ക്രിസ്മസ് തിരക്കിനെ നേരിടാൻ കാനഡ പോസ്റ്റ് റെഡി; തപാൽ വിതരണം ഇനി വേഗത്തിൽ

ഒട്ടാവ: കഴിഞ്ഞ വർഷത്തെ പണിമുടക്കുകൾ സൃഷ്ടിച്ച പ്രതിസന്ധികൾ മറികടന്ന്, ഈ വർഷത്തെ ഉത്സവകാല തിരക്ക് കൈകാര്യം ചെയ്യാൻ തങ്ങൾ പൂർണ്ണ സജ്ജരാണെന്ന് അറിയിച്ച് കാനഡ പോസ്റ്റ് . ദീർഘകാലമായി നിലനിന്നിരുന്ന തൊഴിൽ തർക്കങ്ങളിൽ ധാരണയായതോടെ, കത്തുകളും പാഴ്സലുകളും തടസ്സമില്ലാതെ വിതരണം ചെയ്യാനാവുമെന്ന ആത്മവിശ്വാസത്തിലാണ് അധികൃതർ. ചൊവ്വാഴ്ച പുറത്തിറക്കിയ ഔദ്യോഗിക പ്രസ്താവനയിലൂടെയാണ് കാനഡ പോസ്റ്റ് ഇക്കാര്യം വ്യക്തമാക്കിയത്.

നിലവിൽ രാജ്യത്തെ തപാൽ വോളിയം സാധാരണ നിലയിലാണെന്നും പുതിയ ഓർഡറുകൾ സുരക്ഷിതമായും വേഗത്തിലും പ്രോസസ്സ് ചെയ്ത് വിതരണം ചെയ്യുന്നുണ്ടെന്നും അധികൃതർ അറിയിച്ചു. ബിസിനസ് സ്ഥാപനങ്ങൾക്കും പൊതുജനങ്ങൾക്കും ഏറ്റവും തിരക്കേറിയ ഈ സീസണിൽ തങ്ങളുടെ സേവനം പൂർണ്ണ പിന്തുണ നൽകുമെന്ന് കാനഡ പോസ്റ്റ് വക്താവ് ലിസ ലിയു അറിയിച്ചു. തപാൽ പാഴ്സലുകൾ സ്വീകരിക്കുന്നതും പിക്കപ്പുകൾ നടത്തുന്നതും നിലവിൽ തടസ്സമില്ലാതെ തുടരുകയാണെന്നും അദ്ദേഹം കൂട്ടിച്ചേർത്തു.

കഴിഞ്ഞ കുറെ വർഷങ്ങളായി ശമ്പളം കൂട്ടുന്നതിനെക്കുറിച്ചും ജോലിസ്ഥലത്തെ നിയമങ്ങളെക്കുറിച്ചും കാനഡ പോസ്റ്റും അവിടുത്തെ തൊഴിലാളി യൂണിയനും (CUPW) തമ്മിൽ വലിയ അഭിപ്രായവ്യത്യാസങ്ങൾ ഉണ്ടായിരുന്നു. ഇതിനെത്തുടർന്ന് കഴിഞ്ഞ വർഷം ക്രിസ്മസ്-ന്യൂ ഇയർ സമയത്ത് നടന്ന പണിമുടക്ക് സാധനങ്ങളുടെ വിതരണത്തെ കാര്യമായി ബാധിച്ചു. കഴിഞ്ഞ മാസമാണ് ഇരുകൂട്ടരും പുതിയ കരാറുകളിൽ ഏകദേശ ധാരണയിലെത്തിയത്. കരാറിന്റെ കാര്യങ്ങൾ പൂർണ്ണമായി തീരുമാനിക്കുന്നത് വരെ സമര പരിപാടികൾ തൽക്കാലം നിർത്തിവെച്ചിരിക്കുകയാണ്.

ആഴ്ചയിൽ ഏഴു ദിവസവും വിതരണം ഉറപ്പാക്കുക, പാർട്ട് ടൈം ജീവനക്കാരുടെ എണ്ണം വർദ്ധിപ്പിക്കുക തുടങ്ങിയ പരിഷ്കാരങ്ങളെ ചൊല്ലിയായിരുന്നു പ്രധാനമായും തർക്കങ്ങൾ നിലനിന്നിരുന്നത്. പ്രശ്നപരിഹാരത്തിനായി ഫെഡറൽ സർക്കാർ ഇടപെടുകയും ഇൻഡസ്ട്രിയൽ ഇൻക്വയറി കമ്മീഷനെ നിയോഗിക്കുകയും ചെയ്തിരുന്നു. നിലവിൽ 55,000 ഓളം ജീവനക്കാരെ പ്രതിനിധീകരിക്കുന്ന യൂണിയൻ വിട്ടുവീഴ്ചകൾക്ക് തയ്യാറായതോടെയാണ് വിതരണ മേഖല സാധാരണ നിലയിലേക്ക് മടങ്ങിയത്.

കാനഡയ്ക്കകത്തും അന്താരാഷ്ട്ര തലത്തിലുമുള്ള വിതരണ സേവനങ്ങളെക്കുറിച്ച് എന്തെങ്കിലും മാറ്റങ്ങളുണ്ടോ എന്നറിയാൻ ഉപഭോക്താക്കൾ വെബ്സൈറ്റ് സന്ദർശിക്കണമെന്ന് അധികൃതർ നിർദ്ദേശിച്ചു. ഓൺലൈൻ ഷോപ്പിംഗ് നടത്തുന്നവർ റീട്ടെയിലർമാരുടെ ഷിപ്പിംഗ് വിവരങ്ങൾ പ്രത്യേകം പരിശോധിക്കണമെന്നും ലിസ ലിയു കൂട്ടിച്ചേർത്തു. കഴിഞ്ഞ വർഷത്തെ അപേക്ഷിച്ച് ഈ വർഷം തപാൽ പാഴ്സലുകൾ കൃത്യസമയത്ത് കൈകളിൽ എത്തുമെന്ന ഉറപ്പാണ് അധികൃതർ നൽകുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Canada Post is ready to handle the Christmas rush; mail delivery will now be faster