ഒട്ടാവ: നാച്ചുറൽ റിസോഴ്സസ് കാനഡയിൽ (NRCan) നിന്ന് 2029-ഓടെ ഏകദേശം 400 തസ്തികകൾ ഒഴിവാക്കുമെന്ന് അധികൃതർ അറിയിച്ചു. ഫെഡറൽ ഗവൺമെന്റിന്റെ 60 ബില്യൺ ഡോളറിന്റെ സമ്പൂർണ്ണ ചെലവ് അവലോകന പദ്ധതിയുടെ ഭാഗമായാണ് ഈ നടപടി. ജോലിയിൽ മാറ്റങ്ങളുണ്ടാകാൻ സാധ്യതയുണ്ടെന്ന് അറിയിച്ച് 700 സ്ഥിര ജീവനക്കാർക്ക് ഈ മാസം കത്തുകൾ നൽകിയ കാര്യം നാച്ചുറൽ റിസോഴ്സസ് കാനഡ വെളിപ്പെടുത്തി.
മറ്റ് സർക്കാർ വകുപ്പുകളിലേക്ക് ജോലി മാറുക, നേരത്തെയുള്ള വിരമിക്കൽ, സ്വമേധയാ ഉള്ള രാജി എന്നിവയിലൂടെ ഉദ്യോഗസ്ഥരെ പുനർവിന്യസിക്കാനാണ് സർക്കാർ ലക്ഷ്യമിടുന്നത്. ഇതിലൂടെ വളരെ കുറഞ്ഞ എണ്ണം ജീവനക്കാർക്ക് മാത്രമേ നിർബന്ധിതമായി ജോലി ഒഴിയേണ്ടി വരൂ എന്ന് വകുപ്പ് അറിയിച്ചു. നാല് വർഷത്തിനുള്ളിൽ 1.892 ബില്യൺ ഡോളറിന്റെ സമ്പാദ്യം കണ്ടെത്താനാണ് 2025-ലെ ഫെഡറൽ ബജറ്റ് ഈ വകുപ്പിനോട് നിർദ്ദേശിച്ചിരിക്കുന്നത്.
ബജറ്റ് ലക്ഷ്യങ്ങൾ കൈവരിക്കുന്നതിനായി ഭരണപരമായ ജോലികൾ കുറയ്ക്കാനും, AI പോലുള്ള സാങ്കേതികവിദ്യകൾ പ്രയോജനപ്പെടുത്താനും തീരുമാനിച്ചിട്ടുണ്ട്. 2 ബില്യൺ ട്രീ പ്രോഗ്രാം അവസാനിപ്പിക്കുന്നതിനൊപ്പം കാനഡ ഗ്രീനർ ഹോംസ് ഗ്രാൻഡ് ഉൾപ്പെടെയുള്ള വിവിധ പദ്ധതികളും നിർത്തലാക്കും. പിഎസ്എസി (PSAC), പിഐപിഎസ് സി (PIPSC) തുടങ്ങിയ സംഘടനകളിലെ നൂറുകണക്കിന് അംഗങ്ങളെ ഈ വെട്ടിക്കുറയ്ക്കൽ ബാധിക്കുമെന്ന് യൂണിയനുകൾ അറിയിച്ചു.
2025 മാർച്ചിലെ കണക്കനുസരിച്ച് 6,044 ജീവനക്കാരാണ് നാച്ചുറൽ റിസോഴ്സസ് കാനഡയിലുള്ളത്. ഫെഡറൽ പബ്ലിക് സർവീസിലെ ആകെ ഉദ്യോഗസ്ഥരുടെ എണ്ണം 2028-29 ഓടെ 3,30,000 ആയി കുറയ്ക്കാനാണ് സർക്കാർ ലക്ഷ്യമിടുന്നത്. ഇതിന്റെ ഭാഗമായി വിവിധ വകുപ്പുകളിലായി ആകെ 40,000 തൊഴിലവസരങ്ങൾ ഇല്ലാതാകും. ഷെയർഡ് സർവീസസ് കാനഡ, എംപ്ലോയ്മെന്റ് ആൻഡ് സോഷ്യൽ ഡെവലപ്മെന്റ് കാനഡ തുടങ്ങിയ വകുപ്പുകളിലും ജനുവരി മുതൽ ഇത്തരം നടപടികൾ ആരംഭിക്കും.
ഫിനാൻസ് വകുപ്പ്, പബ്ലിക് സർവീസ് കമ്മീഷൻ ഓഫ് കാനഡ, പ്രൈവി കൗൺസിൽ ഓഫീസ് തുടങ്ങിയ ഇടങ്ങളിലും ഉദ്യോഗസ്ഥർക്ക് മുന്നറിയിപ്പ് കത്തുകൾ നൽകിയിട്ടുണ്ട്. ഇതിനുപുറമെ, ഏകദേശം 68,000 സർക്കാർ ഉദ്യോഗസ്ഥർക്ക് നേരത്തെയുള്ള വിരമിക്കൽ പദ്ധതിയെക്കുറിച്ചുള്ള (Early Retirement) അറിയിപ്പും സർക്കാർ നൽകിക്കഴിഞ്ഞു. രാജ്യത്തെ പ്രകൃതിവിഭവങ്ങൾ സുസ്ഥിരമായി വികസിപ്പിക്കുന്നതിനുള്ള വകുപ്പിന്റെ പ്രവർത്തനങ്ങൾ തുടർന്നും കാര്യക്ഷമമായി നടക്കുമെന്ന് NRCan അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Canadian government to cut costs; 400 positions in Department of Natural Resources eliminated
