ഷിക്കോഗോ: ടിക്കറ്റെടുത്തത് വിമാനത്തിൽ പറക്കാൻ, പക്ഷേ യാത്ര ചെയ്യാൻ വന്നത് ആഡംബര ബസ്! സംഭവം അമേരിക്കൻ എയർലൈൻസിന്റെ പുതിയ ‘ലാൻഡ് ലൈൻ’ സേവനമാണ്. ഇൻഡ്യാനയിലെ സൗത്ത് ബെൻഡിൽ നിന്ന് ഷിക്കാഗോയിലേക്ക് പോകാൻ തയ്യാറെടുത്ത ക്രിസ്റ്റ മോട്ട്സ് എന്ന യുവതിക്കാണ് ഈ അവിശ്വസനീയമായ അനുഭവം നേരിട്ടത്. വിമാനത്താവളത്തിൽ ചെക്ക്-ഇൻ ചെയ്തു, സുരക്ഷാ പരിശോധനയെല്ലാം കഴിഞ്ഞു, ഗേറ്റിൽ കാത്തിരുന്നു. പറക്കാൻ തയ്യാറായപ്പോൾ ക്രിസ്റ്റ കണ്ടത് വിമാനത്തിന് പകരം ഒരു കിടിലൻ ബസ്. ക്രിസ്റ്റയുടെ വിചിത്രമായ യാത്രാനുഭവം സോഷ്യൽ മീഡിയയിൽ ഇപ്പോൾ തരംഗമായിരിക്കുകയാണ്.
ടിക്കറ്റ് ബുക്ക് ചെയ്തപ്പോൾ അതിൽ ‘ബസ്’ എന്ന ഓപ്ഷൻ ക്രിസ്റ്റ ശ്രദ്ധിച്ചിരുന്നില്ല. എയർലൈൻസിന്റെ ഈ പുതിയ സേവനം സൗത്ത് ബെൻഡിൽ തുടങ്ങിയിട്ടേ ഉണ്ടായിരുന്നുള്ളൂ. സാധാരണ വിമാനയാത്രയുടെ അതേ നടപടിക്രമങ്ങൾ: അതായത് ചെക്ക്-ഇൻ, ബോർഡിങ് പാസ്, ബോർഡിങ് ഗേറ്റിലെ കാത്തിരിപ്പ് – എല്ലാം പൂർത്തിയാക്കിയ ശേഷമാണ് ക്രിസ്റ്റ ഈ ബസിന് മുന്നിൽ എത്തിയത്. വിമാനത്തിന് പകരം റോഡിലൂടെയുള്ള യാത്രയാണെങ്കിലും, യാത്രാസമയം ലാഭിക്കാനും കണക്ടിവിറ്റിക്കുമായി എയർലൈൻസ് ഒരുക്കിയ ആഡംബര സേവനം ക്രിസ്റ്റയെ ഒട്ടും നിരാശപ്പെടുത്തിയില്ല.
ബസിൽ കയറിയപ്പോഴും വിമാനത്തിലെ അതേ സുഖസൗകര്യങ്ങൾ. കൂടാതെ, വിമാനങ്ങൾ ഓടുന്ന ടാക്സിവേയിലൂടെ ബസ് പോകുന്ന കാഴ്ചയും ക്രിസ്റ്റ വീഡിയോയിൽ പങ്കുവെച്ചു.
“ഈ സർവീസിലെ ആദ്യ ദിവസത്തെ ആദ്യ യാത്രക്കാരി ഞാനായിരുന്നു,” എന്ന് ക്രിസ്റ്റ പറയുന്നു. മൊത്തത്തിലുള്ള യാത്രാസമയവും ലഭിച്ച മികച്ച സേവനവും കാരണം ക്രിസ്റ്റ പൂർണ്ണ തൃപ്തയാണ്. എന്തായാലും ക്രിസ്റ്റയുടെ ഈ വിമാനയാത്രാ ബസ് അനുഭവം ഇപ്പോൾ ലോകമെമ്പാടുമുള്ള യാത്രികർക്കിടയിൽ വലിയ ചർച്ചയായി മാറിയിരിക്കുകയാണ്.
പുതിയ കാലത്തെ യാത്രകൾ എത്രത്തോളം മാറുന്നു എന്നതിൻ്റെ ഉദാഹരണം കൂടിയാണ് ഈ ലാൻഡ് ലൈൻ സർവീസ്. എയർലൈൻ ടിക്കറ്റെടുത്ത് ബസിൽ പറന്നുയരാൻ കഴിയുന്ന ഈ വിചിത്ര സേവനം മറ്റ് എയർലൈൻസുകൾ ഏറ്റെടുക്കുമോ എന്ന് കാത്തിരുന്ന് കാണാം.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Booked a 'flight' ticket; Traveled by bus! American Airlines' strange 'landline' service
