കാനഡ പി.ആർ അപേക്ഷകർ ശ്രദ്ധിക്കുക; എൻ.ഒ.സി കോഡ് തിരഞ്ഞെടുക്കുമ്പോൾ ഈ പിഴവുകൾ സംഭവിച്ചാൽ അപേക്ഷ തള്ളിയേക്കാം

ഒട്ടാവ: കാനഡയിലേക്കുള്ള സ്ഥിരതാമസത്തിനായുള്ള (PR) അപേക്ഷകളിൽ തൊഴിൽ പരിചയം രേഖപ്പെടുത്തുമ്പോൾ വരുത്തുന്ന പിഴവുകൾ വിസ നിഷേധിക്കപ്പെടാൻ കാരണമാകുന്നതായി റിപ്പോർട്ട്. കുടിയേറ്റ നടപടികളിലെ നിർണ്ണായക ഘടകമായ നാഷണൽ ഒക്യുപ്പേഷണൽ ക്ലാസിഫിക്കേഷൻ (NOC) കോഡ് തിരഞ്ഞെടുക്കുന്നതിൽ അപേക്ഷകർ പുലർത്തുന്ന അശ്രദ്ധ അപേക്ഷകൾ തള്ളപ്പെടാനും, ചില സാഹചര്യങ്ങളിൽ ആജീവനാന്ത വിലക്കിനും (Misrepresentation) കാരണമായേക്കാം.

കാനഡയുടെ എക്സ്പ്രസ് എൻട്രി, പ്രൊവിൻഷ്യൽ നോമിനി പ്രോഗ്രാം (PNP) തുടങ്ങിയവയിൽ യോഗ്യത നിർണ്ണയിക്കുന്നത് അപേക്ഷകൻ നൽകുന്ന എൻ.ഒ.സി കോഡിന്റെ അടിസ്ഥാനത്തിലാണ്. വിദഗ്ധരായ കുടിയേറ്റ അഭിഭാഷകരുടെ വിലയിരുത്തലിൽ അപേക്ഷകർ പ്രധാനമായും അഞ്ച് മേഖലകളിലാണ് അബദ്ധങ്ങൾ വരുത്തുന്നത്.

ജോലിയുടെ പേരും ഉത്തരവാദിത്തങ്ങളും
പലപ്പോഴും തങ്ങളുടെ ഔദ്യോഗിക പദവി (Job Title) മാത്രം നോക്കി എൻ.ഒ.സി കോഡ് തിരഞ്ഞെടുക്കുന്നതാണ് അപേക്ഷകർ വരുത്തുന്ന ആദ്യത്തെ പിഴവ്. ഒരേ ജോലിപ്പേരിലുള്ള വ്യക്തികൾ വിവിധ രാജ്യങ്ങളിലും കമ്പനികളിലും വ്യത്യസ്ത ജോലികളായിരിക്കും ചെയ്യുന്നത്. അതിനാൽ, തസ്തികയ്ക്ക് പകരം തങ്ങൾ യഥാർത്ഥത്തിൽ ചെയ്യുന്ന ജോലികളും ഉത്തരവാദിത്തങ്ങളും (Job Duties) എൻ.ഒ.സി വെബ്സൈറ്റിലെ വിവരണങ്ങളുമായി 70 മുതൽ 80 ശതമാനം വരെ യോജിക്കുന്നുണ്ടെന്ന് ഉറപ്പുവരുത്തണം.

ടീയർ (TEER) നിലവാരം
വിദ്യാഭ്യാസവും നൈപുണ്യവും അടിസ്ഥാനമാക്കി തൊഴിലുകളെ തരംതിരിക്കുന്ന സംവിധാനമാണ് ടീയർ. എക്സ്പ്രസ് എൻട്രി പോലുള്ള പ്രോഗ്രാമുകളിൽ ടീയർ 0, 1, 2, 3 വിഭാഗങ്ങളിൽപ്പെടുന്ന ജോലികൾക്കാണ് മുൻഗണന. എന്നാൽ കൂടുതൽ നൈപുണ്യമുള്ള ജോലിയാണെന്ന് കാണിക്കാനായി തെറ്റായ ടീയർ കോഡ് നൽകുന്നത് നിയമവിരുദ്ധമാണ്. രേഖാമൂലം തെളിയിക്കാൻ കഴിയുന്ന യഥാർത്ഥ പ്രവൃത്തിപരിചയം മാത്രമേ അപേക്ഷയിൽ നൽകാവൂ.

തൊഴിൽ സർട്ടിഫിക്കറ്റിലെ പോരായ്മകൾ
മുൻ തൊഴിലുടമകളിൽ നിന്ന് ലഭിക്കുന്ന എക്സ്പീരിയൻസ് ലെറ്ററുകളിൽ ജോലിയുടെ സ്വഭാവം വ്യക്തമാക്കാത്തത് തിരിച്ചടിയാകുന്നുണ്ട്. വെറും പദവിയും കാലയളവും മാത്രം രേഖപ്പെടുത്തിയ സർട്ടിഫിക്കറ്റുകൾ ഉദ്യോഗസ്ഥർക്ക് അപേക്ഷകന്റെ പ്രവൃത്തിപരിചയം ബോധ്യപ്പെടാൻ സഹായകമാകില്ല. ശമ്പളം, ജോലി സമയം, ഉത്തരവാദിത്തങ്ങൾ എന്നിവ കൃത്യമായി വ്യക്തമാക്കുന്ന സർട്ടിഫിക്കറ്റുകളാണ് സമർപ്പിക്കേണ്ടത്.

എക്സ്ക്ലൂഷൻ (Exclusion) വിഭാഗം
ഓരോ എൻ.ഒ.സി കോഡിന് താഴെയും ആ വിഭാഗത്തിൽ ഉൾപ്പെടാത്ത സമാനമായ മറ്റ് ജോലികളെക്കുറിച്ച് ‘എക്സ്ക്ലൂഷൻ’ എന്ന ഭാഗത്ത് സൂചിപ്പിച്ചിട്ടുണ്ടാകും. ഇത് ശ്രദ്ധിക്കാതെ സമാനമായ പേരുള്ള തെറ്റായ കോഡ് തിരഞ്ഞെടുക്കുന്നത് അപേക്ഷ നിരസിക്കപ്പെടാൻ ഇടയാക്കും. വെബ്സൈറ്റിലെ നിർദ്ദേശങ്ങൾ കൃത്യമായി വായിച്ചുമാത്രമേ അന്തിമ തീരുമാനം എടുക്കാവൂ.

കൂടാതെ, അപേക്ഷയുടെ വിവിധ ഘട്ടങ്ങളിൽ നൽകുന്ന വിവരങ്ങൾ തമ്മിലുള്ള വൈരുദ്ധ്യവും പ്രശ്നങ്ങൾ സൃഷ്ടിക്കുന്നുണ്ട്. ജോലി തുടങ്ങിയ തീയതി, ശമ്പളം, പദവി എന്നിവ എല്ലാ രേഖകളിലും ഒരേപോലെയാണെന്ന് അപേക്ഷകർ ഉറപ്പുവരുത്തണമെന്ന് വിദഗ്ധർ നിർദ്ദേശിക്കുന്നു.

ഒരു അം​ഗീകൃത ഇമി​ഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Canada PR applicants, be careful; when choosing a NOC code, you can avoid getting a job.