ഒട്ടാവ: സൈനിക ചെലവുകൾ ഗണ്യമായി വർദ്ധിപ്പിക്കാനുള്ള ലക്ഷ്യപ്രാപ്തിക്കായി കാനഡയിൽ ചരക്ക് സേവന നികുതി അഥവാ ജിഎസ്ടി വർദ്ധിപ്പിച്ചേക്കുമെന്ന് പുതിയ റിപ്പോർട്ടുകൾ സൂചിപ്പിക്കുന്നു. പ്രമുഖ സാമ്പത്തിക ഗവേഷണ സ്ഥാപനമായ സി.ഡി. ഹോവ് ഇൻസ്റ്റിറ്റ്യൂട്ട് പുറത്തുവിട്ട പഠന റിപ്പോർട്ടിലാണ് കനേഡിയൻ ജനതയ്ക്ക് തിരിച്ചടിയാകുന്ന ഈ ശുപാർശകളുള്ളത്. 2035-ഓടെ രാജ്യത്തിന്റെ പ്രതിരോധ ബജറ്റ് മൊത്ത ആഭ്യന്തര ഉത്പാദനത്തിന്റെ അഞ്ച് ശതമാനമായി ഉയർത്താനാണ് പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള സർക്കാർ ലക്ഷ്യമിടുന്നത്. ഈ ഭീമമായ തുക കണ്ടെത്തണമെങ്കിൽ ജിഎസ്ടിയിൽ ഒന്ന് മുതൽ രണ്ട് ശതമാനം വരെ വർദ്ധനവ് വരുത്തുകയോ അല്ലെങ്കിൽ സൈനികേതര മേഖലകളിലെ സർക്കാർ ചെലവുകൾ കർശനമായി വെട്ടിക്കുറയ്ക്കുകയോ ചെയ്യേണ്ടി വരുമെന്ന് റിപ്പോർട്ട് വ്യക്തമാക്കുന്നു.
നിലവിലെ കണക്കുകൾ പ്രകാരം 2025-26 കാലയളവിൽ പ്രതിരോധ മേഖലയ്ക്കായി 50 ബില്യൺ ഡോളറാണ് മാറ്റിവെച്ചിരിക്കുന്നത്. എന്നാൽ വരും ദശകത്തിൽ ഇത് മൂന്നിരട്ടിയായി വർദ്ധിച്ച് 150 ബില്യൺ ഡോളറിലെത്തുമെന്നാണ് പ്രവചനം. നാറ്റോ സഖ്യത്തിന്റെ പ്രതിരോധ ലക്ഷ്യങ്ങൾ കൈവരിക്കാൻ കാനഡയ്ക്ക് മേൽ ശക്തമായ സമ്മർദ്ദമുണ്ട്. ജിഎസ്ടിയിൽ രണ്ട് ശതമാനം വർദ്ധനവ് വരുത്തിയാൽ പ്രതിവർഷം ഏകദേശം 25 ബില്യൺ ഡോളർ അധികമായി സമാഹരിക്കാൻ സാധിക്കുമെന്നും ഇത് കടബാധ്യത കുറയ്ക്കാൻ സഹായിക്കുമെന്നും പഠനം ചൂണ്ടിക്കാട്ടുന്നു.
എങ്കിലും നികുതി വർദ്ധനവ് സാധാരണക്കാരുടെ ജീവിതച്ചെലവ് ഉയർത്താൻ കാരണമാകുമെന്ന ആശങ്ക ശക്തമാണ്. ഉൽപ്പാദനക്ഷമതയിലെ കുറവും പ്രായമായവരുടെ ജനസംഖ്യ കൂടുന്നതും കനേഡിയൻ സമ്പദ്വ്യവസ്ഥയ്ക്ക് വെല്ലുവിളിയാകുന്ന സാഹചര്യത്തിൽ, പ്രതിരോധത്തിനായി വലിയ തുക കണ്ടെത്തുന്നത് കടുത്ത സാമ്പത്തിക തീരുമാനങ്ങളിലേക്ക് സർക്കാരിനെ നയിച്ചേക്കും. വരും തലമുറയ്ക്ക് വലിയ കടബാധ്യത ഉണ്ടാക്കാതിരിക്കാൻ നികുതി വർദ്ധനവും മറ്റ് മേഖലകളിലെ ചെലവ് ചുരുക്കലും കലർന്ന മിശ്രിത രീതിയാകും അഭികാമ്യമെന്ന് റിപ്പോർട്ടിന്റെ രചയിതാക്കളായ കോളിൻ ബസ്ബിയും നിക്കോളാസ് ദാഹിറും അഭിപ്രായപ്പെടുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canadians could face tax hikes as Ottawa scrambles to fund defence target
