മാനിറ്റോബയിലെ കുട്ടികളുടെ സംരക്ഷണത്തിനായി ഫെഡറൽ സർക്കാർ അനുവദിച്ച 1.2 ബില്യൺ ഡോളർ ധനസഹായം ലക്ഷ്യങ്ങൾ നേടുന്നുണ്ടോ എന്ന് പരിശോധിക്കാൻ ഓഡിറ്റർ ജനറൽ “വാല്യൂ ഫോർ മണി” ഓഡിറ്റ് ആരംഭിച്ചു. കുട്ടികൾക്ക് കൂടുതൽ ഡേകെയർ സൗകര്യങ്ങൾ ലഭ്യമാക്കാനും വൈവിധ്യമാർന്ന ആവശ്യങ്ങളുള്ള കുട്ടികളെ ഉൾപ്പെടുത്താനും ഈ ഫണ്ട് സഹായിക്കുന്നുണ്ടോ എന്നാണ് പ്രധാനമായും അന്വേഷിക്കുന്നത്.
ഓഡിറ്റർ ജനറൽ ടൈസൺ ഷ്റ്റിക്കാലോ, മുൻ പ്രോഗ്രസീവ് കൺസർവേറ്റീവ് സർക്കാരിന്റെ കാലത്ത് 22 ഡേകെയർ സെന്ററുകൾ നിർമിച്ച പദ്ധതിയിൽ പ്രത്യേകമായോ അല്ലെങ്കിൽ നിലവിലുള്ള ഓഡിറ്റിന്റെ ഭാഗമായോ അന്വേഷണം നടത്തണമെന്ന വിദ്യാഭ്യാസ ഡെപ്യൂട്ടി മന്ത്രിയുടെ അഭ്യർത്ഥന പരിഗണിച്ചുവരികയാണ്. ജോൺ ക്യു പബ്ലിക് ഇൻക്. എന്ന കമ്പനി കൈകാര്യം ചെയ്ത 100 ദശലക്ഷം ഡോളർ വരുന്ന ഈ പദ്ധതി, 2023-ലെ പി.സി. റീ-ഇലക്ഷൻ ക്യാമ്പയിൻ ഡയറക്ടറുമായി ബന്ധമുള്ള മറ്റൊരു കമ്പനിയുമായി ചേർന്ന് നടപ്പാക്കിയത് സംശയങ്ങൾക്ക് ഇടയാക്കിയിട്ടുണ്ട്. ‘ബൂം ഡൺ നെക്സ്റ്റ്’ എന്ന കൺസൾട്ടിങ് സ്ഥാപനത്തിന് ലക്ഷക്കണക്കിന് ഡോളർ നൽകിയതായും റിപ്പോർട്ടുകളിൽ പറയുന്നുണ്ട്.
2021-ൽ മാനിറ്റോബ പ്രവിശ്യയും ഫെഡറൽ സർക്കാരും ചേർന്ന് ഒപ്പുവെച്ച 1.2 ബില്യൺ ഡോളർ കരാറിന്റെ പ്രധാന ലക്ഷ്യങ്ങൾ, 2023 മാർച്ചോടെ ഡേകെയർ ഫീസ് 10 ഡോളറായി കുറയ്ക്കുക, സ്റ്റാൻഡേർഡ് വേതനം ഉറപ്പാക്കുക, 2026-ഓടെ 23,000 പുതിയ ഡേകെയർ ഇടങ്ങൾ സൃഷ്ടിക്കുക എന്നിവയായിരുന്നു. ഓഡിറ്റർ ജനറലിന്റെ ഓഫീസിന്റെ വെബ്സൈറ്റിൽ പ്രസിദ്ധീകരിച്ച വിവരമനുസരിച്ച്, നിലവിലെ ഓഡിറ്റ് വിദ്യാഭ്യാസ വകുപ്പിന്റെ പദ്ധതികളും പ്രക്രിയകളും ഈ കരാറിലെ വ്യവസ്ഥകൾ പാലിക്കുന്നുണ്ടോയെന്ന് പരിശോധിക്കും. ഇത് തുടക്കത്തിൽ തന്നെ ഞങ്ങൾ ആസൂത്രണം ചെയ്ത ഓഡിറ്റായിരുന്നു. വിദ്യാഭ്യാസ വകുപ്പിന്റെ അഭ്യർത്ഥന അതിനിടെയാണ് ലഭിച്ചതെന്ന് ടൈസൺ ഷ്റ്റിക്കാലോ പറഞ്ഞു.
2024 ഏപ്രിൽ 25-ന് വിദ്യാഭ്യാസ ഡെപ്യൂട്ടി സെക്രട്ടറി ബ്രയാൻ ഓ’ലീറി നിയമസഭയിൽ സമർപ്പിച്ച കത്തിൽ, ഈ 22 ഡേകെയർ കേന്ദ്രങ്ങളുടെ നിർമാണം സാധാരണ പ്രൊക്യൂർമെന്റ് നിയമങ്ങൾ പാലിച്ചില്ലെന്ന് സംശയം പ്രകടിപ്പിച്ചിരുന്നു.
ഈ വിഷയത്തിൽ പ്രത്യേക അന്വേഷണം നടത്തണമോ എന്ന് ഇപ്പോഴും പരിഗണനയിലാണെന്ന് ഷ്റ്റിക്കാലോ വ്യക്തമാക്കി. ഇത് പ്രധാന ഓഡിറ്റിന്റെ ഭാഗമാക്കാനോ അല്ലെങ്കിൽ ഒരു പ്രത്യേക അന്വേഷണമായി തുടങ്ങാനോ സാധ്യതയുണ്ട്.
അന്വേഷണം തുടങ്ങാൻ തീരുമാനിച്ചാൽ, അതിന്റെ റിപ്പോർട്ട് നിയമസഭയിൽ സമർപ്പിക്കും വരെ ഔദ്യോഗികമായി പ്രഖ്യാപിക്കില്ലെന്നും അദ്ദേഹം പറഞ്ഞു. ഓഡിറ്റർ ജനറലിന്റെ റിപ്പോർട്ട് സമർപ്പിക്കാൻ സാധാരണയായി ഒന്നോ രണ്ടോ വർഷം എടുക്കാറുണ്ട്. വിദ്യാഭ്യാസ മന്ത്രി ട്രേസി ഷ്മിഡ് ഓഡിറ്ററുടെ നടപടിയെ സ്വാഗതം ചെയ്തു. എന്നാൽ, ജോൺ ക്യു സി.ഇ.ഒ. കോളിൻ സ്ക്ലാർക്കിന്റെയോ ബൂം ഡൺ നെക്സ്റ്റിലെ ജോ ലൂസ്സിക്കിന്റെയോ പ്രതികരണം ലഭ്യമായിട്ടില്ല.
