കാനഡ പോസ്റ്റിലെ യൂണിയൻ തൊഴിലാളികൾ മാനേജ്മെന്റ് മുന്നോട്ടുവെച്ച അന്തിമ ഓഫറുകൾ തള്ളിയതോടെ ഇനി എന്ത് സംഭവിക്കുമെന്ന ആകാംഷയിലാണ് എല്ലാവരും. പോസ്റ്റൽ സേവന രംഗത്ത് വീണ്ടുമൊരു പണിമുടക്കിന് സാധ്യതയില്ലെന്നാണ് തൊഴിൽ വിദഗ്ദ്ധർ പറയുന്നത്. കാനഡ ഇൻഡസ്ട്രിയൽ റിലേഷൻസ് ബോർഡ് (സിഐആർബി) നടത്തിയ നിർബന്ധിത വോട്ടെടുപ്പിലാണ് ഭൂരിഭാഗം തൊഴിലാളികളും മാനേജ്മെൻ്റിൻ്റെ പുതിയ ഓഫറുകൾ തള്ളിയത്. കനേഡിയൻ യൂണിയൻ ഓഫ് പോസ്റ്റൽ വർക്കേഴ്സ് (CUPW) വെള്ളിയാഴ്ച പുറത്തുവിട്ട വിവരമനുസരിച്ച്, ഏകദേശം 55,000 തൊഴിലാളികളിൽ 68.5% ശതമാനം പേർ ഓഫറിനെ എതിർത്തു.
നാല് വർഷത്തിനുള്ളിൽ 13% ശമ്പള വർധനവും പാർട്ട് ടൈം ജീവനക്കാരെ ഉൾപ്പെടുത്താനുള്ള നിർദേശങ്ങളുമാണ് കാനഡ പോസ്റ്റ് മുന്നോട്ടുവെച്ചിരുന്നത്.
ഈ വിഷയത്തിൽ കാനഡ പോസ്റ്റ് നിരാശ പ്രകടിപ്പിച്ചപ്പോൾ, ചർച്ചകൾക്ക് തയ്യാറാണെന്ന് സി.യു.പി.ഡബ്ല്യു. യൂണിയൻ പ്രതികരിച്ചു. അതേസമയം, മെയ് മാസം മുതൽ യൂണിയൻ പ്രഖ്യാപിച്ചിട്ടുള്ള ഓവർടൈം നിരോധനം തുടരും. കഴിഞ്ഞ ഒന്നര വർഷമായി പുതിയ കരാറിനെക്കുറിച്ചുള്ള ചർച്ചകൾ നടന്നുവരികയാണ്. കഴിഞ്ഞ അവധിക്കാലത്ത് പണിമുടക്ക് ഒഴിവാക്കാൻ സർക്കാർ സിഐആർബി യെ സമീപിച്ചിരുന്നു.
മാഞ്ചസ്റ്റർ സർവകലാശാലയിലെ ലേബർ സ്റ്റഡീസ് അസിസ്റ്റന്റ് പ്രൊഫസറായ ആദം കിംഗിൻ്റെ അഭിപ്രായത്തിൽ, സർക്കാർ നിർദേശിച്ച നിർബന്ധിത വോട്ടെടുപ്പ് വെറുമൊരു താൽകാലിക ശ്രദ്ധ മാറ്റൽ മാത്രമാണ്. കാനഡ പോസ്റ്റ് മാനേജ്മെന്റ് തൊഴിലാളികൾ അംഗീകരിക്കുന്ന തരത്തിലുള്ള പുതിയ നിർദേശങ്ങളുമായി എത്തുമെന്നാണ് അദ്ദേഹം പ്രതീക്ഷിക്കുന്നത്. എന്നാൽ വോട്ടെടുപ്പിൽ 30% പേർ അനുകൂലിച്ചതിനാൽ തൊഴിലാളികൾക്കിടയിൽ ഭിന്നതയുണ്ടെന്ന് ബ്രോക്ക് യൂണിവേഴ്സിറ്റി പ്രൊഫസർ ലാറി സാവേജ് ചൂണ്ടിക്കാട്ടി.
പുതിയ കരാർ സംബന്ധിച്ചുള്ള അനിശ്ചിതത്വം ഓരോ ദിവസവും ദശലക്ഷക്കണക്കിന് ഡോളറിൻ്റെ നഷ്ടമുണ്ടാക്കുന്നുണ്ടെന്ന് കാനഡ പോസ്റ്റ് മുന്നറിയിപ്പ് നൽകിയിരുന്നു. ഇത് എതിരാളികൾക്ക് നേട്ടമാകുമെന്നും അവർ പറയുന്നു. നിലവിലെ പ്രശ്നങ്ങൾ അവസാനിച്ചാലും, കാനഡ പോസ്റ്റിൻ്റെ ഭാവിയെക്കുറിച്ച് സർക്കാർ പുനരാലോചനകൾക്ക് സാധ്യതയുണ്ടെന്ന് സാവേജ് പറഞ്ഞു. ഡയറക്ടർ ടു ഡയറക്ടർ ഡെലിവറി നിർത്തലാക്കുക, കമ്മ്യൂണിറ്റി മെയിൽ ബോക്സുകൾ വികസിപ്പിക്കുക തുടങ്ങിയ നിർദേശങ്ങൾ ഇതിൽ ഉൾപ്പെട്ടേക്കാം.
കാനഡ പോസ്റ്റ് മാനേജ്മെൻ്റിൻ്റെ നീക്കം പരാജയപ്പെട്ടെങ്കിലും അവർക്ക് ഇപ്പോഴും പല സാധ്യതകളുണ്ടെന്ന് സാവേജ് പറയുന്നു. കരാർ വ്യവസ്ഥകൾ ഏകപക്ഷീയമായി നടപ്പാക്കി പണിമുടക്കാൻ യൂണിയനെ വെല്ലുവിളിക്കുകയോ അല്ലെങ്കിൽ സാമ്പത്തികമായി പിന്നോട്ട് പോകുന്നതിനാൽ ജീവനക്കാരെ പിരിച്ചുവിടാൻ ശ്രമിക്കുകയോ ചെയ്യാം. ഇത് യൂണിയനെ സമ്മർദ്ദത്തിലാക്കുമെന്ന് അദ്ദേഹം അഭിപ്രായപ്പെട്ടു. എന്നാൽ ഇത്തരം സമീപനങ്ങൾ ഇരു കൂട്ടരെയും തമ്മിൽ കൂടുതൽ അകറ്റുമെന്നും അദ്ദേഹം കൂട്ടിച്ചേർത്തു. എത്രയും വേഗം ചർച്ചകൾ പുനരാരംഭിച്ച് ഒരു തീരുമാനത്തിലെത്തുമെന്ന് പ്രതീക്ഷിക്കുന്നതായി ജോബ്സ് മന്ത്രി പാറ്റി ഹജ്ദു പ്രസ്താവനയിൽ അറിയിച്ചു.
