തിരുവനന്തപുരം: സംസ്ഥാന രാഷ്ട്രീയത്തിൽ വലിയ വിവാദത്തിന് തിരികൊളുത്തിക്കൊണ്ട് തിരഞ്ഞെടുപ്പ് കമ്മിഷൻ രാഷ്ട്രീയ പാർട്ടികൾക്ക് അയച്ച ഔദ്യോഗിക കത്തിൽ ബിജെപിയുടെ സീൽ പതിഞ്ഞത് ചർച്ചയാകുന്നു. സ്ഥാനാർത്ഥികളുടെ ക്രിമിനൽ പശ്ചാത്തലം വെളിപ്പെടുത്തുന്നതുമായി ബന്ധപ്പെട്ട സുപ്രീംകോടതി വിധിയെക്കുറിച്ച് വിശദീകരിക്കാൻ അയച്ച മെയിലിലാണ് കേരള ബിജെപിയുടെ സീൽ ഉള്ള കത്ത് ഉൾപ്പെട്ടത്. സംഭവത്തിൽ കേന്ദ്ര സർക്കാരിനും തിരഞ്ഞെടുപ്പ് കമ്മിഷനുമെതിരെ രൂക്ഷമായ പരിഹാസവും വിമർശനവുമായി സിപിഎം രംഗത്തെത്തിയിട്ടുണ്ട്.
ബിജെപിയെയും തിരഞ്ഞെടുപ്പ് കമ്മിഷനെയും നിയന്ത്രിക്കുന്നത് ഒരേ അധികാരകേന്ദ്രമാണെന്നത് രഹസ്യമല്ലെന്നും എന്നാൽ രണ്ട് രീതിയിൽ പ്രവർത്തിക്കാനുള്ള മര്യാദയെങ്കിലും കാട്ടണമെന്നും സിപിഎം എക്സ് പ്ലാറ്റ്ഫോമിൽ കുറിച്ചു. ഏത് ബട്ടൺ അമർത്തിയാലും താമര തെളിയും എന്ന് പറയുന്നതുപോലെ മറ്റൊരു ആകസ്മികതയാണിതെന്നും ബിജെപിയും തിരഞ്ഞെടുപ്പ് കമ്മിഷനും ഒരേ സീൽ തന്നെയാണ് ഉപയോഗിക്കുന്നതെന്നും പാർട്ടി പരിഹസിച്ചു. മറ്റ് ചില പാർട്ടികൾക്കും ഇത്തരത്തിൽ ബിജെപി സീൽ ഉള്ള കത്ത് ലഭിച്ചിട്ടുണ്ടെന്നും സിപിഎം ആരോപിക്കുന്നു.
എന്നാൽ ഈ ആരോപണങ്ങൾ തള്ളി മുഖ്യ തിരഞ്ഞെടുപ്പ് ഓഫിസർ രത്തൻ യു. ഖേൽക്കർ രംഗത്തെത്തി. തിരഞ്ഞെടുപ്പ് കമ്മിഷന്റെ കത്തിൽ രാഷ്ട്രീയ പാർട്ടിയുടെ സീൽ വന്നത് തികച്ചും ഒരു ക്ലെറിക്കൽ പിഴവാണെന്നാണ് അദ്ദേഹത്തിന്റെ വിശദീകരണം. 2019-ൽ ബിജെപി കേരള ഘടകം ചില മാർഗനിർദ്ദേശങ്ങളെക്കുറിച്ച് വിശദീകരണം തേടി സിഇഒ ഓഫിസിൽ എത്തിയപ്പോൾ സമർപ്പിച്ച അപേക്ഷയുടെ പകർപ്പാണ് അശ്രദ്ധ മൂലം മറ്റു പാർട്ടികൾക്ക് അയച്ചുപോയത്.
പിശക് ശ്രദ്ധയിൽപ്പെട്ട ഉടൻ തന്നെ, അതായത് മാർച്ച് 21-ന് തന്നെ ഈ നിർദ്ദേശം പിൻവലിച്ചുകൊണ്ട് എല്ലാ രാഷ്ട്രീയ പാർട്ടികൾക്കും റിട്ടേണിങ് ഓഫിസർമാർക്കും അറിയിപ്പ് നൽകിയിരുന്നുവെന്നും അദ്ദേഹം വ്യക്തമാക്കി. തിരഞ്ഞെടുപ്പ് പ്രക്രിയകളിൽ മറ്റൊരു ശക്തിക്കും ഇടപെടാൻ സാധിക്കാത്ത വിധം പഴുതടച്ചുള്ള പ്രവർത്തനങ്ങളാണ് കമ്മിഷൻ നടത്തുന്നതെന്നും ഇത്തരം തെറ്റായ സന്ദേശങ്ങൾ പ്രചരിപ്പിക്കുന്നത് ഒഴിവാക്കണമെന്നും മുഖ്യ തിരഞ്ഞെടുപ്പ് ഓഫിസർ അഭ്യർത്ഥിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
BJP sealed in Election Commission's letter! CPM makes serious allegations; explains that it was a clerical error
