ഒട്ടാവ: കാനഡയിൽ അതിശൈത്യം തുടരുന്ന പശ്ചാത്തലത്തിൽ രാജ്യത്തിന്റെ വിവിധ ഭാഗങ്ങളിൽ കനത്ത ജാഗ്രതാനിർദ്ദേശം പുറപ്പെടുവിച്ചു. ചില പ്രദേശങ്ങളിൽ തണുപ്പ് മൈനസ് 50 ഡിഗ്രി സെൽഷ്യസ് വരെ താഴാൻ സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ ഏറ്റവും പുതിയ റിപ്പോർട്ട്. സസ്കാച്ചുവൻ, മാനിറ്റോബ പ്രവിശ്യകളിലും വടക്കൻ ഒന്റാറിയോയുടെ ഭൂരിഭാഗം മേഖലകളിലും എൻവിറോൺമെന്റ് കാനഡ ഓറഞ്ച് അലർട്ട് പ്രഖ്യാപിച്ചിരിക്കുകയാണ്. കഠിനമായ കാറ്റും ശൈത്യവും ആരോഗ്യത്തെയും ഗതാഗത മേഖലയെയും ഗുരുതരമായി ബാധിക്കുമെന്ന് അധികൃതർ മുന്നറിയിപ്പ് നൽകുന്നു.
ഒന്റാറിയോയുടെയും ക്യുബെക്കിന്റെയും പല ഭാഗങ്ങളിലും ആർട്ടിക് ശൈത്യക്കാറ്റ് വീശിയടിക്കുന്നതിനാൽ തണുപ്പ് മൈനസ് 45 ഡിഗ്രി വരെ അനുഭവപ്പെടാൻ സാധ്യതയുണ്ട്. കഠിനമായ തണുപ്പിനെത്തുടർന്ന് ടൊറന്റോ നഗരത്തിൽ തെരുവുകളിൽ കഴിയുന്നവരെ സുരക്ഷിത കേന്ദ്രങ്ങളിലേക്ക് മാറ്റുന്നതിനായി പ്രത്യേക സംഘങ്ങളെ നിയോഗിച്ചിട്ടുണ്ട്. വരാനിരിക്കുന്ന വാരാന്ത്യത്തിൽ നഗരത്തിൽ ശക്തമായ മഞ്ഞുവീഴ്ചയ്ക്കും സാധ്യതയുണ്ടെന്നാണ് പ്രവചനം.
ന്യൂ ബ്രൺസ്വിക്ക് പ്രവിശ്യയിലും വരും ദിവസങ്ങളിൽ സ്ഥിതി സമാനമായിരിക്കും. ശനിയാഴ്ച മുതൽ ഞായറാഴ്ച വരെ ഇവിടെ താപനില മൈനസ് 37 ഡിഗ്രി വരെ താഴാൻ സാധ്യതയുള്ളതിനാൽ ജനങ്ങൾ അതീവ ജാഗ്രത പാലിക്കണമെന്ന് നിർദ്ദേശമുണ്ട്. അത്യാവശ്യ കാര്യങ്ങൾക്കല്ലാതെ ജനങ്ങൾ പുറത്തിറങ്ങരുതെന്നും തണുപ്പിനെ പ്രതിരോധിക്കാനുള്ള എല്ലാ മുൻകരുതലുകളും സ്വീകരിക്കണമെന്നും ഭരണകൂടം അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Bone-chilling cold warnings sweep the country, forecasting lows near -50 C
