ഒട്ടാവ: കാനഡ, അമേരിക്ക, മെക്സിക്കോ എന്നീ രാജ്യങ്ങൾ തമ്മിലുള്ള സ്വതന്ത്ര വ്യാപാര കരാറായ ‘കുസ്മ’ (CUSMA) സംബന്ധിച്ച നിർണ്ണായകമായ പുനപ്പരിശോധനാ ചർച്ചകൾ അടുത്ത വർഷം ജനുവരി പകുതിയോടെ ആരംഭിക്കും. 2026-ൽ കരാർ കാലാവധി സംബന്ധിച്ച അന്തിമ തീരുമാനമെടുക്കേണ്ട സാഹചര്യത്തിലാണ് ഇരുരാജ്യങ്ങളും ചർച്ചകൾക്ക് തുടക്കമിടുന്നത്. കനേഡിയൻ വ്യാപാര മന്ത്രി ഡൊമിനിക് ലെബ്ലാങ്ക് ജനുവരിയിൽ വാഷിംഗ്ടൺ സന്ദർശിച്ച് അമേരിക്കൻ പ്രതിനിധികളുമായി പ്രാഥമിക ചർച്ചകൾ നടത്തുമെന്ന് പ്രധാനമന്ത്രി മാർക്ക് കാർണി അറിയിച്ചു.
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ തിരിച്ചുവരവോടെ വ്യാപാര കരാറിന്റെ ഭാവിയിൽ അനിശ്ചിതത്വം നിലനിൽക്കുന്നുണ്ട്. കുസ്മ ഒരു ‘താത്കാലിക കരാർ’ മാത്രമാണെന്നും ഇതിന്റെ ദൗത്യം അവസാനിച്ചതായും ട്രംപ് നേരത്തെ സൂചിപ്പിച്ചിരുന്നു. കാനഡയിൽ നിന്നുള്ള പാലുൽപ്പന്നങ്ങൾ, തടി (Softwood lumber) തുടങ്ങിയവയുടെ ഇറക്കുമതിയിൽ നിലനിൽക്കുന്ന തർക്കങ്ങളും ഡിജിറ്റൽ സർവീസ് ടാക്സ് സംബന്ധിച്ച വിയോജിപ്പുകളും ചർച്ചകളിൽ അമേരിക്ക പ്രധാനമായും ഉന്നയിച്ചേക്കും. കരാർ പുതുക്കുന്നതിന് പകരം അത് റദ്ദാക്കാനോ അല്ലെങ്കിൽ പുതിയ ഉപാധികൾ വെക്കാനോ ഉള്ള സാധ്യതയും നിലനിൽക്കുന്നുണ്ട്.
കരാറിലെ വ്യവസ്ഥകൾ പ്രകാരം ആറ് വർഷത്തിലൊരിക്കൽ കരാർ പുനപ്പരിശോധിക്കേണ്ടതുണ്ട്. 2026 ജൂലൈയിലാണ് ഔദ്യോഗിക പുനപ്പരിശോധന നടക്കുക. ഈ ഘട്ടത്തിൽ കരാർ 16 വർഷത്തേക്ക് കൂടി നീട്ടണോ, അതോ പിൻവാങ്ങണോ എന്ന കാര്യത്തിൽ മൂന്ന് രാജ്യങ്ങളും ധാരണയിലെത്തണം. ചർച്ചകൾ പരാജയപ്പെട്ടാൽ കരാർ കാലാവധി അവസാനിക്കുന്നതിലേക്കോ അല്ലെങ്കിൽ എല്ലാ വർഷവും പുനപ്പരിശോധന വേണ്ടിവരുന്ന അനിശ്ചിതത്വത്തിലേക്കോ കാര്യങ്ങൾ നീങ്ങിയേക്കാം.
അമേരിക്കയുമായുള്ള വ്യാപാര യുദ്ധം ഒഴിവാക്കാൻ ഊർജ്ജ മേഖലയെയും ധാതുസമ്പത്തിനെയും (Critical Minerals) പ്രതിരോധ കവചമാക്കാനാണ് കാനഡയുടെ നീക്കം. ആർട്ടിഫിഷ്യൽ ഇന്റലിജൻസ് (AI) മേഖലയിലെ ഡാറ്റാ സെന്ററുകൾക്കായി അമേരിക്കയ്ക്ക് വൻതോതിൽ ഊർജ്ജം ആവശ്യമാണ്. കൂടാതെ ചൈനയെ ആശ്രയിക്കാതെ പ്രധാന ധാതുക്കൾ ലഭ്യമാക്കാൻ കാനഡയ്ക്ക് സാധിക്കുമെന്നതും ചർച്ചകളിൽ കാനഡയ്ക്ക് മുൻതൂക്കം നൽകുന്ന ഘടകങ്ങളാണ്.
അമേരിക്കയിലെ ഭൂരിഭാഗം വ്യവസായികളും നിലവിലുള്ള കരാർ തുടരണമെന്ന ആഗ്രഹമുള്ളവരാണ്. കരാർ റദ്ദാക്കുന്നത് സാമ്പത്തിക തകർച്ചയ്ക്ക് കാരണമാകുമെന്ന് പല ബിസിനസ് ഗ്രൂപ്പുകളും മുന്നറിയിപ്പ് നൽകിയിട്ടുണ്ട്. എങ്കിലും ട്രംപ് ഭരണകൂടം മുന്നോട്ട് വെക്കുന്ന പുതിയ നിബന്ധനകൾ കാനഡയുടെ സമ്പദ്വ്യവസ്ഥയെ എങ്ങനെ ബാധിക്കുമെന്നത് ജനുവരിയിൽ നടക്കുന്ന ചർച്ചകൾക്ക് ശേഷമേ വ്യക്തമാകൂ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
CUSMA agreement review: Canada set to begin official talks with US in January
