ടൊറന്റോ: ഇറാനിൽ ഭരണകൂടത്തിനെതിരെ തുടരുന്ന ജനകീയ പ്രതിഷേധങ്ങൾക്കിടയിൽ ഒരു കനേഡിയൻ പൗരൻ കൊല്ലപ്പെട്ടതായി വിദേശകാര്യ മന്ത്രി അനിത ആനന്ദ് അറിയിച്ചു. ഇറാനിയൻ അധികൃതരുടെ നടപടികളാണ് മരണത്തിന് കാരണമായതെന്ന് മന്ത്രി വ്യക്തമാക്കി. കൊല്ലപ്പെട്ട വ്യക്തിയുടെ കുടുംബവുമായി കനേഡിയൻ കോൺസുലർ ഉദ്യോഗസ്ഥർ ബന്ധപ്പെട്ടുവരികയാണ്. പൗരന്റെ മറ്റ് വിവരങ്ങൾ സുരക്ഷാ കാരണങ്ങളാൽ പുറത്തുവിട്ടിട്ടില്ല.
ജീവിതച്ചെലവ് ക്രമാതീതമായി വർദ്ധിച്ചതിനെത്തുടർന്ന് രണ്ടാഴ്ച മുൻപാണ് ഇറാനിൽ പ്രതിഷേധങ്ങൾ ആരംഭിച്ചത്. എന്നാൽ സർക്കാർ സായുധ സേനയെ ഉപയോഗിച്ച് പ്രതിഷേധങ്ങളെ അടിച്ചമർത്താൻ ശ്രമിച്ചതോടെ ഇത് രാജ്യം മുഴുവൻ വ്യാപിക്കുകയായിരുന്നു. സമാധാനപരമായി പ്രതിഷേധിച്ചവർക്കെതിരെ ഇറാനിയൻ ഭരണകൂടം കാണിക്കുന്ന ക്രൂരതയെ കാനഡ ശക്തമായി അപലപിച്ചു. അക്രമങ്ങൾ അടിയന്തരമായി അവസാനിപ്പിക്കണമെന്നും മനുഷ്യാവകാശങ്ങളെ മാനിക്കണമെന്നും അനിത ആനന്ദ് ആവശ്യപ്പെട്ടു.
ഇറാനിലെ സാഹചര്യം വഷളായതിനെത്തുടർന്ന് അവിടെയുള്ള കനേഡിയൻ പൗരന്മാരോട് അടിയന്തരമായി രാജ്യം വിടാൻ ഗ്ലോബൽ അഫയേഴ്സ് കാനഡ നിർദ്ദേശിച്ചിട്ടുണ്ട്. നിലവിലെ സാഹചര്യത്തിൽ ഇറാനിലേക്കുള്ള യാത്രകൾ ഒഴിവാക്കണമെന്നും അധികൃതർ മുന്നറിയിപ്പ് നൽകി. കഴിഞ്ഞ ഒരു പതിറ്റാണ്ടായി ഇറാനിലേക്ക് യാത്ര ചെയ്യുന്നതിനെതിരെ കാനഡ മുന്നറിയിപ്പ് നൽകുന്നുണ്ടെങ്കിലും, പുതിയ സാഹചര്യത്തിൽ നിർദ്ദേശങ്ങൾ കൂടുതൽ കർക്കശമാക്കിയിരിക്കുകയാണ്.
പ്രതിഷേധങ്ങൾ അടിച്ചമർത്തുന്നതിന്റെ ഭാഗമായി ഇറാനിൽ മരണസംഖ്യ ഉയരുന്നതിൽ വേൾഡ് റെഫ്യൂജി ആൻഡ് മൈഗ്രേഷൻ കൗൺസിൽ ആശങ്ക രേഖപ്പെടുത്തി. ഏകദേശം 2,500-ലധികം ആളുകൾ കൊല്ലപ്പെട്ടതായും നിരവധി പേരെ തടവിലാക്കിയതായും റിപ്പോർട്ടുകളുണ്ട്. ഇറാനിലെ മുതിർന്ന സൈനിക ഉദ്യോഗസ്ഥർക്കും സുരക്ഷാ ഉദ്യോഗസ്ഥർക്കും എതിരെ അന്താരാഷ്ട്ര തലത്തിൽ ഉപരോധം ഏർപ്പെടുത്തണമെന്ന് കൗൺസിൽ ആവശ്യപ്പെട്ടു.
ഇറാനിലെ സംഭവവികാസങ്ങളിൽ ഐക്യരാഷ്ട്രസഭയും അന്താരാഷ്ട്ര ക്രിമിനൽ കോടതിയും ഇടപെടണമെന്ന ആവശ്യവും ശക്തമാണ്. മനുഷ്യാവകാശങ്ങൾ സംരക്ഷിക്കപ്പെടുന്ന ഒരു ജനാധിപത്യ ഭരണകൂടത്തിനായി ഇറാനിലെ ജനങ്ങൾ ആഗ്രഹിക്കുന്നുണ്ടെന്നും, ആ സമാധാനപരമായ മാറ്റത്തിന് അന്താരാഷ്ട്ര സമൂഹം പിന്തുണ നൽകണമെന്നും വിവിധ മനുഷ്യാവകാശ സംഘടനകൾ പ്രസ്താവനയിൽ ആവശ്യപ്പെട്ടു.
canadian-citizen-has-died-in-iran-as-anti-government-protests-continue-anand
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
