കാനഡയിൽ 2021 സെപ്റ്റംബറിൽ നടന്ന തെരഞ്ഞെടുപ്പിന് ശേഷം നിരവധി വിദേശികൾക്കാണ് പൗരത്വം നൽകിയത്. സാധാരണയായി വിദേശ പൗരന്മാർ വളരെ കുറച്ച് തവണ മാത്രമേ കാനഡ തെരഞ്ഞെടുപ്പിൽ വോട്ട് ചെയ്തിട്ടുള്ളു. പലർക്കും വോട്ടിംഗ് പ്രക്രിയ എങ്ങനെയാണെന്ന് മനസിലാകാത്തതോ, വോട്ടിങ്ങിൽ ആശയക്കുഴപ്പം സംഭവിക്കുന്നതോ ആണ് ഇതിന് കാരണമെന്നാണ് വിദഗ്ധർ പറയുന്നത്. എന്നാൽ എല്ലാ പൗരന്മാരെയും തെരഞ്ഞെടുപ്പ് പ്രക്രിയയുടെ ഭാഗമാക്കുന്നതിനായി ഇലക്ഷൻ കാനഡ വോട്ടിംഗ് ഗൈഡ് തയ്യാറാക്കിയിട്ടുണ്ട്, പൗരന്മാർക്ക് ഏപ്രിൽ 28-ന് വോട്ട് ചെയ്യാൻ സാധിക്കും.
ആർക്കൊക്കെ വോട്ട് ചെയ്യാം?
കനേഡിയൻ പൗരത്വമുള്ള വിദേശികൾക്ക് വോട്ടുചെയ്യാൻ സാധിക്കും. സ്ഥിരതാമസക്കാർ, അഭയാർത്ഥികൾ, താൽക്കാലിക തൊഴിൽ വിസ ഉടമകൾ, പഠന വിസകൾ എന്നിവയുള്ളവർക്ക് വോട്ടിംഗ് അവകാശമില്ല. വോട്ടർക്ക് 18 വയസ് പൂർത്തിയായിരിക്കണം. വോട്ട് ചെയ്യുന്നതിനായി
ഇലക്ഷൻ കാനഡയുടെ വെബ്സൈറ്റിൽ രജിസ്റ്റർ ചെയ്യുകയും ഇലക്ഷൻ സമയത്ത് വോട്ടർമാർ അവരുടെ വിലാസവും ഐഡന്റിറ്റിയും തെളിയിക്കുകയും വേണം.
ഇലക്ഷൻ കാനഡയിൽ രജിസ്ട്രേഷൻ ഏങ്ങനെ?
ഏപ്രിൽ 22-നകം ഇലക്ഷൻ കാനഡയുടെ ഒഫീഷ്യൽ വെബ്സൈറ്റിലോ, നേരിട്ട് ഓഫീസ് വഴിയോ വോട്ട് ചെയ്യാൻ ആഗ്രഹിക്കുന്നവർ രജിസ്ട്രേഷൻ പൂർത്തീകരിക്കണം. നിങ്ങളുടെ ഫോട്ടോ, മേൽവിലാസം തെളിയിക്കുന്ന ഒരു ഐഡന്റിറ്റി കാർഡ്, അല്ലെങ്കിൽ നിങ്ങളുടെ ഡ്രൈവിംഗ് ലൈസെൻസ് എന്നിവയാണ് രജിസ്ട്രേഷനായി ആവശ്യമുള്ളത്. തെരഞ്ഞെടുപ്പ് ദിവസം തിരിച്ചറിയൽ രേഖയുമായി എത്തിയാൽ പോളിംഗ് സ്റ്റേഷനിലും രജിസ്റ്റർ ചെയ്യാൻ സാധിക്കും. നിങ്ങളുടെ ഐഡി കാർഡുകൾ നഷ്ടമായി പോയിട്ടുണ്ടെങ്കിലും നിങ്ങൾക്ക് വോട്ട് ചെയ്യാം. അതിനായി എല്ലാ രേഖകളും കൈയിലുള്ള ഒരാൾ നിങ്ങൾക്ക് വേണ്ടി അവിടെ ഉറപ്പ് നൽകിയാൽ മതിയാകും.
വോട്ടിംഗ് എപ്പോൾ?
ഏപ്രിൽ 28 തിങ്കളാഴ്ചയാണ് കാനഡയിൽ തെരഞ്ഞെടുപ്പ്. ഇലക്ഷൻ കാനഡയിൽ രജിസ്റ്റർ ചെയ്ത എല്ലാവർക്കും തെരഞ്ഞെടുപ്പ് തീയതിക്ക് മൂന്നാഴ്ച മുൻപ് വോട്ടർ രജിസ്ട്രേഷൻ കാർഡുകൾ മെയിൽ വഴി ലഭിക്കും. വോട്ട് ചെയ്യേണ്ട സ്ഥലം ഈ കാർഡിൽ രേഖപ്പെടുത്തിയിട്ടുണ്ടാകും. 12 മണിക്കൂർ സമയമാണ് പോളിങ്ങ് ഉണ്ടായിരിക്കുക. രാവിലെ 9 മണി മുതൽ രാത്രി 9 മണി വരെ വോട്ട് ചെയ്യാം. ഓരോ പ്രദേശത്തിനനുസരിച്ച് സമയത്തിൽ വ്യത്യാസങ്ങൾ ഉണ്ടായേക്കാം. തെരഞ്ഞെടുപ്പ് ദിവസം വോട്ടർക്ക് ജോലിക്ക് പോകേണ്ടതുണ്ടെങ്കിൽ വോട്ട് രേഖപ്പെടുത്തുന്നതിനായി തൊഴിൽ ഉടമ മൂന്ന് മണിക്കൂർ വരെ സമയം അനുവദിക്കണം എന്നും ഉത്തരവുണ്ട്.
