വാന്കൂവര്: ബ്രിട്ടീഷ് കൊളംബിയയുടെ തെക്കൻ തീരപ്രദേശങ്ങളിൽ വരും ദിവസങ്ങളിൽ കനത്ത മഞ്ഞുവീഴ്ചയ്ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. അലാസ്കയിൽ നിന്നുള്ള ശക്തമായ ശൈത്യതരംഗം പ്രവിശ്യയിലേക്ക് നീങ്ങുന്ന പശ്ചാത്തലത്തിൽ മെട്രോ വാൻകൂവർ, സൺഷൈൻ കോസ്റ്റ്, ഹൗ സൗണ്ട്, ഫ്രേസർ വാലി തുടങ്ങിയ മേഖലകളിൽ പ്രത്യേക ജാഗ്രതാ നിർദ്ദേശം പുറപ്പെടുവിച്ചു. തിങ്കളാഴ്ച പുലർച്ചെയോടെ ആരംഭിക്കുന്ന നേരിയ തോതിലുള്ള മഴയും മഞ്ഞുവീഴ്ചയും പിന്നീട് ശക്തിപ്രാപിക്കുമെന്നാണ് എൻവയോൺമെന്റ് കാനഡ റിപ്പോർട്ട് ചെയ്യുന്നത്.
ഉയർന്ന പ്രദേശങ്ങളിൽ അഞ്ച് മുതൽ പത്ത് സെന്റിമീറ്റർ വരെ മഞ്ഞ് വീഴാൻ സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് അധികൃതർ അറിയിച്ചു. തിങ്കളാഴ്ച രാത്രിയോടെ ആദ്യഘട്ട മഞ്ഞുവീഴ്ചയ്ക്ക് ശമനമുണ്ടാകുമെങ്കിലും, ചൊവ്വാഴ്ച മുതൽ വ്യാഴാഴ്ച വരെ അന്തരീക്ഷം അതീവ തണുപ്പിലേക്ക് മാറും. ഈ ദിവസങ്ങളിൽ സമുദ്രനിരപ്പിൽ നിന്നും 100 മുതൽ 400 മീറ്റർ വരെ ഉയരമുള്ള പ്രദേശങ്ങളിൽ ശക്തമായ മഞ്ഞുവീഴ്ചയ്ക്കും താഴ്ന്ന പ്രദേശങ്ങളിൽ മഴ കലർന്ന മഞ്ഞുവീഴ്ചയ്ക്കും സാധ്യതയുണ്ട്.
കനത്ത മഞ്ഞുവീഴ്ചയുള്ള ഇടങ്ങളിൽ റോഡുകളിൽ കാഴ്ചപരിധി കുറയാൻ സാധ്യതയുള്ളതിനാൽ വാഹനയാത്രക്കാർ പ്രത്യേകം ശ്രദ്ധിക്കണമെന്ന് എൻവയോൺമെന്റ് കാനഡ നിർദ്ദേശിച്ചു. റോഡുകളിൽ മഞ്ഞുറഞ്ഞ് വഴുക്കൽ അനുഭവപ്പെടാൻ സാധ്യതയുള്ളതിനാൽ വാഹനങ്ങൾ ശൈത്യകാല യാത്രയ്ക്ക് സജ്ജമാക്കണമെന്ന് ഗതാഗത വകുപ്പും മുന്നറിയിപ്പ് നൽകിയിട്ടുണ്ട്.
പസിഫിക് തീരത്തുനിന്നുള്ള തണുത്ത വായുപ്രവാഹം നിലനിൽക്കുന്നതിനാൽ വരും ദിവസങ്ങളിൽ താപനില ക്രമാതീതമായി കുറയും. കാലാവസ്ഥാ വ്യതിയാനം സൂക്ഷ്മമായി നിരീക്ഷിക്കുകയാണെന്നും അടിയന്തര സാഹചര്യങ്ങൾ നേരിടാൻ പ്രാദേശിക ഭരണകൂടങ്ങൾ സജ്ജമാണെന്നും അധികൃതർ വ്യക്തമാക്കി.
bc-snow-rain-forecast-south-coast
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
