സമയമാറ്റത്തിന് വിട; ബ്രിട്ടീഷ് കൊളംബിയ ഇനി സ്ഥിരമായ ഡേലൈറ്റ് സേവിംഗ് ടൈമിലേക്ക്

വിക്ടോറിയ: ബ്രിട്ടീഷ് കൊളംബിയയിലെ ജനങ്ങൾ ഈ വരുന്ന ഞായറാഴ്ച തങ്ങളുടെ ക്ലോക്കിലെ സമയം അവസാനമായി മാറ്റാൻ ഒരുങ്ങുന്നു. വർഷത്തിൽ രണ്ടുതവണ ക്ലോക്കിലെ സമയം മാറ്റുന്ന പതിവ് അവസാനിപ്പിച്ച് പ്രവിശ്യ ഇനി മുതൽ സ്ഥിരമായ ഡേലൈറ്റ് ടൈമിലേക്ക് മാറുമെന്ന് പ്രീമിയർ ഡേവിഡ് എബി ഔദ്യോഗികമായി പ്രഖ്യാപിച്ചു. മാർച്ച് എട്ടിന് നടപ്പിലാക്കുന്ന ഈ മാറ്റത്തോടെ ‘സ്പ്രിംഗ് ഫോർവേഡ്’ അഥവാ ക്ലോക്കിലെ സമയം ഒരു മണിക്കൂർ മുന്നോട്ട് നീക്കുന്ന രീതി അവസാനിക്കും. സമയമാറ്റം മൂലം ജനങ്ങൾക്കുണ്ടാകുന്ന ഉറക്കക്കുറവ്, ആരോഗ്യപ്രശ്നങ്ങൾ, റോഡപകടങ്ങൾ എന്നിവ ഒഴിവാക്കാനാണ് ഈ സുപ്രധാന തീരുമാനമെന്ന് പ്രീമിയർ വ്യക്തമാക്കി.

പുതിയ പദ്ധതിയനുസരിച്ച് 2026 നവംബർ മുതൽ ‘പസഫിക് ടൈം’ എന്നറിയപ്പെടുന്ന ഈ സമയക്രമം പ്രവിശ്യയിൽ സ്ഥിരമാകും. സാധാരണയായി നവംബറിൽ ക്ലോക്ക് ഒരു മണിക്കൂർ പിന്നോട്ട് മാറ്റാറുണ്ടെങ്കിലും ഇനി മുതൽ അത് ഉണ്ടാകില്ല. എന്നാൽ ബ്രിട്ടീഷ് കൊളംബിയയുടെ കിഴക്കൻ അതിർത്തിയിലുള്ള ചില മേഖലകളിൽ ഈ മാറ്റം ബാധകമാകില്ല. പ്രത്യേകിച്ച് ഈസ്റ്റ് കൂട്ട്‌നെ (East Kootenay) മേഖലയിലെ ഗോൾഡൻ, ക്രാൻബ്രൂക്ക് തുടങ്ങിയ സ്ഥലങ്ങൾ അയൽ പ്രവിശ്യയായ ആൽബർട്ടയുമായി അടുത്ത സാമ്പത്തിക ബന്ധം പുലർത്തുന്നതിനാൽ ആൽബർട്ടയുടെ ‘മൗണ്ടൻ ടൈം’ (Mountain Time) ആണ് പിന്തുടരുന്നത്. അതിനാൽ ഇവർ ആൽബർട്ടയിലെ സമയക്രമത്തിന് അനുസൃതമായി ക്ലോക്കുകൾ മാറ്റുന്നത് തുടരും. കൂടാതെ പീസ് റീജിയൻ, ക്രെസ്റ്റൺ തുടങ്ങിയ സ്ഥലങ്ങൾ നേരത്തെ തന്നെ സമയമാറ്റം ഒഴിവാക്കിയവയായതിനാൽ അവിടെയും പുതിയ മാറ്റങ്ങൾ ഉണ്ടാകില്ല.

ഇതുമായി ബന്ധപ്പെട്ട നിയമം 2019-ൽ തന്നെ പാസാക്കിയിരുന്നെങ്കിലും അയൽ രാജ്യമായ അമേരിക്കയിലെ വാഷിംഗ്ടൺ, ഒറിഗൺ, കാലിഫോർണിയ തുടങ്ങിയ സംസ്ഥാനങ്ങളുടെ നിലപാടിനായി കാത്തിരിക്കുകയായിരുന്നു. എന്നാൽ ഇനി കാത്തുനിൽക്കുന്നതിൽ അർത്ഥമില്ലെന്നും അയൽ സംസ്ഥാനങ്ങളും വൈകാതെ ഈ പാത പിന്തുടരുമെന്നാണ് പ്രതീക്ഷയെന്നും ഡേവിഡ് എബി പറഞ്ഞു. ഇതിനോടകം തന്നെ ഈ രീതി വിജയകരമായി നടപ്പിലാക്കിയ യൂക്കോൺ പ്രവിശ്യയെ അദ്ദേഹം മാതൃകയായി ചൂണ്ടിക്കാട്ടി.

ഭരണകൂടത്തിന്റെ ഈ തീരുമാനം ധീരവും ഗുണകരവുമാണെന്ന് ബ്രിട്ടീഷ് കൊളംബിയ സർവകലാശാലയിലെ പ്രൊഫസർ വെർണർ ആന്റ്‌വീലർ അഭിപ്രായപ്പെട്ടു. വർഷത്തിൽ രണ്ടുതവണ സമയം മാറ്റുന്നത് ജനങ്ങളിൽ അനാവശ്യമായ തളർച്ചയുണ്ടാക്കുന്നുണ്ടെന്നും, ആരെങ്കിലും ഒരാൾ ഈ മാറ്റത്തിന് തുടക്കം കുറിക്കേണ്ടത് അനിവാര്യമാണെന്നും അദ്ദേഹം കൂട്ടിച്ചേർത്തു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

British Columbia now on permanent daylight saving time