കാൽഗറി: ഓൺലൈൻ ഗെയിമിംഗ് പ്ലാറ്റ്ഫോമായ റോബ്ലോക്സ് വഴി പരിചയപ്പെട്ട പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച കേസിൽ, കാൽഗറി സ്വദേശി ഹവായിൽ വെച്ച് അറസ്റ്റിൽ. ഇരുപത്തിയൊന്ന് വയസ്സുകാരനായ ഐൻറെബ് ജോൺ പാസുക്വിൻ ഡിസോൺ ആണ് യു.എസ്. അധികൃതരുടെ പിടിയിലായത്. പ്രശസ്ത ഓൺലൈൻ ഗെയിമിംഗ് പ്ലാറ്റ്ഫോമായ റോബ്ലോക്സിൽ വെച്ചാണ് ഇയാൾ 14 വയസ്സുകാരിയായ പെൺകുട്ടിയെ പരിചയപ്പെട്ടത്. തുടർന്ന് പെൺകുട്ടിയെ കാണാനായി ഡിസോൺ കാൽഗറിയിൽ നിന്ന് ഹവായിയിലേക്ക് യാത്ര ചെയ്യുകയായിരുന്നു. ദ്വീപിൽ എത്തിയ ശേഷം ഒരു ബെഡ് ആൻഡ് ബ്രേക്ക്ഫാസ്റ്റ് സ്ഥാപനത്തിൽ റൂം വാടകയ്ക്ക് എടുക്കുകയും, ഇവിടെ വെച്ച് കൗമാരക്കാരിയെ ലൈംഗികമായി പീഡിപ്പിച്ചു എന്നുമാണ് സൗത്ത് കൊഹാല പോലീസ് നൽകുന്ന വിവരം.
നവംബർ 1-ന് അറസ്റ്റ് രേഖപ്പെടുത്തിയ ഡിസോണിനെതിരെ, നവംബർ 2-ന് ഫസ്റ്റ്-ഡിഗ്രി ലൈംഗികാതിക്രമം എന്ന ക്ലാസ് എ ഫെലണിക്ക് കേസ് ചാർജ് ചെയ്തു. നവംബർ 3-ന് കോന കോടതിയിൽ പ്രതിയെ ഹാജരാക്കി. പെൺകുട്ടിയുടെ മാതാപിതാക്കൾ നൽകിയ പരാതിയുടെ അടിസ്ഥാനത്തിലാണ് പോലീസ് നടപടി സ്വീകരിച്ചതെന്നും, പ്രതി നാട്ടിലേക്ക് തിരികെ പോകുന്നതിന് തൊട്ടുമുൻപ് തന്നെ അറസ്റ്റ് ചെയ്യാൻ കഴിഞ്ഞുവെന്നും ഹവായ് പോലീസ് അറിയിച്ചു. ഈ കുറ്റത്തിന് ഇരുപത് വർഷം വരെ തടവ് ശിക്ഷ ലഭിക്കാവുന്നതാണ്.
ഓൺലൈൻ ഗെയിമിംഗ് പ്ലാറ്റ്ഫോമുകളിലൂടെയുള്ള ഇത്തരം ചൂഷണങ്ങൾ വർധിക്കുന്ന സാഹചര്യത്തിൽ, രക്ഷിതാക്കൾ കുട്ടികളുടെ ഓൺലൈൻ ഇടപെടലുകൾ കൃത്യമായി നിരീക്ഷിക്കണമെന്നും, സൈബർ സുരക്ഷയെക്കുറിച്ച് അവർക്ക് അവബോധം നൽകണമെന്നും പോലീസ് മുന്നറിയിപ്പ് നൽകി. കുട്ടികൾ എന്ത് ചെയ്യുന്നു എന്നതിനെക്കുറിച്ച് നമ്മൾ കൂടുതൽ ബോധവാന്മാരായിരിക്കണം എന്നും ഈ കേസ് ചൂണ്ടിക്കാട്ടി അധികൃതർ ഓർമ്മിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Calgary man arrested for sexually assaulting girl he met on online gaming platform
