ഒട്ടാവ: കാനഡയിൽ വിതരണം ചെയ്യുന്ന പ്രമുഖ ബ്രാൻഡുകളുടെ ജനനനിയന്ത്രണ ഗുളികകൾ പാക്കേജിംഗിലെ പിഴവുകളെത്തുടർന്ന് വിപണിയിൽ നിന്ന് തിരിച്ചുവിളിക്കുന്നു. പ്രമുഖ മരുന്ന് നിർമ്മാണ കമ്പനിയായ ടേവ കാനഡ ഇൻക്. ആണ് തിരിച്ചുവിളിക്കൽ നിർദ്ദേശം അറിയിച്ചത്. മരുന്ന് പാക്കറ്റുകളിൽ ഗുളികകൾ അടങ്ങിയ ബ്ലിസ്റ്റർ കാർഡുകൾ കാണാനില്ലെന്ന ഉപഭോക്താവിന്റെ പരാതിയെത്തുടർന്നാണ് കമ്പനി ഈ അടിയന്തര നടപടി സ്വീകരിച്ചത്. ഗുളികകൾ കൃത്യമായ അളവിൽ ലഭിക്കാത്തത് അനാവശ്യ ഗർഭധാരണത്തിനും മറ്റ് ആരോഗ്യപ്രശ്നങ്ങൾക്കും കാരണമാകുമെന്ന വിലയിരുത്തലിലാണ് പൊതുജനങ്ങൾക്ക് ജാഗ്രതാ നിർദേശം നൽകിയിരിക്കുന്നത്.
സീസണിക് (Seasonique), സീസണേൽ (Seasonale) എന്നീ രണ്ട് ബ്രാൻഡുകളുടെ പ്രത്യേക ലോട്ടുകളാണ് നിലവിൽ തിരിച്ചുവിളിച്ചിട്ടുള്ളത്. 91 ദിവസത്തേക്കുള്ള പാക്കുകളായി വിൽക്കുന്ന ഈ മരുന്നുകളിൽ മൂന്ന് ബ്ലിസ്റ്റർ കാർഡുകളിലായി 84 സജീവ ഗുളികകളാണ് ഉണ്ടാകേണ്ടത്. എന്നാൽ ചില പാക്കറ്റുകളിൽ ഒരു കാർഡ് പൂർണ്ണമായും ഇല്ലാത്ത അവസ്ഥ റിപ്പോർട്ട് ചെയ്തിട്ടുണ്ട്. 2027 ജനുവരി, ജൂലൈ മാസങ്ങളിൽ കാലാവധി തീരുന്ന സീസണിക് (Lot: 100073408, 100077864), സീസണേൽ (Lot: 100076607) എന്നീ ബാച്ചുകളിൽപ്പെട്ട മരുന്നുകൾ ഉപയോഗിക്കുന്നവർ ജാഗ്രത പാലിക്കണമെന്ന് കമ്പനി അറിയിച്ചു.
മരുന്ന് കുറവാണെന്ന് കണ്ടാൽ ഉപഭോക്താക്കൾ ഉടൻ തന്നെ ഫാർമസിയുമായി ബന്ധപ്പെട്ട് പകരം സംവിധാനം തേടേണ്ടതാണ്. ഒരു ഡോസ് പോലും ഒഴിവാക്കരുതെന്നും പകരം മരുന്ന് ലഭിക്കുന്നതുവരെ കോണ്ടം പോലുള്ള മറ്റ് സുരക്ഷാ മാർഗങ്ങൾ സ്വീകരിക്കണമെന്നും അധികൃതർ നിർദേശിച്ചു. ഡോസ് മുടങ്ങുന്നത് ക്രമരഹിതമായ രക്തസ്രാവത്തിനും ശാരീരിക അസ്വസ്ഥതകൾക്കും കാരണമായേക്കാം. കഴിഞ്ഞ വർഷവും സമാനമായ പാക്കേജിംഗ് പിഴവുകൾ മൂലം ഇതേ കമ്പനിയുടെ മരുന്നുകൾ വിപണിയിൽ നിന്ന് പിൻവലിച്ചിരുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Packaging flaw: Birth control pills recalled in Canada
