യു.എസ്-കാനഡ വ്യാപാരത്തർക്കം കാരണം നയാഗ്ര മേഖലയിൽ നിന്നുള്ള അമേരിക്കൻ വിനോദസഞ്ചാരികളുടെ എണ്ണത്തിൽ കുറവ് വന്നെങ്കിലും, മറ്റ് രാജ്യങ്ങളിൽ നിന്നുള്ള സന്ദർശകരുടെ എണ്ണത്തിലുള്ള വർധനവ് ഈ നഷ്ടം നികത്തിയതായി നയാഗ്ര ഫാൾസ് മേയർ ജിം ഡിയോഡാറ്റി അറിയിച്ചു. യൂറോപ്പ്, തെക്കേ അമേരിക്ക, മെക്സിക്കോ എന്നിവിടങ്ങളിൽനിന്നും കാനഡൻ സ്വദേശികളുമാണ് ഇപ്പോൾ നയാഗ്രയിലേക്ക് കൂടുതലായി എത്തുന്നത്. നിരവധി ആളുകൾ യു.എസ് ഒഴിവാക്കി കാനഡയിലേക്ക് യാത്ര ചെയ്യുവാൻ തിരഞ്ഞെടുക്കുന്നതായും മേയർ കൂട്ടിച്ചേർത്തു.
ഓരോ വർഷവും ഏകദേശം 1.4 കോടി സന്ദർശകർ നയാഗ്രയിൽ എത്തുന്നുണ്ട്. ഇതിൽ 25 ശതമാനം സാധാരണയായി അമേരിക്കൻ പൗരന്മാരാണ്. എന്നാൽ നിലവിലെ സാഹചര്യത്തിൽ അമേരിക്കയിൽ നിന്നുള്ള സന്ദർശകരുടെ എണ്ണത്തിൽ 10-15 ശതമാനത്തിൻ്റെ കുറവ് വന്നിട്ടുണ്ട്. ഈ സീസൺ അവസാനിക്കുമ്പോഴേക്കും കൃത്യമായ കണക്കുകൾ ലഭ്യമാവുകയുള്ളൂ എന്നും അധികൃതർ അറിയിച്ചു.
നയാഗ്രയിലെ ചില ബിസിനസ് സ്ഥാപനങ്ങൾക്ക് അമേരിക്കൻ സന്ദർശകരുടെ എണ്ണം കുറഞ്ഞിട്ടും വരുമാനത്തിൽ വർധനവുണ്ടായി. നയാഗ്ര ഫാൾസിലെ എവർഗ്രീൻ ത്രിഫ്റ്റ് സ്റ്റോർ ഉടമ നിക്കിന് കഴിഞ്ഞ വർഷത്തെ അപേക്ഷിച്ച് ഈ വർഷം 15 ശതമാനം അധിക വരുമാനമുണ്ട്. കാനഡയിലെ മറ്റു ഭാഗങ്ങളിൽ കാട്ടുതീ കാരണം വീടുകൾ ഉപേക്ഷിച്ചു വരേണ്ടി വന്നവർക്ക് നയാഗ്ര അഭയകേന്ദ്രമായതും വരുമാനം വർധിക്കാൻ കാരണമായതായി അദ്ദേഹം അഭിപ്രായപ്പെട്ടു.
ജോർദാൻ സ്റ്റേഷന് പുറത്തുള്ള പേൾ മോറിസെറ്റ് വൈനറിയിലും വിൽപ്പനയിൽ വലിയ വർധനവുണ്ടായി. യു.എസ്-കാനഡ വ്യാപാരത്തർക്കത്തിൻ്റെ ഭാഗമായി പല സന്ദർശകരും അമേരിക്കൻ ഉത്പന്നങ്ങൾ വാങ്ങുന്നത് ഒഴിവാക്കി പ്രാദേശിക ഉത്പന്നങ്ങൾ തിരഞ്ഞെടുക്കുന്നതാണ് ഇതിന് കാരണമെന്ന് വൈനറി സഹഉടമ ഡാനിയേൽ ഹദിദ പറഞ്ഞു. യു.എസ് ഡോളറിൻ്റെ മൂല്യം കാനഡയിൽ കൂടുതലായതിനാൽ അമേരിക്കൻ സന്ദർശകരുടെ എണ്ണത്തിൽ ഹദിദയുടെ റെസ്റ്റോറന്റിൽ വർധനവുണ്ടായെന്നും അദ്ദേഹം കൂട്ടിച്ചേർത്തു.
