ഒട്ടാവ: കാനഡയിലേക്ക് കുടിയേറാൻ ആഗ്രഹിക്കുന്ന പ്രൊഫഷണലുകൾക്ക് നിർണ്ണായകമാകുന്ന പുതിയ പരിഷ്കാരങ്ങൾ എക്സ്പ്രസ് എൻട്രി (Express Entry) സംവിധാനത്തിൽ നടപ്പിലാക്കാൻ ഒരുങ്ങി ഫെഡറൽ സർക്കാർ. കാനഡയിലെ തൊഴിൽ പരിചയത്തേക്കാൾ, അപേക്ഷകന്റെ പ്രവൃത്തിപരിചയത്തിനും അവർക്ക് ലഭിക്കുന്ന ഉയർന്ന ശമ്പളത്തിനും കൂടുതൽ മുൻഗണന നൽകുന്ന രീതിയിലേക്കാണ് മാറ്റങ്ങൾ വിഭാവനം ചെയ്യുന്നത്. നിലവിലുള്ള സങ്കീർണ്ണമായ പല നിബന്ധനകളും ഒഴിവാക്കി കുടിയേറ്റ നടപടികൾ കൂടുതൽ ലളിതമാക്കാനാണ് ഇമിഗ്രേഷൻ വിഭാഗമായ ഐ.ആർ.സി.സി (IRCC) ലക്ഷ്യമിടുന്നത്.
നിലവിൽ എക്സ്പ്രസ് എൻട്രിക്ക് കീഴിലുള്ള ഫെഡറൽ സ്കിൽഡ് വർക്കർ (FSWP), കനേഡിയൻ എക്സ്പീരിയൻസ് ക്ലാസ് (CEC), ഫെഡറൽ സ്കിൽഡ് ട്രേഡ്സ് (FSTP) എന്നീ മൂന്ന് പ്രോഗ്രാമുകളെയും ലയിപ്പിച്ച് ഒരൊറ്റ സ്ട്രീമാക്കി മാറ്റാനാണ് ആലോചന. ഇതോടെ എല്ലാ അപേക്ഷകർക്കും ഏകീകൃതമായ യോഗ്യതാ മാനദണ്ഡങ്ങൾ നിലവിൽ വരും. കഴിഞ്ഞ മൂന്ന് വർഷത്തിനിടെ ഒരു വർഷത്തെ പ്രവൃത്തിപരിചയമാണ് പ്രധാന മാനദണ്ഡം. ഇത് കാനഡയിലെയോ വിദേശത്തെയോ ആകാം എന്നതാണ് പുതിയ നിർദ്ദേശത്തിലെ ഏറ്റവും വലിയ ആകർഷണം. ഇതോടെ ഇന്ത്യയടക്കമുള്ള രാജ്യങ്ങളിൽ നിന്ന് നേരിട്ട് അപേക്ഷിക്കുന്നവർക്ക് കാനഡയിലുള്ളവർക്ക് ലഭിക്കുന്ന അതേ പരിഗണന ലഭിക്കും.
അപേക്ഷകരുടെ റാങ്കിങ് നിശ്ചയിക്കുന്ന കോംപ്രിഹെൻസീവ് റാങ്കിങ് സിസ്റ്റത്തിൽ (CRS) അടിമുടി മാറ്റങ്ങളാണ് നിർദ്ദേശിക്കപ്പെട്ടിട്ടുള്ളത്. ഇതിൽ പ്രധാനം ‘ഹൈ വേജ് ഓക്യുപേഷൻ’ (High Wage Occupation) എന്ന പുതിയ ഘടകമാണ്. രാജ്യത്തെ ശരാശരി വേതനത്തേക്കാൾ കൂടുതൽ ശമ്പളം ലഭിക്കുന്ന തസ്തികകളിൽ ജോലി ചെയ്യുന്നവർക്ക് കൂടുതൽ പോയിന്റുകൾ ലഭിക്കും. എൻജിനീയർമാർ, ഡോക്ടർമാർ, പ്രൊഫസർമാർ തുടങ്ങിയ ഉയർന്ന ശമ്പളമുള്ള വിഭാഗങ്ങൾക്ക് ഇത് ഗുണകരമാകും. അതേസമയം, കാനഡയിലുള്ള സഹോദരങ്ങൾ, കാനഡയിലെ പഠനം, ഫ്രഞ്ച് ഭാഷാ വൈദഗ്ധ്യം എന്നിവയ്ക്ക് നിലവിൽ നൽകുന്ന അധിക പോയിന്റുകൾ ഒഴിവാക്കാനോ പരിമിതപ്പെടുത്താനോ സാധ്യതയുണ്ട്.
പുതിയ നിയമപ്രകാരം എല്ലാ അപേക്ഷകർക്കും കനേഡിയൻ ലാംഗ്വേജ് ബെഞ്ച്മാർക്ക് (CLB) 6 നിർബന്ധമാക്കും. മുൻപ് തൊഴിൽ മേഖലയനുസരിച്ച് ഇതിൽ ഇളവുകൾ ഉണ്ടായിരുന്നു. അതുപോലെ, എല്ലാ അപേക്ഷകർക്കും കുറഞ്ഞത് ഹൈസ്കൂൾ ഡിപ്ലോമയും അതിന്റെ ഇക്വിവലൻസി സർട്ടിഫിക്കറ്റും (ECA) നിർബന്ധമാക്കും. ഫെഡറൽ സ്കിൽഡ് വർക്കർ പ്രോഗ്രാമിലെ 67 പോയിന്റ് ഗ്രിഡ് സമ്പ്രദായം പൂർണ്ണമായും നിർത്തലാക്കാനും ഐ.ആർ.സി.സി ആലോചിക്കുന്നുണ്ട്.
ഐ.ആർ.സി.സി അടുത്തിടെ പുറത്തുവിട്ട 2026-2028 റെഗുലേറ്ററി പ്ലാനിലാണ് ഈ നിർദ്ദേശങ്ങൾ ഉള്ളത്. ഇത് സംബന്ധിച്ച ഔദ്യോഗിക ചർച്ചകൾ 2026 വസന്തകാലത്ത് (Spring 2026) പൊതുജനങ്ങൾക്കും സ്റ്റേക്ക് ഹോൾഡർമാർക്കും ഇടയിൽ നടക്കും. ഇതിനുശേഷമായിരിക്കും അന്തിമ വിജ്ഞാപനം പുറത്തിറങ്ങുക. കാനഡയിലെ തൊഴിൽ വിപണിക്ക് അനുയോജ്യമായ രീതിയിൽ ഏറ്റവും മികച്ച പ്രൊഫഷണലുകളെ തിരഞ്ഞെടുക്കുക എന്ന ലക്ഷ്യത്തോടെയാണ് ഈ മാറ്റങ്ങൾ. കൂടുതൽ സുതാര്യവും ലളിതവുമായ ഈ സംവിധാനം നിലവിൽ വരുന്നതോടെ വിദേശ രാജ്യങ്ങളിൽ നിന്നുള്ള വിദഗ്ധ തൊഴിലാളികൾക്ക് കാനഡയിലേക്കുള്ള വഴി കൂടുതൽ എളുപ്പമാകും.
Canada PR: Priority given to high-wage earners, drastic change in Express Entry
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
