ഒട്ടാവ: സ്റ്റുഡന്റ് പെർമിറ്റുകളിൽ വരുത്തിയ കുറവും അപേക്ഷകളുടെ വർധനവും കാനഡയുടെ ഇമിഗ്രേഷൻ സംവിധാനത്തെ പ്രതിസന്ധിയിലാക്കിയതായി നിയമവിദഗ്ധർ.
ഒക്ടോബർ 31-ലെ കണക്കുകൾ പ്രകാരം പത്ത് ലക്ഷത്തിലധികം അപേക്ഷകൾ കെട്ടിക്കിടക്കുന്നതായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) അറിയിച്ചു. സേവന മാനദണ്ഡങ്ങൾക്കുള്ളിലുള്ള മറ്റ് പത്ത് ലക്ഷം അപേക്ഷകൾ കൂടി ചേരുമ്പോൾ മൊത്തം അപേക്ഷകരുടെ എണ്ണം 20 ലക്ഷത്തിലധികമാണ്. കോവിഡിന് മുൻപുള്ള കാലയളവിനേക്കാൾ അപേക്ഷകൾ വർധിച്ചിട്ടും വകുപ്പിലെ ജീവനക്കാരുടെ എണ്ണം വെട്ടിക്കുറച്ചത് തിരിച്ചടിയായതായി കനേഡിയൻ ഇമിഗ്രേഷൻ ലോയേഴ്സ് അസോസിയേഷൻ ഡയറക്ടർ റിക്ക് ലാമന്ന വ്യക്തമാക്കി.
അപേക്ഷകൾ വേഗത്തിൽ തീർപ്പാക്കാൻ ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള സാങ്കേതികവിദ്യകൾ ഉപയോഗിക്കുന്നുണ്ടെന്ന് ഐ.ആർ.സി.സി അറിയിച്ചെങ്കിലും, നിലവിലെ പ്രശ്നങ്ങൾ പരിഹരിക്കാൻ ഇവ പര്യാപ്തമല്ലെന്ന് ലാമന്ന ചൂണ്ടിക്കാട്ടി. എ.ഐ സാങ്കേതികവിദ്യയുടെ ഉപയോഗം പലപ്പോഴും വിചിത്രവും സംശയാസ്പദവുമായ തീരുമാനങ്ങളിലേക്കാണ് നയിക്കുന്നതെന്ന് അദ്ദേഹം ആരോപിച്ചു. ആവശ്യമായ ജീവനക്കാരില്ലാതെ ഇത്രയധികം അപേക്ഷകൾ കൈകാര്യം ചെയ്യുന്നത് പ്രായോഗികമല്ലെന്നും അദ്ദേഹം കൂട്ടിച്ചേർത്തു.
ഭവനരഹിതർ കൂടുന്നതും ആരോഗ്യരംഗത്തെ സമ്മർദ്ദവും കണക്കിലെടുത്ത് 2026-ൽ സ്റ്റുഡന്റ് പെർമിറ്റുകളുടെ എണ്ണം 4,08,000 ആയി സർക്കാർ കുറച്ചിട്ടുണ്ട്. ഇത് മുൻവർഷത്തെ അപേക്ഷിച്ച് ഏഴ് ശതമാനവും 2024-നെ അപേക്ഷിച്ച് 16 ശതമാനവും കുറവാണ്. അന്താരാഷ്ട്ര വിദ്യാർത്ഥികളിൽ നിന്നുള്ള വരുമാനം നിലച്ചത് സർവ്വകലാശാലകളെ വലിയ സാമ്പത്തിക പ്രതിസന്ധിയിലാക്കിയിട്ടുണ്ട്. അതേസമയം മാസ്റ്റേഴ്സ്, ഡോക്ടറൽ വിദ്യാർത്ഥികൾക്ക് പ്രത്യേക പരിഗണന നൽകുമെന്ന സർക്കാരിന്റെ പ്രഖ്യാപനം നയപരമായ വൈരുദ്ധ്യം സൃഷ്ടിക്കുന്നതായും വിലയിരുത്തപ്പെടുന്നു.
രാജ്യത്തെ അടിസ്ഥാന സൗകര്യ വികസന പദ്ധതികൾക്കായി വിദഗ്ധ തൊഴിലാളികളുടെ കുറവ് അനുഭവപ്പെടുമെന്ന ആശങ്കയും ഉയരുന്നുണ്ട്. കുടിയേറ്റക്കാരുടെ എണ്ണം കുറയ്ക്കുന്നത് നിർമ്മാണ മേഖലയെ ബാധിക്കുമെന്ന് ലാമന്ന മുന്നറിയിപ്പ് നൽകി. നിക്ഷേപകർക്കും ബിസിനസ് മേഖലയ്ക്കും വിശ്വാസമുണ്ടാകുന്ന രീതിയിൽ കൂടുതൽ വ്യക്തതയുള്ളതും പ്രവചിക്കാവുന്നതുമായ ഇമിഗ്രേഷൻ നയം കാനഡയ്ക്ക് ആവശ്യമാണെന്നും അദ്ദേഹം വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Severe decline in student permits; Canada’s immigration system in crisis, says advocacy group
