ഒട്ടാവ : കനേഡിയൻ പാസ്പോർട്ട് ഉടമകൾക്ക് ചൈനയിലേക്ക് വിസയില്ലാതെ യാത്ര ചെയ്യാൻ അനുമതി നൽകിക്കൊണ്ടുള്ള പുതിയ നയം 2026 ഫെബ്രുവരി 17 മുതൽ പ്രാബല്യത്തിൽ വന്നു. വിനോദസഞ്ചാരം, ബിസിനസ്സ്, വ്യക്തിഗത സന്ദർശനങ്ങൾ, എക്സ്ചേഞ്ച് ട്രിപ്പുകൾ, ട്രാൻസിറ്റ് എന്നിവയ്ക്കായി ചൈനയിലെത്തുന്ന കാനഡക്കാർക്ക് ഇനിമുതൽ വിസയില്ലാതെ 30 ദിവസം വരെ രാജ്യത്ത് തുടരാം. പീപ്പിൾസ് റിപ്പബ്ലിക് ഓഫ് ചൈനയുടെ (PRC) വിദേശകാര്യ മന്ത്രാലയമാണ് ഇക്കാര്യം ഔദ്യോഗികമായി അറിയിച്ചത്.
നിലവിലെ തീരുമാനപ്രകാരം ഈ ആനുകൂല്യം 2026 ഡിസംബർ 31 വരെ നിലനിൽക്കും. ഇതിനുശേഷമുള്ള കാര്യങ്ങളിൽ ചൈനീസ് സർക്കാർ പിന്നീട് തീരുമാനമെടുക്കും. കാനഡയ്ക്കൊപ്പം യുണൈറ്റഡ് കിംഗ്ഡം (UK) പൗരന്മാർക്കും സമാനമായ വിസയിളവ് ചൈന പ്രഖ്യാപിച്ചിട്ടുണ്ട്. വിദേശ വിനോദസഞ്ചാരികളെയും നിക്ഷേപകരെയും ആകർഷിക്കുന്നതിന്റെ ഭാഗമായാണ് ചൈനയുടെ ഈ നിർണ്ണായക നീക്കം.
അതേസമയം, ശമ്പളത്തോടുകൂടിയ ജോലി, ദീർഘകാല പഠനം, അല്ലെങ്കിൽ 30 ദിവസത്തിൽ കൂടുതൽ രാജ്യത്ത് താമസിക്കാനാഗ്രഹിക്കുന്നവർ എന്നിവർ നിർബന്ധമായും ബന്ധപ്പെട്ട വിസകൾ നേടേണ്ടതുണ്ട്. നേരത്തെ ഹെയ്നാൻ പ്രവിശ്യയിൽ മാത്രമായിരുന്നു കാനഡക്കാർക്ക് ഇത്തരത്തിൽ വിസയിളവ് ലഭിച്ചിരുന്നത്. പുതിയ നിയമപ്രകാരം ചൈനയുടെ പ്രധാന ഭൂപ്രദേശങ്ങളിലേക്കെല്ലാം വിസയില്ലാതെ പ്രവേശനം സാധ്യമാകും.
പ്രധാനമന്ത്രി മാർക്ക് കാർണി കഴിഞ്ഞ മാസം ചൈന സന്ദർശിച്ചതിന് പിന്നാലെയാണ് വിസാനിയമങ്ങളിൽ ഇളവ് പ്രഖ്യാപിക്കപ്പെട്ടത്. ഇരുരാജ്യങ്ങളും തമ്മിലുള്ള വ്യാപാര ബന്ധം മെച്ചപ്പെടുത്തുന്നതിന്റെയും ഉഭയകക്ഷി ബന്ധം ശക്തമാക്കുന്നതിന്റെയും ഭാഗമായാണ് ഈ നടപടിയെന്ന് വിലയിരുത്തപ്പെടുന്നു. ചൈനീസ് വംശജരായ ഏകദേശം 1.7 മില്യൺ കനേഡിയൻ പൗരന്മാർക്ക് ഈ തീരുമാനം വലിയ തോതിൽ ഉപകരിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canadian citizens can now travel to China without a visa; New law comes into effect!
