ഒട്ടാവ: കാനഡയുടെ സമ്പദ്വ്യവസ്ഥ കടുത്ത സമ്മർദ്ദം നേരിടുന്ന സാഹചര്യത്തിൽ, അമേരിക്കയെ അമിതമായി ആശ്രയിക്കാതെ പുതിയ കയറ്റുമതി വിപണികൾ കണ്ടെത്താനുള്ള ശ്രമങ്ങൾ ഊർജിതമാക്കാൻ കാനഡ. താരിഫ് സമ്മർദ്ദങ്ങളും വ്യാപാര സംഘർഷങ്ങളും രാജ്യത്തെ വാഹന വ്യവസായ മേഖലയെ ഉൾപ്പെടെ പ്രതികൂലമായി ബാധിച്ച പശ്ചാത്തലത്തിലാണ് ഈ നീക്കം.
നിലവിലെ സാമ്പത്തിക പ്രതിസന്ധിയുടെ ആഘാതം വ്യക്തമാക്കിക്കൊണ്ട് ഒഷാവയിലെ ജി.എം. (GM) പ്ലാന്റിൽ നിന്ന് 500 തൊഴിലാളികളെ പിരിച്ചുവിട്ടു. നാലാം പാദത്തിലെ മൊത്ത ആഭ്യന്തര ഉൽപ്പാദനത്തിൽ (GDP) ഇടിവ് രേഖപ്പെടുത്തിയത് സ്ഥിതി കൂടുതൽ സങ്കീർണ്ണമാക്കിയിട്ടുണ്ട്. അടുത്ത അഞ്ച് വർഷത്തിനുള്ളിൽ ആഗോള വിപണികളുമായുള്ള വ്യാപാരം വർധിപ്പിക്കാനും, ആഭ്യന്തര വിപണി ശക്തിപ്പെടുത്തി ഒരു ട്രില്യൺ ഡോളർ വരെ നിക്ഷേപം ആകർഷിക്കാനുമാണ് സർക്കാർ ലക്ഷ്യമിടുന്നത്. എന്നാൽ ഇത്തരം മാറ്റങ്ങൾ പ്രായോഗികമാകാൻ സമയമെടുക്കുമെന്നതാണ് പ്രധാന വെല്ലുവിളി.
വ്യാപാര വൈവിധ്യവൽക്കരണത്തിന്റെ ഭാഗമായി ദക്ഷിണ കൊറിയയുമായി രാജ്യം ധാരണാപത്രം ഒപ്പുവച്ചിട്ടുണ്ട്. എന്നാൽ കാനഡയിൽ പുതിയ വാഹന നിർമ്മാണ പ്ലാന്റ് തുടങ്ങുന്ന കാര്യത്തിൽ ഹ്യൂണ്ടായി (Hyundai) കമ്പനി ഇതുവരെ ഉറപ്പ് നൽകിയിട്ടില്ല. നിലവിൽ ഹൈഡ്രജൻ എനർജി മേഖലയിലുള്ള സഹകരണം മാത്രമാണ് കമ്പനി പരിഗണിക്കുന്നത്. പുതിയ വിപണികൾ കണ്ടെത്താനും വിതരണ ശൃംഖലകൾ പുനഃക്രമീകരിക്കാനും വലിയ തോതിലുള്ള സമയവും അടിസ്ഥാന സൗകര്യ വികസനവും ആവശ്യമാണെന്ന് ബാങ്ക് ഓഫ് കാനഡ വിലയിരുത്തുന്നു.
തുറമുഖങ്ങൾ, റെയിൽവേ, ലോജിസ്റ്റിക്സ് സംവിധാനങ്ങൾ എന്നിവ വിപുലീകരിക്കാതെ കയറ്റുമതി ലക്ഷ്യങ്ങൾ കൈവരിക്കാനാകില്ലെന്ന് വ്യവസായ വിദഗ്ധർ ചൂണ്ടിക്കാട്ടുന്നു. അടിസ്ഥാന സൗകര്യ പദ്ധതികൾക്ക് അനുമതി ലഭിക്കുന്നതിലെ കാലതാമസവും തിരിച്ചടിയാണ്. പുതിയ വിപണികൾ തേടുമ്പോഴും അമേരിക്കയുമായുള്ള കാനഡ-യു.എസ്.-മെക്സിക്കോ വ്യാപാര കരാർ (CUSMA) സംരക്ഷിക്കുന്നതിനാണ് പ്രഥമ പരിഗണന നൽകേണ്ടതെന്ന് തൊഴിലാളി യൂണിയനുകളും വ്യവസായ പ്രതിനിധികളും ആവശ്യപ്പെടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Economic crisis: Canada seeks new markets; moves to reduce US dependence
