ടൊറന്റോ : ടൊറന്റോ നഗരമധ്യത്തിൽ കഴിഞ്ഞയാഴ്ച നടന്ന ബിൽ സി-12 വിരുദ്ധ പ്രതിഷേധ പ്രകടനത്തിനിടെ രണ്ട് പേരെ പോലീസ് അറസ്റ്റ് ചെയ്തു. വെല്ലിംഗ്ടൺ സ്ട്രീറ്റിലെ ഹൂട്ട്സ്യൂട്ട് ഓഫീസിന് മുന്നിൽ മൈഗ്രന്റ് വർക്കേഴ്സ് അലയൻസ് സംഘടിപ്പിച്ച റാലിക്കിടെയാണ് സംഭവം. ഫെബ്രുവരി 26-ന് ഉച്ചയ്ക്ക് 12:45-ഓടെ വെല്ലിംഗ്ടൺ സ്ട്രീറ്റ് വെസ്റ്റ്, സിംകോ സ്ട്രീറ്റ് പരിസരത്ത് പ്രതിഷേധം നടന്നതായും അവിടെയുണ്ടായിരുന്ന ഒരാൾ കെട്ടിടത്തിന് നാശനഷ്ടമുണ്ടാക്കിയതായും ടൊറന്റോ പോലീസ് അറിയിച്ചു.
കെട്ടിടത്തിന് നാശനഷ്ടമുണ്ടാക്കിയെന്നാരോപിച്ച് ടൊറന്റോ സ്വദേശിയായ ഇരുപതുകാരൻ റോങ് കോങ്ങിനെ പോലീസ് അറസ്റ്റ് ചെയ്തു. 5,000 ഡോളറിൽ താഴെ മൂല്യമുള്ള സ്വത്ത് നശിപ്പിച്ചതിനാണ് ഇയാൾക്കെതിരെ കേസെടുത്തിരിക്കുന്നത്. ഏപ്രിൽ 20-ന് ഇയാൾ കോടതിയിൽ ഹാജരാകണം. അറസ്റ്റ് തടയാൻ ശ്രമിക്കുകയും രണ്ട് പോലീസ് ഉദ്യോഗസ്ഥരെ മർദ്ദിക്കുകയും ചെയ്തെന്നാരോപിച്ച് ടൊറന്റോ സ്വദേശിയായ സയ്യിദ് ഹുസ്സൻ (41) എന്നയാളെയും പോലീസ് പിടികൂടി. ഉദ്യോഗസ്ഥരെ ആക്രമിക്കൽ, അറസ്റ്റ് തടയൽ, ഔദ്യോഗിക കൃത്യനിർവഹണം തടസ്സപ്പെടുത്തൽ എന്നീ കുറ്റങ്ങളാണ് ഇയാൾക്കെതിരെ ചുമത്തിയത്. ഏപ്രിൽ 22-നാണ് ഇയാളുടെ കോടതി ഹാജരാകൽ നിശ്ചയിച്ചിരിക്കുന്നത്.
പ്രതികൾക്കെതിരെയുള്ള കുറ്റാരോപണങ്ങൾ കോടതിയിൽ തെളിയിക്കപ്പെട്ടിട്ടില്ലെന്ന് അധികൃതർ വ്യക്തമാക്കി. സംഭവത്തിൽ അന്വേഷണം പുരോഗമിക്കുകയാണെന്നും ഇതുമായി ബന്ധപ്പെട്ട് കൂടുതൽ വിവരങ്ങൾ ലഭിക്കുന്നവർ പോലീസിനെയോ ക്രൈം സ്റ്റോപ്പേഴ്സിനെയോ അറിയിക്കണമെന്നും ടൊറന്റോ പോലീസ് അഭ്യർത്ഥിച്ചു. കാനഡയുടെ വിദേശ നയങ്ങൾക്കെതിരെയും കുടിയേറ്റ നിയമങ്ങൾക്കെതിരെയും നടന്ന പ്രതിഷേധം അക്രമാസക്തമായതിനെ ഗൗരവത്തോടെയാണ് കാണുന്നതെന്ന് പോലീസ് വൃത്തങ്ങൾ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Bill C-12 protests: Toronto residents charged with vandalism, assault on police
