ന്യൂഡൽഹി: ഡൽഹിയിലെ ചരിത്രപ്രസിദ്ധമായ ചെങ്കോട്ടയ്ക്ക് സമീപം കാറിനുള്ളിൽ ശക്തമായ സ്ഫോടനം. ഇതുവരെ എട്ട് പേർ മരിക്കുകയും 12 പേർക്ക് പരിക്കേൽക്കുകയും ചെയ്തതായി സ്ഥിരീകരിച്ചിട്ടുണ്ട്. തിങ്കളാഴ്ച രാത്രി 8:14 ഓടെയാണ് സംഭവം. മെട്രോ സ്റ്റേഷന്റെ ഒന്നാം നമ്പർ ഗേറ്റിന് സമീപമാണ് സ്ഫോടനം നടന്നത്. സ്ഫോടനത്തിൽ കാറിന് തീപിടിക്കുകയും സമീപത്തുണ്ടായിരുന്ന മറ്റ് എട്ട് വാഹനങ്ങൾ കത്തിനശിക്കുകയും ചെയ്തു.
സ്ഫോടനത്തിന്റെ പ്രകമ്പനം വളരെ വലുതായിരുന്നു, സമീപത്ത് നിർത്തിയിട്ടിരുന്ന വാഹനങ്ങളുടെ ചില്ലുകൾ തകരുകയും പോസ്റ്റ് ലൈറ്റുകൾക്ക് നാശനഷ്ടം സംഭവിക്കുകയും ചെയ്തു. വിവരമറിഞ്ഞ് അഗ്നിശമന സേനാംഗങ്ങളും പോലീസ് സംഘവും ഉടൻ സ്ഥലത്തെത്തി തീ നിയന്ത്രണവിധേയമാക്കി. സ്ഫോടന സമയത്ത് സ്ഥലത്ത് വലിയ ജനക്കൂട്ടമുണ്ടായിരുന്നതായി പോലീസ് വൃത്തങ്ങൾ അറിയിച്ചു. സംഭവസ്ഥലം പൂർണ്ണമായും പോലീസ് വളഞ്ഞിരിക്കുകയാണ്. സ്ഫോടനത്തിന്റെ കാരണം കണ്ടെത്താനായി ഫോറൻസിക് വിദഗ്ധർ സ്ഥലത്ത് വിശദമായ പരിശോധന നടത്തുന്നുണ്ട്.
പ്രാഥമിക അന്വേഷണത്തിൽ ഇത് കേവലം ഒരു പ്രാദേശിക സ്ഫോടനമല്ലെന്ന് സൂചനയുണ്ട്. സംഭവത്തിന്റെ പശ്ചാത്തലത്തിൽ ഡൽഹിയിലുടനീളം അതീവ ജാഗ്രതാ നിർദ്ദേശം നൽകിയിട്ടുണ്ട്. ഡൽഹിക്ക് പുറമെ മുംബൈ പോലീസിനും ജാഗ്രതാ നിർദ്ദേശം നൽകിയിട്ടുണ്ട്. എല്ലാ സ്റ്റേഷനുകളിലും പട്രോളിംഗ് ശക്തമാക്കാനും, സംശയാസ്പദമായ വ്യക്തികളെ പരിശോധിക്കാനും മുംബൈ പോലീസിന് നിർദ്ദേശം ലഭിച്ചു.
അടുത്തിടെ ഡൽഹിയോട് ചേർന്നുള്ള ഫരീദാബാദിൽ നിന്ന് 2,900 കിലോഗ്രാം സ്ഫോടകവസ്തുക്കൾ നിർമ്മിക്കാൻ ഉപയോഗിക്കുന്ന അമോണിയം നൈട്രേറ്റ് കണ്ടെത്തിയതിന് പിന്നാലെയാണ് ഈ സ്ഫോടനം ഉണ്ടായിരിക്കുന്നത്. സംഭവത്തിന്റെ ഗൗരവം കണക്കിലെടുത്ത് ഡൽഹി പോലീസ് സ്പെഷ്യൽ സെല്ലിലെ മുതിർന്ന ഉദ്യോഗസ്ഥരും ഡിസിപിയും ഉൾപ്പെടുന്ന പ്രത്യേക സംഘം അന്വേഷണത്തിന് മേൽനോട്ടം വഹിക്കാൻ സ്ഥലത്തെത്തിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Blast near Red Fort; Eight dead, alert issued in Delhi and Mumbai
