രണ്ട് മാസത്തോളം നീണ്ട അനിശ്ചിതത്വങ്ങൾക്കൊടുവിൽ വിൻഡ്സർ ബെസ്റ്റ് വെസ്റ്റേൺ ഹോട്ടലിലെ ജീവനക്കാരും മാനേജ്മെന്റും തമ്മിൽ താൽക്കാലിക കരാറിൽ ഒപ്പുവെച്ചു. ഇതോടെ, ജൂൺ മാസം മുതൽ തുടർന്നുവന്ന സമരം അവസാനിക്കുകയാണ്. യൂണിയൻ പ്രതിനിധിയായ എമിലി നബ്ബൂത്ത് ഇക്കാര്യം സ്ഥിരീകരിച്ചു. എന്നാൽ, ഹോട്ടലിന്റെ മാനേജ്മെന്റ് ചുമതലയുള്ള ഐൺവുഡ് മാനേജ്മെന്റ് കോർപ്പറേഷൻ ഇതുവരെ ഔദ്യോഗികമായി പ്രതികരിച്ചിട്ടില്ല.
പ്രധാനമായും വേതന വർദ്ധനവ് ആവശ്യപ്പെട്ടുകൊണ്ടായിരുന്നു ജീവനക്കാർ സമരത്തിന് ഇറങ്ങിയത്. ഉയർന്ന ജീവിതച്ചെലവ് കാരണം മെച്ചപ്പെട്ട വേതനം അത്യാവശ്യമാണെന്ന് യൂണിയൻ ചൂണ്ടിക്കാട്ടി. സമരം ആരംഭിച്ചതിനുശേഷം നിരവധി തവണ ചർച്ചകൾ നടന്നെങ്കിലും തീരുമാനമാകാതെ നീണ്ടുപോവുകയായിരുന്നു.
രണ്ട് മാസത്തോളം നീണ്ടുനിന്ന ഈ സമരം ഹോട്ടലിന്റെ പ്രവർത്തനങ്ങളെ കാര്യമായി ബാധിച്ചു. ജീവനക്കാരെ മാറ്റി നിർത്തി പകരം ആളുകളെ വെച്ചപ്പോൾ സംഘർഷാവസ്ഥ ഉടലെടുത്തിരുന്നു.
സമരം ചെയ്യുന്ന തൊഴിലാളികൾ പകരം ജോലിക്ക് വന്നവരെ മർദ്ദിച്ചുവെന്നും ഹോട്ടലിലേക്ക് പ്രവേശിക്കുന്നത് തടസ്സപ്പെടുത്തിയെന്നും കമ്പനി ആരോപിച്ചിരുന്നു. ഇങ്ങനെയുള്ള കലുഷിതമായ സാഹചര്യങ്ങൾക്കൊടുവിലാണ് ഇപ്പോൾ ഒത്തുതീർപ്പിൽ എത്തിയത്. പുതിയ കരാറിലെ വിശദാംശങ്ങൾ യൂണിയൻ ഇതുവരെ പുറത്തുവിട്ടിട്ടില്ല. എങ്കിലും, തൊഴിലാളികളുടെ പ്രധാന ആവശ്യങ്ങൾ പരിഗണിക്കപ്പെട്ടേക്കാമെന്നാണ് സൂചന.
Best Western strike nears settlement; Temporary agreement reached between workers and management
