കാനഡയിലെ ആൽബെർട്ട പ്രവിശ്യയിലെ ഡ്രംഹെല്ലർ നഗരത്തിന്റെ പ്രതീകമായ കൂറ്റൻ ടി-റെക്സ് ദിനോസർ ശിൽപ്പമായ ‘ടൈറ’യുടെ ഭാവിയെക്കുറിച്ച് ആകാംഷ. 25 മീറ്റർ ഉയരമുള്ള ഈ ശിൽപ്പം തകർച്ചയുടെ വക്കിലാണോ എന്ന് നിർണ്ണയിക്കാൻ ഈ വർഷം ശരത്കാലത്തിൽ ഒരു സാങ്കേതിക പഠനം നടത്തും. “ഈ പഠനം കഴിഞ്ഞാൽ ടൈറയുടെ നിലനിൽപ്പിനെക്കുറിച്ചും അതിനെ നിലനിർത്താൻ എത്ര പണം വേണ്ടിവരുമെന്നും വ്യക്തമാകുമെന്നാണ്,” മേയർ ഹെതർ കോൾബർഗ് പറയുന്നത്. ടൈറക്ക് 30 വർഷത്തെ ആയുസ്സുണ്ടെന്നും ചെറിയ അറ്റകുറ്റപ്പണികൾ മാത്രം മതിയെന്നും പഠനത്തിൽ തെളിഞ്ഞാൽ അത് വലിയ ആശ്വാസമാകുമെന്നും, എന്നാൽ ഇത് തകരാൻ സാധ്യതയുണ്ടെന്ന് കണ്ടെത്തിയാൽ സാഹചര്യം മാറ്റി ചിന്തിക്കേണ്ടി വരുമെന്നും അദ്ദേഹം കൂട്ടിച്ചേർത്തു.
ഒരു യഥാർത്ഥ ടി-റെക്സിന്റെ നാലിരട്ടി വലുപ്പമുള്ള ടൈറ, ഓരോ വർഷവും 150,000 സന്ദർശകരെയാണ് ആകർഷിക്കുന്നത്. കാൽനൂറ്റാണ്ടിലേറെയായി ദശലക്ഷക്കണക്കിന് വിനോദസഞ്ചാരികളുടെ ചിത്രങ്ങൾക്ക് ഇത് പശ്ചാത്തലമൊരുക്കിയിട്ടുണ്ട്. ടൈറയുടെ ഉള്ളിലൂടെ 106 പടികൾ കയറി വായിൽ നിന്ന് പുറത്തേക്ക് നോക്കാൻ സന്ദർശകർക്ക് അവസരമുണ്ട്. ഡ്രംഹെല്ലറിലെ മ്യൂസിയവും മറ്റ് ദിനോസർ പ്രതിമകളും കാരണം ഈ നഗരം ‘ലോകത്തിന്റെ ദിനോസർ തലസ്ഥാനം’ എന്നാണ് അറിയപ്പെടുന്നത്.
ടൈറ സ്ഥിതി ചെയ്യുന്ന സ്ഥലം നഗരത്തിന്റെ ഉടമസ്ഥതയിലാണെങ്കിലും, ഈ ശിൽപ്പം ഡ്രംഹെല്ലർ & ഡിസ്ട്രിക്റ്റ് ചേംബർ ഓഫ് കൊമേഴ്സിന്റെ ഉടമസ്ഥതയിലാണ്. 2029-ൽ പാട്ടക്കരാർ അവസാനിക്കുമ്പോൾ ദിനോസറിനെ പൊളിച്ചുനീക്കാൻ തീരുമാനിച്ചതായി ചേംബർ ഓഫ് കൊമേഴ്സ് നേരത്തെ പ്രഖ്യാപിച്ചിരുന്നു. ഈ നീക്കത്തിനെതിരെ ശക്തമായ പൊതുജനരോഷമുയർന്നിരുന്നു. ടൈറയെ സംരക്ഷിക്കണമെന്നാവശ്യപ്പെട്ട് 25,000 പേർ ഒപ്പിട്ട ഒരു നിവേദനവും സമർപ്പിക്കപ്പെട്ടു.
ഇതിനെത്തുടർന്ന്, നഗരവും ചേംബറും ട്രാവൽ ഡ്രംഹെല്ലറും ചർച്ചകൾ നടത്തുകയും, അതിന്റെ ഫലമായിട്ടാണ് നിലവിലെ എഞ്ചിനീയറിംഗ് പഠനത്തിന് തീരുമാനമായതും. നഗരത്തിന്റെ അഭിമാനമായ ടൈറയെ രക്ഷിക്കാൻ കഴിയുമെന്ന പ്രതീക്ഷയിലാണ് മേയർ കോൾബർഗ്. ലോകത്തിലെ ഏറ്റവും വലിയ ദിനോസറും, അത് മാത്രമോ ഇത് ലോകത്തിന്റെ ദിനോസർ തലസ്ഥാനമാണെന്ന് അവകാശപ്പെടുമ്പോഴും ആളുകൾ ഇത് കാണാൻ വരുമെന്ന് തന്നെയാണ് പ്രതീക്ഷിക്കുന്നതെന്നും മേയർ കോൾബർഗ് കൂട്ടിച്ചേർത്തു.
