ഒട്ടാവ: കാനഡയിലെ പ്രമുഖ പൈപ്പ്ലൈൻ ഭീമനായ എൻബ്രിഡ്ജ്, യുഎസിലേക്കുള്ള എണ്ണ കയറ്റുമതി വർദ്ധിപ്പിക്കുന്നതിനായി തങ്ങളുടെ മെയിൻലൈൻ, ഫ്ലാനഗൻ സൗത്ത് പൈപ്പ്ലൈനുകൾ വിപുലീകരിക്കാൻ $1.4 ബില്യൺ അനുവദിച്ചു. ഈ വികസനം വഴി കാനഡയിൽ നിന്ന് പ്രതിദിനം 250,000 ബാരൽ എണ്ണ അധികമായി യുഎസിലേക്ക് എത്തിക്കാൻ സാധിക്കും.
കാനഡയുടെ എണ്ണ കയറ്റുമതിയുടെ ഏറ്റവും വലിയ വിപണിയും വിശ്വസ്ത പങ്കാളിയുമാണ് അമേരിക്ക. 2027-ഓടെ പൂർത്തിയാകുമെന്ന് പ്രതീക്ഷിക്കുന്ന ഈ അധിക ശേഷി, ഇരു രാജ്യങ്ങളും തമ്മിലുള്ള ഊർജ്ജ ബന്ധം കൂടുതൽ ശക്തമാക്കുമെന്നാണ് കാൽഗറി ആസ്ഥാനമായുള്ള കമ്പനി വ്യക്തമാക്കുന്നത്.
യുഎസ് പ്രസിഡന്റ് ഡൊണാൾഡ് ട്രംപിന്റെ കീഴിലുള്ള വ്യാപാര നയങ്ങളിലെ അനിശ്ചിതത്വം കാരണം യുഎസിനു പുറത്തേക്കും എണ്ണ കയറ്റുമതി വൈവിധ്യവത്കരിക്കാൻ ഒട്ടാവ ശ്രമിക്കുമ്പോഴും, തെക്കോട്ടുള്ള വിപുലീകരണം തന്നെയാണ് ഏറ്റവും പ്രായോഗികമായ വഴിയെന്ന് എൻബ്രിഡ്ജ് എക്സിക്യൂട്ടീവുകൾ വാദിക്കുന്നു. “ലോകത്തിലെ ഏറ്റവും വലിയ റിഫൈനിംഗ് കോംപ്ലക്സ് അവിടെയാണ്, അവർക്ക് കൂടുതൽ കനേഡിയൻ എണ്ണ ആവശ്യമുണ്ട്,” എക്സിക്യൂട്ടീവ് വൈസ് പ്രസിഡന്റ് കോളിൻ ഗ്രൂൻഡിംഗ് പറഞ്ഞു. യുഎസിലെ മിഡ്വെസ്റ്റ്, ഗൾഫ് കോസ്റ്റ് മേഖലകളിൽ കനേഡിയൻ ക്രൂഡ് ഓയിലിന് ശക്തമായ ഡിമാൻഡ് തുടരുന്നുണ്ടെന്നും അദ്ദേഹം കൂട്ടിച്ചേർത്തു.
വരും വർഷങ്ങളിൽ കാനഡയുടെ എണ്ണ ഉത്പാദനം പ്രതിദിനം 500,000 മുതൽ 600,000 ബാരൽ വരെ വർധിക്കുമെന്ന് പ്രതീക്ഷിക്കുന്ന പശ്ചാത്തലത്തിലാണ് ഈ നീക്കം. മെയിൻലൈൻ ശൃംഖലയിൽ അടുത്ത വർഷം 250,000 ബാരൽ കൂടി ശേഷി കൂട്ടുന്ന രണ്ടാം ഘട്ത വിപുലീകരണത്തിനും കമ്പനി പദ്ധതിയിടുന്നുണ്ട്.
ഏഷ്യൻ വിപണി ലക്ഷ്യമിട്ട് പടിഞ്ഞാറൻ തീരത്തേക്ക് പുതിയ പൈപ്പ്ലൈൻ സ്ഥാപിക്കുന്നതിനെക്കുറിച്ച് ആൽബർട്ട പ്രൊവിൻഷ്യൽ സർക്കാർ പഠനം നടത്തുന്നുണ്ടെങ്കിലും, ഒരു സ്വകാര്യ സ്ഥാപനവും ഇതുവരെ ഈ പദ്ധതി ഏറ്റെടുക്കാൻ മുന്നോട്ട് വന്നിട്ടില്ല. ആൽബർട്ടയ്ക്ക് സാങ്കേതിക സഹായം നൽകുന്ന എൻബ്രിഡ്ജിന്റെ നിലപാട് വ്യക്തമാണ്: “ആദ്യം തെക്കോട്ടും, പിന്നെ പടിഞ്ഞാറോട്ടും.” നിലവിലുള്ള ട്രാൻസ് മൗണ്ടൻ പൈപ്പ്ലൈൻ വികസനവും എൻബ്രിഡ്ജിന്റെ യുഎസ് ലക്ഷ്യമാക്കിയുള്ള നവീകരണങ്ങളും ഈ ദശാബ്ദത്തിലെ വർധിച്ച ഉത്പാദനം കൈകാര്യം ചെയ്യാൻ കാനഡക്ക് ആവശ്യമായ കയറ്റുമതി ശേഷി നൽകുമെന്ന് വ്യവസായ നേതാക്കൾ വിശ്വസിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada to increase oil exports to US; Enbridge's $1.4 billion plan
