ഇസ്രായേലുമായുള്ള ഏറ്റുമുട്ടലിൽ ഇറാൻ വിജയം നേടിയെന്ന് ഇറാൻ പരമോന്നത നേതാവ് ആയത്തുല്ല അലി ഖാമെനെയി വ്യക്തമാക്കി. “അമേരിക്കയുടെ മുഖത്തൊരു പ്രഹരം നൽകി” എന്ന് അദ്ദേഹം കൂട്ടിച്ചേർത്തു. ഇസ്രായേലും അമേരിക്കയും നടത്തിയ ആക്രമണങ്ങളെത്തുടർന്ന് ഖാമെനെയി ഒരു രഹസ്യ കേന്ദ്രത്തിലായിരുന്നുവെന്ന് റിപ്പോർട്ടുകളുണ്ടായിരുന്നു.
ഇസ്രായേൽ ഇറാന്റെ ആണവ കേന്ദ്രങ്ങളെയും സൈനിക ഉദ്യോഗസ്ഥരെയും ശാസ്ത്രജ്ഞരെയും ലക്ഷ്യമിട്ട് ആക്രമണം നടത്തിയതിന് പിന്നാലെയാണ് ഖാമെനെയി പൊതുരംഗത്ത് നിന്ന് അപ്രത്യക്ഷനായത്. ജൂൺ 22-ന് അമേരിക്ക ഇറാന്റെ നേർക്ക് വലിയ തോതിലുള്ള ബോംബാക്രമണം നടത്തിയിരുന്നു. പിന്നാലെ അമേരിക്കൻ പ്രസിഡന്റ് ഡൊണാൾഡ് ട്രംപ് വെടിനിർത്തൽ ചർച്ചകൾക്ക് മുൻകൈയെടുത്തു. അമേരിക്കയുടെ വ്യോമാക്രമണങ്ങൾ ഇറാന്റെ ആണവ പദ്ധതിയെ മാസങ്ങളോളം പിന്നോട്ട് നയിച്ചതായി രഹസ്യാന്വേഷണ റിപ്പോർട്ടുകൾ സൂചിപ്പിക്കുന്നുണ്ട്.
ഇറാന്റെ പ്രധാന ആണവ കേന്ദ്രങ്ങളിൽ ചിലത് തകരുകയും അവ പുനർനിർമ്മിക്കാൻ വർഷങ്ങളെടുക്കുമെന്നും സി.ഐ.എ. ഡയറക്ടർ ജോൺ റാറ്റ്ക്ലിഫ് വ്യക്തമാക്കി. അമേരിക്കൻ ഇടപെടലിന് മറുപടിയായി, ഖത്തറിലുള്ള അമേരിക്കൻ സൈനിക കേന്ദ്രത്തിലേക്ക് ഇറാൻ ബാലിസ്റ്റിക് മിസൈലുകൾ അയച്ചു. മേഖലയിലെവിടെയുമുള്ള അമേരിക്കൻ താൽപ്പര്യങ്ങളെ ആക്രമിക്കാൻ ഇസ്ലാമിക് റിപ്പബ്ലിക്കിന് കഴിവുണ്ടെന്ന് ഖാമനെഇ മുന്നറിയിപ്പ് നൽകി.
യുദ്ധത്തിൽ ഇറാന്റെ ഭാഗത്ത് 627 പേർ കൊല്ലപ്പെടുകയും 5,000 പേർക്ക് പരിക്കേൽക്കുകയും ചെയ്തതായി റിപ്പോർട്ടുകളുണ്ട്. അതേസമയം, ഇസ്രായേലിൽ 28 പേർക്കാണ് ജീവൻ നഷ്ടപ്പെട്ടത്. മാധ്യമങ്ങൾക്കും വിദേശ നിരീക്ഷകർക്കും ഇറാനിലെ സാഹചര്യങ്ങൾ വിലയിരുത്തുന്നതിന് നിയന്ത്രണങ്ങളുള്ളതിനാൽ യഥാർത്ഥ നഷ്ടത്തിന്റെ വ്യാപ്തി സ്ഥിരീകരിക്കാൻ കഴിഞ്ഞിട്ടില്ല.
അതേസമയം, യുദ്ധകാലത്ത് ഇസ്രായേലുമായി സഹകരിച്ചുവെന്നാരോപിച്ച് 3 പേരെ ഇറാൻ വധശിക്ഷയ്ക്ക് വിധിച്ചു. ഇസ്രായേലുമായി ബന്ധമുണ്ടെന്ന് ആരോപിച്ച് 700 പേരെ അറസ്റ്റ് ചെയ്തതായും റിപ്പോർട്ടുകൾ വ്യക്തമാക്കി. ഈ സാഹചര്യത്തിൽ, ഖാമെനെയിയുടെ തിരിച്ച് വരവ് ഇറാന്റെ ഭരണ സംവിധാനത്തിന് ശക്തി പകരുമെന്ന് വിലയിരുത്തപ്പെടുന്നു. യുദ്ധത്തിനിടെ ഇസ്രായേൽ പ്രധാനമന്ത്രി നെതന്യാഹുവിനെതിരെയുള്ള അഴിമതിക്കേസ് ഒഴിവാക്കാൻ ട്രംപ് ആവശ്യപ്പെട്ടത് വലിയ രാഷ്ട്രീയ വിവാദങ്ങൾക്കും വഴിവെച്ചിരുന്നു. ഒരു സ്വതന്ത്ര രാജ്യത്തിന്റെ നിയമപരമായ കാര്യങ്ങളിൽ അമേരിക്കൻ പ്രസിഡന്റിന് ഇടപെടാൻ അവകാശമില്ലെന്ന് നെതന്യാഹുവിന്റെ ഇസ്രയേലിന്റെ പ്രതിപക്ഷ നേതാവ് യയിർ ലാപിഡ് പ്രതികരിച്ചു.
