ഒട്ടാവ: ഹോർമുസ് കടലിടുക്കിലെ കപ്പൽ ഗതാഗതം പുനഃസ്ഥാപിക്കുന്നതിനായി സൈനിക-സാങ്കേതിക സഹായങ്ങൾ നൽകാൻ സന്നദ്ധമാണെന്ന് കാനഡ പ്രതിരോധ മന്ത്രി ഡേവിഡ് മക്ഗ്വിന്റി. ഇറാൻ്റെ നിയന്ത്രണത്തിലുള്ള പ്രധാന എണ്ണക്കടത്തു പാതയിൽ ടാങ്കറുകൾക്ക് സുരക്ഷിതമായി സഞ്ചരിക്കാനുള്ള സാഹചര്യം ഒരുക്കുന്നതിനായി സഖ്യകക്ഷികളുമായി കാനഡ ചർച്ചകൾ തുടങ്ങിയതായി പ്രതിരോധ മന്ത്രാലയം വ്യക്തമാക്കി.
അമേരിക്ക-ഇസ്രായേൽ സഖ്യവും ഇറാനും തമ്മിലുള്ള സൈനിക നീക്കങ്ങളെത്തുടർന്ന് ഒരു മാസമായി ഹോർമുസ് കടലിടുക്കിലൂടെയുള്ള ഗതാഗതം തടസ്സപ്പെട്ടിരിക്കുകയാണ്. ആഗോള ഊർജ വിപണിയെ തളർത്തിയ ഈ പ്രതിസന്ധിക്ക് പരിഹാരം കാണാൻ യുദ്ധക്കപ്പലുകൾ, മൈനുകൾ നീക്കം ചെയ്യുന്നതിനുള്ള വിദഗ്ധ സേവനം, സൈബർ സുരക്ഷാ സംവിധാനങ്ങൾ എന്നിവ നൽകാനാണ് കാനഡ ആലോചിക്കുന്നത്. എന്നാൽ ഈ സഹായങ്ങൾ ലഭ്യമാക്കണമെങ്കിൽ മേഖലയിൽ അടിയന്തരമായി വെടിനിർത്തൽ നടപ്പിലാക്കണമെന്ന നിബന്ധനയും കാനഡ മുന്നോട്ടുവെക്കുന്നുണ്ട്.
നിലവിലെ യുദ്ധത്തിൽ നേരിട്ട് പങ്കാളികളാകാൻ കാനഡയ്ക്ക് താല്പര്യമില്ലെന്ന് മന്ത്രി മക്ഗ്വിന്റി അറിയിച്ചു. ഫ്രാൻസ് ഉൾപ്പെടെയുള്ള രാജ്യങ്ങളുമായി ചേർന്ന് സമാധാനപരമായ ഗതാഗതം ഉറപ്പാക്കാനാണ് ശ്രമം. ലോകത്തെ 20 ശതമാനം പെട്രോളിയം ഉൽപ്പന്നങ്ങളും കടന്നുപോകുന്ന പാതയായതിനാൽ, ഹോർമുസ് കടലിടുക്കിലെ തടസ്സം നീക്കാൻ യുകെ, ജർമ്മനി, ജപ്പാൻ തുടങ്ങിയ രാജ്യങ്ങളും കാനഡയ്ക്കൊപ്പം സംയുക്ത പ്രസ്താവനയിൽ ഒപ്പുവെച്ചിട്ടുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada will help open the Strait of Hormuz; Defense Minister says ceasefire is essential
