ബ്രിട്ടീഷ് കൊളംബിയ: കാനഡയിലെ ഷോപ്പിംഗ് മാളിനുള്ളിൽ വെച്ച് കാമുകിയെ ക്രൂരമായി കുത്തിക്കൊലപ്പെടുത്തിയ കേസിൽ പ്രതിയുടെ ശിക്ഷാ നടപടികളിൽ വംശീയ പശ്ചാത്തലം (Race and Culture) പരിഗണിച്ച കോടതി വിധി ശ്രദ്ധേയമാകുന്നു. 2021-ൽ നടന്ന മെലിസ ബ്ലിംകി കൊലപാതക കേസിൽ പ്രതിയായ എവർട്ടൺ ജാവുൻ ഡൗണിക്ക് (35), പരോളിന് അപേക്ഷിക്കാനുള്ള കാലാവധി 12 വർഷമായി കോടതി നിശ്ചയിച്ചു. പ്രതിയുടെ വംശീയ പശ്ചാത്തലവും സാമൂഹിക സാഹചര്യങ്ങളും കണക്കിലെടുത്താണ് ഈ തീരുമാനമെന്ന് കോടതി രേഖകൾ വ്യക്തമാക്കുന്നു.
2021 ഡിസംബർ 19-നാണ് കേസിനാസ്പദമായ സംഭവം നടന്നത്. മെട്രോ ടൗൺ ഷോപ്പിംഗ് സെന്ററിലെ ഗോവണിപ്പടിയിൽ വെച്ച് മെലിസ ബ്ലിംകിയെ എവർട്ടൺ 15 തവണയാണ് കുത്തി പരിക്കേൽപ്പിച്ചത്. കൊലപാതകത്തിന് ശേഷം രക്ഷപ്പെട്ട പ്രതി, സമീപത്തെ വീടുകളിൽ അതിക്രമിച്ചു കയറുകയും വസ്ത്രം മാറി വേഷപ്രച്ഛന്നനാവുകയും ചെയ്തു. പിന്നീട് സ്വയം പോലീസിൽ കീഴടങ്ങുകയായിരുന്നു.
എന്നാൽ, കീഴടങ്ങി വിട്ടയക്കപ്പെട്ടതിന് തൊട്ടുപിന്നാലെ ഡിസംബർ 20-ന് പ്രതി ഒരു ബാങ്ക് കവർച്ചയും നടത്തി. ഈ കേസിൽ ഇയാൾക്ക് നേരത്തെ നാല് വർഷം തടവ് ശിക്ഷ ലഭിച്ചിരുന്നു. കാമുകിയെ കൊലപ്പെടുത്തിയ കേസിൽ രണ്ടാം ഡിഗ്രി കൊലപാതക കുറ്റമാണ് ഇയാൾക്കെതിരെ ചുമത്തിയത്. ജീവപര്യന്തം തടവ് ശിക്ഷ ലഭിക്കാവുന്ന ഈ കുറ്റകൃത്യത്തിൽ പരോളിന് അപേക്ഷിക്കാനുള്ള കുറഞ്ഞ കാലാവധി 10 മുതൽ 25 വർഷം വരെയാണ്.
പ്രതിക്ക് 13 മുതൽ 15 വർഷം വരെ പരോൾ നിരോധനം വേണമെന്ന് പ്രോസിക്യൂഷൻ വാദിച്ചപ്പോൾ, പ്രതിഭാഗം 12 വർഷമാണ് ആവശ്യപ്പെട്ടത്. വിധി പ്രസ്താവനയിൽ പ്രതിയുടെ ‘ഇംപാക്ട് ഓഫ് റേസ് ആൻഡ് കൾച്ചർ അസസ്മെന്റ്’ (IRCA) റിപ്പോർട്ട് കോടതി പ്രത്യേകം പരിഗണിച്ചു. കറുത്തവർഗ്ഗക്കാരനായ പ്രതി നേരിട്ട വംശീയമായ വിവേചനങ്ങളും, വളർച്ചാ ഘട്ടത്തിലുണ്ടായ സാമൂഹിക പിന്നോക്കാവസ്ഥയും കുറ്റകൃത്യത്തിലേക്ക് നയിച്ച ഘടകങ്ങളായി വിലയിരുത്തപ്പെട്ടു.
ബാല്യകാലത്തെ കടുത്ത ദാരിദ്ര്യവും അസ്ഥിരതയും, ചെറുപ്പത്തിൽ നേരിടേണ്ടി വന്ന അക്രമങ്ങളും മാനസികാഘാതങ്ങളും, ബ്രിട്ടീഷ് കൊളംബിയയിലേക്ക് മാറിയപ്പോൾ നേരിട്ട ഒറ്റപ്പെടലും വംശീയ അധിക്ഷേപങ്ങളും,. ചികിത്സിക്കപ്പെടാതെ പോയ മാനസികാരോഗ്യ പ്രശ്നങ്ങൾ എന്നിവയാണ് കോടതി പരിഗണിച്ച പ്രധാന കാര്യങ്ങൾ എന്ന് പറയുന്നത്.
പ്രതിക്ക് ഒട്ടേറെ ക്രിമിനൽ പശ്ചാത്തലമുണ്ടെന്ന് കോടതി കണ്ടെത്തിയിട്ടുണ്ട്. 2007 മുതൽ ആയുധം കൈവശം വെക്കൽ, സായുധ കവർച്ച തുടങ്ങി നിരവധി കേസുകളിൽ ഇയാൾ ശിക്ഷിക്കപ്പെട്ടിട്ടുണ്ട്. എന്നാൽ ഇയാളുടെ ക്രിമിനൽ പശ്ചാത്തലത്തിന്റെ കാഠിന്യം, സാമൂഹികമായ പിന്നോക്കാവസ്ഥ കണക്കിലെടുത്ത് ഒരു പരിധിവരെ ലഘൂകരിക്കപ്പെടുകയായിരുന്നു.
അതേസമയം, വംശീയത പരിഗണിച്ച് ശിക്ഷ കുറച്ചു എന്ന വാദത്തെ പ്രതിഭാഗം അഭിഭാഷകൻ ക്രിസ് ജോൺസൺ നിഷേധിച്ചു. സമാനമായ കേസുകളിൽ വംശീയത പരിഗണിച്ചില്ലെങ്കിലും 12 മുതൽ 15 വർഷം വരെയുള്ള കാലാവധിയാണ് നൽകാറുള്ളതെന്നും, നിയമപരമായ നടപടിക്രമങ്ങൾ മാത്രമാണ് ഇവിടെ പാലിക്കപ്പെട്ടതെന്നും അദ്ദേഹം വ്യക്തമാക്കി. കൊല്ലപ്പെട്ട മെലിസയുടെ കുടുംബത്തോട് പ്രതി കോടതിയിൽ മാപ്പപേക്ഷിച്ചു.
വംശീയവും സാമൂഹികവുമായ സാഹചര്യങ്ങൾ കുറ്റകൃത്യങ്ങളെ എങ്ങനെ സ്വാധീനിക്കുന്നു എന്നതിനെക്കുറിച്ചുള്ള ഗൗരവകരമായ ചർച്ചകൾക്ക് ഈ വിധി കാനഡയിൽ വഴിതുറന്നിരിക്കുകയാണ്.
bc-man-stabbed-killed-girlfriend-lighter-sentence-race
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
