ഒട്ടാവ : കാനഡയിൽ മരണകാരണങ്ങളിൽ പ്രധാനമായി കാൻസർ തുടരുന്നുവെന്നും 2026-ൽ മാത്രം രാജ്യത്ത് 2,54,000 പുതിയ കേസുകൾ റിപ്പോർട്ട് ചെയ്യാൻ സാധ്യതയുണ്ടെന്നും കനേഡിയൻ മെഡിക്കൽ അസോസിയേഷൻ ജേണൽ (CMAJ) പ്രസിദ്ധീകരിച്ച പഠനം വ്യക്തമാക്കുന്നു. അടുത്ത വർഷം മാത്രം ഏതാണ്ട് 88,000 മരണങ്ങൾ കാൻസർ മൂലം സംഭവിക്കാമെന്നാണ് പുതിയ മോഡലിംഗ് സൂചിപ്പിക്കുന്നത്. ശ്വാസകോശം, സ്തനം, പ്രോസ്റ്റേറ്റ്, കൊളോറെക്റ്റൽ എന്നിവയുമായി ബന്ധപ്പെട്ട കാൻസറുകളാണ് പുതിയ കേസുകളിൽ പകുതിയോളമെന്നും റിപ്പോർട്ടിലുണ്ട്.
അതേസമയം, അത്യാധുനിക ചികിത്സാ രീതികളുടെ ഫലമായി മരണനിരക്കിൽ കുറവുണ്ടാകുന്നത് ആശ്വാസകരമാണെന്ന് പഠനത്തിന് നേതൃത്വം നൽകിയവർ ചൂണ്ടിക്കാട്ടി. എന്നാൽ സെർവിക്കൽ കാൻസർ, തലയെയും കഴുത്തിനെയും ബാധിക്കുന്ന കാൻസർ, മെലനോമ, പാൻക്രിയാറ്റിക്, ഗർഭാശയ കാൻസർ എന്നിവ വർധിക്കുന്നത് ആശങ്കയുണ്ടാക്കുന്ന പ്രവണതയാണെന്ന് ഗവേഷകർ വിലയിരുത്തുന്നു. എച്ച്.പി.വി (HPV) വാക്സിനേഷൻ പരിപാടികൾ രാജ്യത്ത് നിലവിലുണ്ടെങ്കിലും സെർവിക്കൽ കാൻസർ നിരക്ക് പ്രതീക്ഷിച്ച നിലയിലേക്ക് കുറഞ്ഞിട്ടില്ലെന്നും റിപ്പോർട്ട് വ്യക്തമാക്കുന്നു.
ശ്വാസകോശാർബുദമാണ് മരണനിരക്കിൽ ഇപ്പോഴും മുന്നിൽ നിൽക്കുന്നത്. പുകയില ഉപയോഗം കുറഞ്ഞിട്ടും സ്ത്രീകളിൽ ശ്വാസകോശാർബുദം വർധിക്കുന്നത് ജീവിതശൈലി, റാഡോൺ വാതകം, വായുമലിനീകരണം എന്നിവയുമായി ബന്ധപ്പെട്ടിരിക്കാമെന്ന് പഠനം നിരീക്ഷിക്കുന്നു. അമിതവണ്ണവും വ്യായാമക്കുറവും പാൻക്രിയാറ്റിക്, ഗർഭാശയ കാൻസറുകൾക്ക് കാരണമാകുന്നുണ്ട്. കൊളോറെക്റ്റൽ കാൻസർ പ്രായമായവരിൽ കുറയുന്നുണ്ടെങ്കിലും യുവാക്കളിൽ ഇത് വർധിക്കുന്നത് ആശങ്കാജനകമാണെന്ന് ആരോഗ്യ വിദഗ്ധർ അറിയിച്ചു.
ജീവിതകാലയളവിൽ 42 ശതമാനം കനേഡിയൻ പൗരന്മാർക്കും ഏതെങ്കിലും തരത്തിലുള്ള കാൻസർ ബാധിക്കാൻ സാധ്യതയുണ്ടെന്നാണ് കണക്കാക്കപ്പെടുന്നത്. മദ്യത്തിന്റെയും പുകയിലയുടെയും ഉപയോഗം ഒഴിവാക്കുക, ആരോഗ്യകരമായ ഭക്ഷണക്രമം പാലിക്കുക, കൃത്യസമയത്ത് പരിശോധനകൾ നടത്തുക എന്നിവ വഴി രോഗസാധ്യത കുറയ്ക്കാൻ സാധിക്കുമെന്ന് വിദഗ്ധർ നിർദ്ദേശിക്കുന്നു. പരിശോധനകൾക്കുള്ള പ്രായപരിധി കുറയ്ക്കണമെന്നും വാക്സിനേഷൻ നടപടികൾ കൂടുതൽ ശക്തമാക്കണമെന്നും കനേഡിയൻ കാൻസർ സൊസൈറ്റി പ്രവിശ്യാ സർക്കാരുകളോട് ആവശ്യപ്പെട്ടിട്ടുണ്ട്.
Cancer is the leading cause of death in Canada; study says number of patients to increase by 2026
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
