അറ്റ്ലാൻ്റിക് മേഖലയിലെ നാല് പദ്ധതികൾക്കായി എമർജൻസി ട്രീറ്റ്മെൻ്റ് ഫണ്ടിൽ (ETF) നിന്ന് 2.8 മില്യൺ ഡോളർ ധന സഹായം നൽകുമെന്ന് ആരോഗ്യ മന്ത്രി മാർജോറി മൈക്കൽ പ്രഖ്യാപിച്ചു. ന്യൂ ബ്രൺസ്വിക്കിലെ ഫ്രെഡറിക്ടൺ, മിറാമിചി, നോവ സ്കോഷ്യയിലെ ആംഹെർസ്റ്റ്, ന്യൂഫൗണ്ട്ലാൻഡിലെ സെൻ്റ് ജോൺസ് എന്നിവിടങ്ങളിൽ ഈ തുക നേരിട്ട് പ്രയോജനം ചെയ്യും.
നഗരങ്ങളിലും ഫസ്റ്റ് നേഷൻസ്, ഇൻയൂട്ട്, മെറ്റിസ് ഏരിയകളിലും വർദ്ധിച്ചു വരുന്ന മയക്കുമരുന്നിന്റെ അമിത ഉപയോഗം മൂലമുള്ള പ്രതിസന്ധി നേരിടുന്ന കമ്മ്യൂണിറ്റികളെ വേഗത്തിൽ സഹായിക്കുന്നതിനുള്ള കനേഡിയൻ ഗവൺമെൻ്റിൻ്റെ ശ്രമങ്ങളുടെ ഭാഗമാണ് ETF. കൂടുതൽ കഷ്ടപ്പെടുന്നവരെ സഹായിക്കാൻ അതത് പ്രദേശങ്ങളിലെ സംവിധാനങ്ങൾ മെച്ചപ്പെടുത്താനായി ഈ ഫണ്ട് അടിയന്തര പിന്തുണ നൽകും.
ഫ്രെഡറിക്ടൺ സിറ്റിയും ജോൺ ഹോവാർഡ് സൊസൈറ്റിയും ചേർന്ന് നടത്തുന്ന മൊബൈൽ ഔട്ട്റീച്ച് പദ്ധതി മന്ത്രി മാർജോറി മൈക്കൽ എടുത്തു പറഞ്ഞു. ഫ്രെഡറിക്ടണിലെ ദുർബലരായ ജന വിഭാഗങ്ങളെ പിന്തുണയ്ക്കാനാണ് ഈ പദ്ധതി ലക്ഷ്യമിടുന്നത്. ഇതിൻ്റെ ഭാഗമായി രാത്രികാല സേവനങ്ങൾ കൂടി ചേർത്ത് പ്രവർത്തനങ്ങൾ വികസിപ്പിക്കും. ആവശ്യമായ സാധനങ്ങൾ എത്തിക്കുക, പ്രധാന സേവനങ്ങളിലേക്ക് ഗതാഗത സൗകര്യം ഒരുക്കുക, നലോക്സോൺ വിതരണം ചെയ്യുക, ഓവർഡോസ് പിന്തുണയും കാലാവസ്ഥാ മുന്നറിയിപ്പുകളും വർഷം മുഴുവൻ ലഭ്യമാക്കുക എന്നിവയെല്ലാം ഈ പദ്ധതിയുടെ ഭാഗമാണ്.
