വാങ്കൂവർ: കാനഡ റെവന്യൂ ഏജൻസിയിലെ (സിആർഎ) ഉദ്യോഗസ്ഥൻ നികുതിദായകരുടെ വ്യക്തിഗത വിവരങ്ങൾ ചോർത്തിയ സംഭവത്തിൽ അറസ്റ്റിലായി. ബ്രിട്ടീഷ് കൊളംബിയ സ്വദേശിയായ യോവാൻ സോള (35) ആണ് വർഷങ്ങൾ നീണ്ട അന്വേഷണത്തിനൊടുവിൽ റോയൽ കനേഡിയൻ മൗണ്ടഡ് പോലീസ് (ആർസിഎംപി) പിടിയിലായത്. നികുതിദായകരുടെ രഹസ്യവിവരങ്ങൾ ദുരുപയോഗം ചെയ്ത് വിവിധ തരം തട്ടിപ്പുകൾ നടത്തിയതിനാണ് ഇയാൾക്കെതിരെ കേസെടുത്തിരിക്കുന്നത്.
നാല് വർഷത്തോളമായി പോലീസ് ഇയാളെ നിരീക്ഷിച്ചു വരികയായിരുന്നു. 2022 മാർച്ചിലാണ് സിആർഎ ഉദ്യോഗസ്ഥൻ നികുതിദായകരുടെ വിവരങ്ങളിൽ കൃത്രിമം കാണിക്കുന്നതായി ഏജൻസിക്ക് പരാതി ലഭിക്കുന്നത്. തുടർന്ന് ആർസിഎംപിയുടെ ഫെഡറൽ പോലീസിങ് പസഫിക് റീജിയണിലെ സെൻസിറ്റീവ് ഇൻവെസ്റ്റിഗേഷൻ യൂണിറ്റ് കേസ് ഏറ്റെടുക്കുകയായിരുന്നു. ജനുവരി 29-നാണ് വാങ്കൂവറിൽ വെച്ച് പ്രതിയെ പോലീസ് അറസ്റ്റ് ചെയ്തത്.
വ്യാജരേഖ ചമയ്ക്കൽ, വ്യക്തിത്വം മോഷ്ടിക്കൽ (Identity Theft), വിശ്വാസവഞ്ചന, ക്രെഡിറ്റ് കാർഡ് തട്ടിപ്പ്, 5000 ഡോളറിൽ താഴെയുള്ള സാമ്പത്തിക തട്ടിപ്പ് തുടങ്ങി ആറോളം ഗുരുതരമായ കുറ്റങ്ങളാണ് പ്രതിക്കെതിരെ ചുമത്തിയിരിക്കുന്നത്. നികുതിദായകരുടെ വിവരങ്ങൾ എത്രത്തോളം ചോർന്നു എന്നതിൽ വ്യക്തത വന്നിട്ടില്ലെങ്കിലും, വിവരങ്ങൾ ദുരുപയോഗം ചെയ്യപ്പെട്ട വ്യക്തികളെ അധികൃതർ നേരിട്ട് വിവരം അറിയിച്ചിട്ടുണ്ട്. 2022-ൽ അന്വേഷണം തുടങ്ങിയതിന് പിന്നാലെ ഇയാൾ സിആർഎയിൽ തുടർന്നിരുന്നോ എന്ന കാര്യത്തിൽ ഏജൻസി ഇതുവരെ പ്രതികരിച്ചിട്ടില്ല.
നിലവിൽ കോടതിയിൽ കേസ് നിലനിൽക്കുന്നതിനാൽ കൂടുതൽ വിവരങ്ങൾ പുറത്തുവിടാൻ പോലീസ് തയ്യാറായിട്ടില്ല. നിലവിൽ ജാമ്യത്തിലിറങ്ങിയ യോവാൻ സോള ഏപ്രിൽ 16-ന് വീണ്ടും കോടതിയിൽ ഹാജരാകണം. കാനഡയിലെ നികുതിദായകരുടെ സുരക്ഷയെ ബാധിക്കുന്ന ഗൗരവകരമായ സംഭവമായതിനാൽ അതീവ ജാഗ്രതയോടെയാണ് ഭരണകൂടം ഈ കേസിനെ കാണുന്നത്. കേസിൽ സിആർഎയുടെ കൂടുതൽ ഔദ്യോഗിക പ്രതികരണങ്ങൾക്കായി കാത്തിരിക്കുകയാണ് മാധ്യമങ്ങൾ.
bc-cra-employee-charged-after-taxpayer-information-allegedly-compromised
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
