ആൽബർട്ട പ്രീമിയർ ഡാനിയേൽ സ്മിത്ത് നിലവിലെ സ്പീക്കർ നാഥൻ കൂപ്പറെ പ്രവിശ്യയുടെ പുതിയ വാഷിംഗ്ടൺ പ്രതിനിധിയായി നിയമിച്ചു. അമേരിക്കൻ പ്രസിഡന്റ് ഡൊണാൾഡ് ട്രംപ് വാഹനങ്ങൾ, സ്റ്റീൽ, അലൂമിനിയം തുടങ്ങിയവയ്ക്ക് തീരുവ ഏർപ്പെടുത്തുമെന്ന് ഭീഷണിപ്പെടുത്തിയതിനെ തുടർന്ന് കാനഡ-യു.എസ് വ്യാപാര ബന്ധങ്ങൾ സങ്കീർണമാകുന്ന സാഹചര്യത്തിലാണ് ഈ നിയമനം.
അന്താരാഷ്ട്ര കാര്യങ്ങളിൽ മുൻപരിചയമില്ലാത്ത കൂപ്പർ, അഞ്ചു വർഷത്തോളം വാഷിംഗ്ടണിൽ ആൽബർട്ടയുടെ പ്രതിനിധിയായിരുന്ന ജെയിംസ് രാജോട്ടിന്റെ സ്ഥാനം ഏറ്റെടുക്കും. വ്യാപാര പ്രശ്നങ്ങൾ ചർച്ച ചെയ്യാൻ പ്രീമിയർ സ്മിത്ത് അടുത്തിടെ പല തവണ അമേരിക്കയിലേക്ക് സന്ദർശനം നടത്തിയിരുന്നു.
“ഈ നിയമനത്തോടെ ആൽബർട്ടയുടെ വ്യാപാര താൽപ്പര്യങ്ങൾ സംരക്ഷിക്കാനുള്ള ഞങ്ങളുടെ പ്രതിബദ്ധത വ്യക്തമാക്കുന്നു. ഇതൊരു നിർണായക സമയമാണ്, നമ്മുടെ പ്രൊവിൻസിനെ അന്താരാഷ്ട്ര തലത്തിൽ പ്രതിനിധീകരിക്കാൻ നാഥൻ കൂപ്പറെക്കാൾ മികച്ച വ്യക്തിയില്ല,” എന്ന് പ്രീമിയർ സ്മിത്ത് പറഞ്ഞു.
കൂപ്പറുടെ രാജിയോടെ സ്പീക്കർ സ്ഥാനത്തേക്കും ഓൾഡ്സ്-ഡിഡ്സ്ബറി-ത്രീ ഹിൽസ് മണ്ഡലത്തിലേക്കും ഉപതിരഞ്ഞെടുപ്പുകൾ നടത്തേണ്ടിവരും. യുണൈറ്റഡ് കൺസർവേറ്റീവ് പാർട്ടിക്ക് നിയമസഭയിൽ താൽക്കാലികമായി 46 അംഗങ്ങൾ മാത്രമായി ചുരുങ്ങും.
