കഞ്ചാവ് ഉപയോഗവും മാനസികാരോഗ്യവും; ഒന്റാരിയോയിലെ കൗമാരക്കാർക്കിടയിൽ വിഷാദരോഗം വർദ്ധിക്കുന്നുവെന്ന് പുതിയ പഠനം

ടൊറന്റോ: ഒന്റാരിയോയിലെ കൗമാരക്കാർക്കിടയിൽ വിഷാദരോഗം, ഉത്കണ്ഠ തുടങ്ങിയ മാനസികാരോഗ്യ പ്രശ്നങ്ങൾ കഴിഞ്ഞ പത്ത് വർഷത്തിനിടെ മൂന്നിരട്ടിയായി വർദ്ധിച്ചതായി പുതിയ പഠനം വ്യക്തമാക്കുന്നു. മക്മാസ്റ്റർ സർവ്വകലാശാല ‘അഡിക്ഷൻ’ എന്ന ജേണലിൽ പ്രസിദ്ധീകരിച്ച പഠനറിപ്പോർട്ടിലാണ് ഈ കണ്ടെത്തലുകളുള്ളത്. കൗമാരക്കാർക്കിടയിലെ പതിവായ കഞ്ചാവ് ഉപയോഗം ഈ മാനസികാവസ്ഥയ്ക്ക് പ്രധാന കാരണമാകുന്നുണ്ടെന്നും പെൺകുട്ടികളിലാണ് ഇത് കൂടുതൽ പ്രകടമാകുന്നതെന്നും ഗവേഷകർ പറയുന്നുണ്ട്.

ഏഴാം ക്ലാസ് മുതൽ പന്ത്രണ്ടാം ക്ലാസ് വരെയുള്ള 35,000 വിദ്യാർത്ഥികളിൽ നിന്നുള്ള വിവരങ്ങൾ വിശകലനം ചെയ്തപ്പോൾ, 2013-ൽ 10.7 ശതമാനമായിരുന്ന മാനസിക സമ്മർദ്ദം 2023-ൽ 27.4 ശതമാനമായി ഉയർന്നതായി കണ്ടെത്തി. പഠനത്തിൽ പങ്കെടുത്തവരിൽ 20 ശതമാനം പേരും കഞ്ചാവ് ഉപയോഗിക്കുന്നവരാണ്. വർഷത്തിൽ 40 തവണയോ അതിലധികമോ കഞ്ചാവ് ഉപയോഗിക്കുന്നവരിൽ മാനസിക സമ്മർദ്ദം ഉണ്ടാകാനുള്ള സാധ്യത മറ്റുള്ളവരെ അപേക്ഷിച്ച് 18 ശതമാനം കൂടുതലാണെന്നും പഠനം വ്യക്തമാക്കുന്നു.

മാനസിക പ്രശ്നങ്ങൾ നേരിടുന്നതിനായി പകുതിയോളം കൗമാരക്കാർ കഞ്ചാവിനെ ആശ്രയിക്കുന്നതായും ഗവേഷകർ കണ്ടെത്തി. പെൺകുട്ടികളിലാണ് ഈ പ്രവണതയും മാനസിക സമ്മർദ്ദവും തമ്മിലുള്ള ബന്ധം കൂടുതൽ ശക്തമായിരിക്കുന്നത്. മുൻകാലങ്ങളിലെ പഠനങ്ങളെ അപേക്ഷിച്ച് നിലവിൽ ലഭ്യമാകുന്ന കഞ്ചാവ് ഉൽപ്പന്നങ്ങളുടെ തീവ്രത വർദ്ധിച്ചത് ആഘാതം കൂടാൻ കാരണമായിട്ടുണ്ടാകാമെന്ന് പഠനത്തിന് നേതൃത്വം നൽകിയ ആൻഡ്രെ മക്ഡൊണാൾഡ് പറഞ്ഞു.

കോവിഡ് മഹാമാരി, സാമ്പത്തിക പ്രതിസന്ധികൾ, സാമൂഹിക സമ്മർദ്ദങ്ങൾ തുടങ്ങിയ വിവിധ ഘടകങ്ങൾ കൗമാരക്കാരുടെ മാനസികാരോഗ്യത്തെ ബാധിച്ചിട്ടുണ്ടാകാം. കഞ്ചാവ് ഉപയോഗം മാനസിക പ്രശ്നങ്ങൾക്ക് കാരണമാകുകയാണോ അതോ പ്രശ്നങ്ങൾ മറികടക്കാൻ കഞ്ചാവിനെ ആശ്രയിക്കുകയാണോ എന്നതിൽ കൂടുതൽ ഗവേഷണം ആവശ്യമാണെന്ന് പഠനങ്ങൾ വ്യക്തമാക്കുന്നു. എങ്കിലും പതിവായ ഉപയോഗം ഒഴിവാക്കാനും കഞ്ചാവിന്റെ തീവ്രത നിയന്ത്രിക്കാനും നയരൂപീകരണ വേളയിൽ മുൻഗണന നൽകണമെന്ന് ഗവേഷകർ നിർദ്ദേശിക്കുന്നു.

കൗമാരക്കാരുടെ തലച്ചോറ് വികാസം പ്രാപിക്കുന്ന ഘട്ടമായതിനാൽ കഞ്ചാവ് ഉപയോഗം വലിയ പ്രത്യാഘാതങ്ങൾ ഉണ്ടാക്കുമെന്ന് ഗവേഷകർ മുന്നറിയിപ്പ് നൽകുന്നു. കഞ്ചാവ് ഉപയോഗം തുടങ്ങുന്ന പ്രായം വൈകിപ്പിക്കേണ്ടത് അത്യാവശ്യമാണെന്നും മാനസികാരോഗ്യത്തിന് ആവശ്യമായ ചികിത്സ ലഭ്യമാക്കുന്നതിൽ കൗമാരക്കാർ വിമുഖത കാണിക്കുന്നത് ഗൗരവകരമാണെന്നും റിപ്പോർട്ട് വ്യക്തമാക്കുന്നു. ഒന്റാരിയോ സ്റ്റുഡന്റ് ഡ്രഗ് യൂസ് ആൻഡ് ഹെൽത്ത് സർവേയിൽ നിന്നുള്ള വിവരങ്ങളാണ് പഠനത്തിനായി ഉപയോഗിച്ചത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Cannabis use and mental health; New study shows rising depression among Ontario teens