ഒട്ടാവ: കാനഡയുടെ പൗരത്വ നിയമത്തിൽ ഭേദഗതി വരുത്തുന്നതിനുള്ള സമയപരിധി 2026 ജനുവരി 20 വരെ നീട്ടി ഓന്റാരിയോ സുപ്പീരിയർ കോർട്ട് ഓഫ് ജസ്റ്റിസ് ഉത്തരവിട്ടു. നേരത്തെ 2025 നവംബർ 20 ആയിരുന്നു സമയപരിധി. ഫസ്റ്റ്-ജനറേഷൻ ലിമിറ്റ് (FGL) എന്ന നിയമം നീക്കം ചെയ്യുന്ന ബിൽ C-3 പാർലമെൻ്റിൽ പാസാക്കുന്നതിന് കൂടുതൽ സമയം ആവശ്യമാണെന്ന ഫെഡറൽ സർക്കാരിൻ്റെ അഭ്യർത്ഥന മാനിച്ചാണ് കോടതി രണ്ട് മാസത്തെ ഇളവ് അനുവദിച്ചത്.
വിദേശത്ത് ജനിച്ച കനേഡിയൻ പൗരന്മാർക്ക് അവരുടെ വിദേശത്ത് ജനിക്കുന്ന കുട്ടികൾക്ക് പൗരത്വം കൈമാറുന്നതിൽ തടസ്സം സൃഷ്ടിക്കുന്ന നിലവിലെ നിയമം ഭരണഘടനാ വിരുദ്ധമാണ് എന്ന് കോടതി 2023-ൽ കണ്ടെത്തിയിരുന്നു. ഈ നിയമം കനേഡിയൻ പൗരന്മാരെ രണ്ട് തരം പൗരന്മാരായി കണക്കാക്കുന്നതിനും, കനേഡിയൻ ചാർട്ടർ ഓഫ് റൈറ്റ്സ് ആൻഡ് ഫ്രീഡംസ് പ്രകാരമുള്ള സഞ്ചാര സ്വാതന്ത്ര്യത്തെ (Mobility Rights) ലംഘിക്കുന്നതിനും കാരണമാകുന്നു. ഈ കോടതിവിധിയോട് പ്രതികരിക്കാനായാണ് സർക്കാർ ബിൽ C-3 അവതരിപ്പിച്ചത്.
ബിൽ C-3 പാർലമെന്റിൽ കാര്യമായ പുരോഗതി നേടിയിട്ടുണ്ട്. ഇത് ജനപ്രതിനിധി സഭയിൽ (House of Commons) മൂന്ന് തവണയും സെനറ്റിൽ രണ്ട് തവണയും വായിച്ചു കഴിഞ്ഞു. നിലവിൽ ഇത് സാമൂഹ്യകാര്യങ്ങൾ, ശാസ്ത്രം, സാങ്കേതികവിദ്യ എന്നിവയ്ക്കായുള്ള സ്റ്റാൻഡിംഗ് കമ്മിറ്റിയുടെ (Standing Committee on Social Affairs, Science and Technology) പരിഗണനയിലാണ്. നിയമ നിർമ്മാണത്തിൽ ഗണ്യമായ പുരോഗതിയുണ്ടെന്നും 2025 അവസാനത്തോടെ ബിൽ നിയമമാകും എന്ന് ന്യായമായും പ്രതീക്ഷിക്കാമെന്നും ജഡ്ജ് അക്ബറലി അഭിപ്രായപ്പെട്ടു.
ബിൽ നിയമമായാൽ, വിദേശത്ത് ജനിച്ച കനേഡിയൻ പൗരന്മാർക്ക് അവരുടെ കുട്ടികൾക്ക് പൗരത്വം കൈമാറാൻ സാധിക്കും. എന്നാൽ, ‘സബ്സ്റ്റാൻഷ്യൽ കണക്ഷൻ ടെസ്റ്റ്’ (Substantial Connection Test) എന്ന വ്യവസ്ഥയ്ക്ക് വിധേയമായിട്ടായിരിക്കും ഇത്. അതായത്, വിദേശത്ത് ജനിച്ച കനേഡിയൻ മാതാപിതാക്കൾക്ക് കുട്ടിയുടെ ജനനത്തിന് മുമ്പ് കാനഡയിൽ 1,095 ദിവസത്തെ ഭൗതിക സാന്നിധ്യം ഉണ്ടായിരുന്നു എന്ന് തെളിയിക്കേണ്ടതുണ്ട്. ഈ മാറ്റം വഴി അപേക്ഷകരുടെ എണ്ണം “ലക്ഷങ്ങളല്ല, പതിനായിരങ്ങൾ” ആയിരിക്കുമെന്നാണ് ഇമിഗ്രേഷൻ മന്ത്രി അഭിപ്രായപ്പെട്ടത്.
സമയപരിധി നീട്ടിയ സാഹചര്യത്തിൽ, 2025 മാർച്ചിൽ പ്രഖ്യാപിച്ച താൽക്കാലിക നടപടികൾ സജീവമായി തുടരും. FGL നിയമത്തിൻ്റെ പരിധിയിൽ വന്ന വ്യക്തികൾക്ക് ഈ നടപടികൾ വഴി പൗരത്വത്തിനായി അപേക്ഷിക്കാൻ സാധിക്കും. 2023 ഡിസംബർ 19-ന് മുമ്പ് ജനിച്ചവർ, ദത്തെടുത്തവർ, പഴയ നിയമപ്രകാരം പൗരത്വം നഷ്ടമായവർ, 1949 ഏപ്രിൽ 1-ന് മുമ്പ് ജനിച്ച ചില വ്യക്തികൾ എന്നിവർക്ക് ഈ താൽക്കാലിക വ്യവസ്ഥകൾ പ്രകാരം പൗരത്വം ലഭിക്കാൻ അപേക്ഷിക്കാം.
പൗരത്വ നിയമവുമായി ബന്ധപ്പെട്ട് ഫെഡറൽ സർക്കാർ സമയപരിധി തെറ്റിക്കുന്നത് ഇത് നാലാം തവണയാണ്. എങ്കിലും, ബിൽ C-3 നിയമമാകുന്നതോടെ, പൗരത്വം നഷ്ടപ്പെട്ട നിരവധി പേർക്കും വിദേശത്ത് താമസിക്കുന്ന കനേഡിയൻ കുടുംബങ്ങൾക്കും തങ്ങളുടെ കുട്ടികൾക്ക് പൗരത്വം ഉറപ്പിക്കാൻ സാധിക്കും. മുൻപ് ലാപ്സായി പോയ ബിൽ C-71 ൻ്റെ തുടർച്ചയായിട്ടാണ് 2025 ജൂണിൽ ബിൽ C-3 അവതരിപ്പിച്ചത്.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Canada citizenship law changes: Deadline extended to remove ‘first-generation limit’; thousands guaranteed citizenship
