ലണ്ടൻ: പൊതുസ്ഥലത്ത് പാൻ മസാല ചവച്ചുതുപ്പിയതിന് പിടിയിലായ രണ്ട് ഇന്ത്യക്കാർക്ക് ബ്രിട്ടീഷ് കോടതി കനത്ത പിഴ ചുമത്തി. ലണ്ടനിലെ ബ്രന്റ് കൗൺസിൽ പരിധിയിൽ നിയമം ലംഘിച്ചതിന് എഡ്ജ്വെയറിൽ താമസിക്കുന്ന അക്ഷിത് കുമാർ ഭദ്രേ പട്ടേൽ, റുയിസ്ലിപിലെ ഹിതേഷ് പട്ടേൽ എന്നിവർക്കെതിരെയാണ് കോടതി പിഴ ചുമത്തിയത്. കോടതി ചെലവുകളും പിഴയും ഉൾപ്പെടെ ഓരോരുത്തരും 1391 പൗണ്ട് വീതം കൊടുക്കണമെന്നാണ് വിധി.
2025 ജൂണിലാണ് കേസിനാസ്പദമായ സംഭവങ്ങളുടെ തുടക്കം. കിങ്സ്ബറി മെട്രോ സ്റ്റേഷന് സമീപവും വെംബ്ലി ഹിൽ റോഡിലും പാൻ മസാല ചവച്ചുതുപ്പുന്നത് അധികൃതരുടെ ശ്രദ്ധയിൽപ്പെട്ടതോടെ ഇവർക്ക് 100 പൗണ്ട് (ഏകദേശം 12,000 രൂപ) വീതം തൽസമയ പിഴ ചുമത്തിയിരുന്നു. എന്നാൽ നിശ്ചിത സമയത്തിനകം പിഴയടക്കാൻ ഇരുവരും തയ്യാറാകാത്തതിനെത്തുടർന്നാണ് നഗരസഭ കോടതിയെ സമീപിച്ചത്. നിയമത്തോടുള്ള അനാദരവ് കണക്കിലെടുത്ത കോടതി പിഴത്തുക കുത്തനെ വർദ്ധിപ്പിക്കുകയായിരുന്നു.
നഗരത്തിലെ പാൻ കറകൾ നീക്കം ചെയ്യുന്നതിനായി വലിയ തുക ചെലവാകുന്നത് കണക്കിലെടുത്താണ് അധികൃതർ നടപടി കർശനമാക്കിയത്. ബ്രന്റ് കൗൺസിൽ പരിധിയിൽ മാത്രം വർഷം തോറും പാൻ കറകൾ നീക്കാൻ ഏകദേശം 35,000 പൗണ്ട് (37 ലക്ഷം രൂപ) ചെലവ് വരുന്നുണ്ട്. സാധാരണ രീതിയിൽ മായാത്ത കറകൾ നീക്കം ചെയ്യാൻ പ്രത്യേക യന്ത്രങ്ങൾ ഉപയോഗിക്കേണ്ടി വരുന്നത് നഗരസഭയ്ക്ക് വൻ സാമ്പത്തിക ബാധ്യതയുണ്ടാക്കുന്നു. നിലവിൽ പൊതുസ്ഥലങ്ങളിൽ പട്രോളിംഗ് ശക്തമാക്കിയതായും നിയമലംഘകർക്കെതിരെ കർശന നടപടി തുടരുമെന്നും അധികൃതർ വ്യക്തമാക്കി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
British court fines two Indians in London for spitting pan masala in public
