ബാരി : ജലപരിശോധന വാഗ്ദാനം ചെയ്ത് പ്രദേശവാസികളെ കബളിപ്പിക്കുന്ന പുതിയ തട്ടിപ്പ് സംഘത്തെക്കുറിച്ച് കാനഡയിലെ ബാരി നഗരസഭ മുന്നറിയിപ്പ് നൽകി. നഗരസഭാ ഉദ്യോഗസ്ഥരെന്ന വ്യാജേന ജനങ്ങളെ ഫോണിലൂടെ ബന്ധപ്പെട്ട് ജലപരിശോധനാ സേവനങ്ങൾ വാഗ്ദാനം ചെയ്യുന്നതായാണ് റിപ്പോർട്ടുകൾ. എന്നാൽ നഗരസഭ ഇത്തരത്തിൽ ആരെയും വിളിക്കാറില്ലെന്നും പരിശോധനകൾക്കായി മൂന്നാം കക്ഷി കമ്പനികളെ ചുമതലപ്പെടുത്തിയിട്ടില്ലെന്നും അധികൃതർ വ്യക്തമാക്കി.
ഭൂഗർഭ സ്രോതസ്സുകളിൽ നിന്നും കെംപെൻഫെൽറ്റ് ബേയിലെ ഉപരിതല ജലത്തിൽ നിന്നുമാണ് ബാരി നഗരത്തിലേക്ക് കുടിവെള്ളം എത്തിക്കുന്നത്. ഇത് കൃത്യമായ ശുദ്ധീകരണ പ്രക്രിയകൾക്ക് ശേഷമാണ് വിതരണം ചെയ്യുന്നതെന്നും പൊതുജനാരോഗ്യത്തിന് ഭീഷണിയാകുന്ന രീതിയിലുള്ള പ്രശ്നങ്ങൾ നിലവിലില്ലെന്നും നഗരസഭ അറിയിച്ചു. 2025-ൽ പുറത്തിറക്കിയ റിപ്പോർട്ട് പ്രകാരം ബാരിയിലെ കുടിവെള്ളം പ്രവിശ്യാ സുരക്ഷാ മാനദണ്ഡങ്ങൾ പാലിക്കുന്നതാണെന്നും അതിനാൽ താമസക്കാർ സ്വന്തം നിലയിൽ പരിശോധനകൾ നടത്തേണ്ട ആവശ്യമില്ലെന്നും അധികൃതർ കൂട്ടിച്ചേർത്തു.
ഒന്റാരിയോ സേഫ് ഡ്രിങ്കിംഗ് വാട്ടർ ആക്ട് പ്രകാരമുള്ള എല്ലാ നിയമങ്ങളും പാലിച്ചാണ് ജലവിതരണമെന്നും പരിസ്ഥിതി, സംരക്ഷണ, വനം വകുപ്പുകളുടെ നിരീക്ഷണത്തിൽ കൃത്യമായ ഇടവേളകളിൽ പരിശോധനകൾ നടത്തുന്നുണ്ടെന്നും നഗരസഭ വ്യക്തമാക്കി. സുരക്ഷിതവും വിശ്വസനീയവുമായ കുടിവെള്ളം ലഭ്യമാക്കാൻ വിപുലമായ സംവിധാനങ്ങളാണ് നഗരത്തിൽ ഒരുക്കിയിരിക്കുന്നത്. ജലപരിശോധനയ്ക്കായി ആരെങ്കിലും സമീപിച്ചാൽ ജാഗ്രത പാലിക്കണമെന്നും നഗരസഭ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Fraud in the name of water testing: Bari Municipality issues warning
