ബ്രിട്ടീഷ് കൊളംബിയ: ബ്രിട്ടീഷ് കൊളംബിയ പ്രൊവിൻഷ്യൽ നോമിനി പ്രോഗ്രാമിൻ്റെ (BC PNP) 2026-ലെ ആദ്യ സ്കിൽസ് ഇമിഗ്രേഷൻ നറുക്കെടുപ്പ് പൂർത്തിയായി. ഫെബ്രുവരി 4-ന് നടന്ന ഈ നറുക്കെടുപ്പിലൂടെ 429 ഉദ്യോഗാർത്ഥികൾക്കാണ് പ്രൊവിൻഷ്യൽ നോമിനേഷന് അപേക്ഷിക്കാനുള്ള ക്ഷണം (ITA) ലഭിച്ചത്. പ്രൊവിൻസിലെ സാമ്പത്തിക വളർച്ചയ്ക്ക് നിർണ്ണായക സംഭാവന നൽകാൻ കഴിയുന്ന ഉയർന്ന ശമ്പളമുള്ളവരെയും മികച്ച പോയിന്റ് സ്കോർ ഉള്ളവരെയുമാണ് ഈ ഘട്ടത്തിൽ തിരഞ്ഞെടുത്തത്.
മണിക്കൂറിന് 70 ഡോളറോ അതിൽ കൂടുതലോ (പ്രതിവർഷം ഏകദേശം 1.45 ലക്ഷം കനേഡിയൻ ഡോളർ) ശമ്പള വാഗ്ദാനമുള്ള തൊഴിൽ കരാറുകൾ കൈവശമുള്ള 206 പേർക്ക് ഈ നറുക്കെടുപ്പിൽ മുൻഗണന ലഭിച്ചു. ഇതുകൂടാതെ രജിസ്ട്രേഷൻ സ്കോർ 138-ഉം അതിനു മുകളിലുമുള്ള 223 ഉദ്യോഗാർത്ഥികളെയും പ്രൊവിൻസ് തിരഞ്ഞെടുത്തു. ഭാവിയിൽ നടക്കുന്ന നറുക്കെടുപ്പുകളിൽ ഉദ്യോഗാർത്ഥികളുടെ വിദ്യാഭ്യാസ നിലവാരം, ഭാഷാ നൈപുണ്യം, പ്രവൃത്തിപരിചയം, അവർ ജോലി ചെയ്യാൻ ആഗ്രഹിക്കുന്ന മേഖലകൾ എന്നിവ കൂടി പരിഗണിച്ചായിരിക്കും തീരുമാനങ്ങൾ എടുക്കുക എന്ന് അധികൃതർ വ്യക്തമാക്കിയിട്ടുണ്ട്.
നിലവിൽ ലഭ്യമായ കണക്കുകൾ പ്രകാരം ബ്രിട്ടീഷ് കൊളംബിയയുടെ സ്കിൽസ് ഇമിഗ്രേഷൻ പൂളിൽ 11,210 അപേക്ഷകരാണ് അവസരം കാത്തുനിൽക്കുന്നത്. എന്നാൽ 2026ൽ ആകെ 5,254 നോമിനേഷൻ ഒഴിവുകൾ മാത്രമാണ് പ്രൊവിൻസിന് അനുവദിച്ചിട്ടുള്ളത്. മുൻവർഷത്തെ അപേക്ഷകരെ കൂടി ഈ ക്വാട്ടയിൽ പരിഗണിക്കേണ്ടി വരുമെന്നതിനാൽ, നിലവിൽ പൂളിലുള്ള പകുതിയോളം പേർക്ക് ഈ വർഷം ക്ഷണം ലഭിക്കാൻ സാധ്യത കുറവാണെന്നാണ് ഇമിഗ്രേഷൻ വിദഗ്ധർ വിലയിരുത്തുന്നത്. ഉയർന്ന സ്കോർ നേടുന്നവർക്കും പ്രൊവിൻസിൻ്റെ തന്ത്രപരമായ തൊഴിൽ ആവശ്യങ്ങൾ നിറവേറ്റുന്നവർക്കും മാത്രമേ വരും മാസങ്ങളിൽ കൂടുതൽ അവസരങ്ങൾ ലഭിക്കാൻ സാധ്യതയുള്ളൂ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
British Columbia invites 400+ provincial nominee candidates in latest Skills Immigration draw
