കനേഡിയൻ സോഫ്റ്റ്വുഡ് മരത്തടി ഇറക്കുമതിക്ക് അമേരിക്ക കൂടുതൽ നികുതി ചുമത്തി. കാനഡയിൽ നിന്നുള്ള മരത്തടിക്ക് അന്യായമായ സബ്സിഡി ലഭിക്കുന്നുണ്ടെന്ന് കണ്ടെത്തിയതിനെ തുടർന്നാണ് അമേരിക്കൻ വാണിജ്യ വകുപ്പിന്റെ ഈ നീക്കം. കനേഡിയൻ കമ്പനികൾക്ക് കനത്ത സാമ്പത്തിക ഭാരം സൃഷ്ടിക്കുന്ന ഈ നടപടി ഇരു രാജ്യങ്ങളിലെയും വ്യവസായ മേഖലകളെ ദോഷകരമായി ബാധിക്കുമെന്ന് വിലയിരുത്തപ്പെടുന്നു.
കൗണ്ടർവെയ്ലിംഗ് താരിഫ് 6.74 ശതമാനത്തിൽ നിന്ന് 14.63 ശതമാനമായി വർദ്ധിപ്പിക്കാൻ വകുപ്പ് തീരുമാനിച്ചു. ഇതിനോടൊപ്പം, നിലവിൽ 20.56 ശതമാനമുള്ള ആൻ്റി-ഡമ്പിംഗ് താരിഫ് കൂടി ചേരുമ്പോൾ മൊത്തം നികുതി 35.19 ശതമാനമായി ഉയരും. ഈ നീക്കം നടപ്പാക്കാൻ യു.എസ്. കസ്റ്റംസ് ആൻഡ് ബോർഡർ പ്രൊട്ടക്ഷൻ വിഭാഗത്തിന് നിർദേശം നൽകിയിട്ടുണ്ട്.
ഈ തീരുമാനം കാനഡയിലെ വനവത്കരണത്തെ ആശ്രയിക്കുന്ന പ്രദേശങ്ങളിൽ വലിയ സമ്മർദ്ദം സൃഷ്ടിക്കുമെന്ന് ബി.സി. ലംബർ ട്രേഡ് കൗൺസിൽ പ്രസിഡൻ്റ് കുർട്ട് നിക്വിഡെറ്റ് പ്രസ്താവിച്ചു. കൂടാതെ ഇത് അമേരിക്കൻ നിർമ്മാണ മേഖലയിൽ നിർമ്മാണച്ചെലവ് വർദ്ധിപ്പിക്കുമെന്നും അദ്ദേഹം ചൂണ്ടിക്കാട്ടി. ഈ വിഷയത്തിൽ ചർച്ചകളിലൂടെ ഒരു പരിഹാരം കണ്ടെത്താൻ കനേഡിയൻ, യുഎസ് സർക്കാരുകൾ മുൻഗണന നൽകണമെന്ന് കൗൺസിൽ ആവശ്യപ്പെട്ടു. കൂടാതെ, ചർച്ചകൾ ഫലം കാണുന്നില്ലെങ്കിൽ യുണൈറ്റഡ് സ്റ്റേറ്റ്സ്-മെക്സിക്കോ-കാനഡ കരാറിന് കീഴിലുള്ള നിയമപരമായ മാർഗ്ഗങ്ങളിലൂടെ കാനഡയുടെ താൽപര്യങ്ങൾ സംരക്ഷിക്കുമെന്നും കൗൺസിൽ അറിയിച്ചു.
ഈ പ്രതിസന്ധി മറികടക്കാൻ ബ്രിട്ടീഷ് കൊളംബിയയിലെ വനവ്യവസായ കൗൺസിൽ പ്രാദേശിക സർക്കാരിനോട് ചില നടപടികൾ ആവശ്യപ്പെട്ടിട്ടുണ്ട്. അനുമതി നടപടികൾ ലളിതമാക്കുക, സംസ്ഥാനതലത്തിൽ തടി വിൽപ്പന സജീവമാക്കുക, വിവിധ വകുപ്പുകൾക്കിടയിലുള്ള തടസ്സങ്ങൾ നീക്കം ചെയ്യുക എന്നിവ ഇതിൽ പ്രധാനമാണ്. ശരിയായ നയങ്ങൾ നടപ്പാക്കുന്നതിലൂടെ പ്രാഥമിക, രണ്ടാംതര വന ഉത്പന്ന നിർമ്മാതാക്കൾക്ക് നിക്ഷേപം നടത്താൻ അനുയോജ്യമായ സാഹചര്യം സൃഷ്ടിക്കാമെന്ന് കൗൺസിൽ പ്രസിഡൻ്റ് കിം ഹാക്സ്റ്റാഡ് അഭിപ്രായപ്പെട്ടു.
ഈ തീരുമാനങ്ങൾ കാനഡ, ബി.സി. എന്നിവക്ക് പുറമെ മറ്റ് പ്രദേശങ്ങളിലും തടി ഉത്പന്നങ്ങളുടെ ലഭ്യത ഉറപ്പാക്കുമെന്നും അവർ കൂട്ടിച്ചേർത്തു. അതേസമയം, പ്രധാനമന്ത്രി മാർക്ക് കാർണി ഈ ആഴ്ച ബി.സി. സന്ദർശിക്കുകയും വന വ്യവസായത്തിന് 700 ദശലക്ഷം ഡോളർ (70 കോടി) വായ്പാ ഗ്യാരൻ്റിയും, കയറ്റുമതി വിപണികൾ വൈവിധ്യവത്കരിക്കാനും ഉത്പന്നങ്ങൾ വികസിപ്പിക്കാനും 500 ദശലക്ഷം ഡോളർ (50 കോടി) സഹായവും വാഗ്ദാനം ചെയ്യുകയും ചെയ്തിട്ടുണ്ട്.
