ഒട്ടാവ: കാനഡയിലെ കുടിയേറ്റ നടപടികൾ ആധുനികവൽക്കരിക്കുന്നതിന്റെ ഭാഗമായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) തങ്ങളുടെ പ്രഥമ എഐ സ്ട്രാറ്റജി പ്രഖ്യാപിച്ചു. മനുഷ്യകേന്ദ്രീകൃതമായ പ്രവർത്തനങ്ങൾ ഉറപ്പാക്കുക, സുതാര്യതയും നീതിയും പുലർത്തുക, സ്വകാര്യത സംരക്ഷിക്കുക തുടങ്ങിയ അഞ്ച് പ്രധാന തത്വങ്ങളെ അടിസ്ഥാനമാക്കിയാണ് ഈ പുതിയ നയം രൂപീകരിച്ചിരിക്കുന്നത്. കുടിയേറ്റ അപേക്ഷകളിൽ തത്സമയ തട്ടിപ്പുകൾ കണ്ടെത്താൻ സഹായിക്കുന്ന ‘കമ്പ്യൂട്ടർ വിഷൻ’ ഉൾപ്പെടെയുള്ള നൂതന സാങ്കേതികവിദ്യകൾ ഇനി മുതൽ ഇമിഗ്രേഷൻ വിഭാഗം പ്രയോജനപ്പെടുത്തും.
എഐ ഉപയോഗത്തെ ‘എവരിഡേ’, ‘പ്രോഗ്രാം’, ‘എക്സ്പിരിമെന്റൽ’ എന്നിങ്ങനെ മൂന്ന് വിഭാഗങ്ങളിലായാണ് തിരിച്ചിരിക്കുന്നത്. ഭരണപരമായ ജോലികൾ ലഘൂകരിക്കാനും സങ്കീർണ്ണമല്ലാത്ത അപേക്ഷകൾ വേഗത്തിൽ ഉദ്യോഗസ്ഥരുടെ ശ്രദ്ധയിൽ എത്തിക്കാനും ഈ സംവിധാനത്തിലൂടെ സാധിക്കും. എന്നാൽ, ഒരു അപേക്ഷ നിരസിക്കുന്ന കാര്യത്തിൽ എഐ സ്വയം തീരുമാനമെടുക്കില്ലെന്നും അത്തരം തീരുമാനങ്ങൾ പൂർണ്ണമായും മനുഷ്യരായ ഉദ്യോഗസ്ഥരുടെ വിവേചനാധികാരത്തിന് കീഴിലായിരിക്കുമെന്നും ഐആർസിസി വ്യക്തമാക്കി. എഐ സംവിധാനങ്ങൾ ഒരു സാഹചര്യത്തിലും സ്വതന്ത്രമായി പ്രവർത്തിക്കില്ലെന്നും കൃത്യമായ മേൽനോട്ടത്തിലും നിയമങ്ങൾക്കും മാർഗ്ഗനിർദ്ദേശങ്ങൾക്കും വിധേയമായും മാത്രമേ ഇവ വിനിയോഗിക്കൂ എന്നും അധികൃതർ ഉറപ്പുനൽകുന്നു. കാനഡയുടെ സാമ്പത്തിക രംഗത്ത് കുടിയേറ്റം ചെലുത്തുന്ന സ്വാധീനത്തെക്കുറിച്ച് മുൻകൂട്ടി പ്രവചിക്കാനും ഈ സാങ്കേതികവിദ്യ ഉപയോഗപ്പെടുത്തും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada’s immigration department has published its first-ever AI strategy
