിന്റെ ആദ്യഘട്ടത്തിൽ തന്നെ നിയമനങ്ങളിൽ തങ്ങളുടേതായ മാറ്റങ്ങൾ വരുത്തിയിരുന്നു. എന്നാൽ മാർക്ക് കാർണി ഏത് തരത്തിലുള്ള സമീപനമാണ് സ്വീകരിക്കുന്നതെന്ന് വരും ദിവസങ്ങളിൽ മാത്രമേ വ്യക്തമാകൂ. നിലവിൽ 251 ഗവർണർ ഇൻ കൗൺസിൽ തസ്തികകൾ രാജ്യത്ത് ഒഴിവുണ്ടെന്നാണ് റിപ്പോർട്ടുകൾ.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Report: Transparency in high-level appointments is declining; Carney government ignores Trudeau’s reforms