ശത്രുവിനെ തുരത്താൻ മറ്റൊരു ശത്രു! ജാപ്പനീസ് വണ്ടുകളെ നശിപ്പിക്കാൻ വിൻസം ഈച്ചകളെത്തുന്നു

കാംലൂപ്‌സിൽ അടുത്തിടെ കണ്ടെത്തിയ വിനാശകാരികളായ ജാപ്പനീസ് വണ്ടുകളെ ചെറുക്കാൻ മറ്റൊരു വിനാശകാരിയായ ജീവിക്ക് സാധിക്കുമെന്ന പ്രതീക്ഷയിലാണ് ഗവേഷകർ. കാംലൂപ്‌സ്, ബിസി നഗരത്തിന്റെ പ്രാന്തപ്രദേശങ്ങളിൽ അടുത്തിടെയായി ജാപ്പനീസ് വണ്ടുകളുടെ സാന്നിധ്യം കണ്ടെത്തിയിരുന്നു. വിൻസം ഫ്ലൈ (Winsome Fly) എന്ന് പേരിട്ടിട്ടുള്ള ഈ ഈച്ചകൾക്ക്, ജാപ്പനീസ് വണ്ടുകളെ ഇല്ലാതാക്കാൻ സാധിക്കുമെന്നാണ് ഗവേഷകരുടെ പക്ഷം. കാംലൂപ്‌സിനടുത്ത് ലോവർ മെയ്ൻലാൻഡിൽ മാത്രമാണ് ഇതിനു മുൻപ് കാനഡയിൽ ജാപ്പനീസ് വണ്ടുകളെ കണ്ടെത്തിയിട്ടുള്ളത്. പുൽമേടുകളെയും കാർഷിക വിളകളെയും തദ്ദേശീയ സസ്യങ്ങളെയും നശിപ്പിക്കുന്ന ഈ വണ്ടുകൾ, കനേഡിയൻ ഭക്ഷ്യ പരിശോധനാ ഏജൻസി (CFIA) യുടെയും ഇൻവേസീവ് സ്പീഷീസ് കൗൺസിൽ ഓഫ് ബിസി (Invasive Species Council of B.C) യുടെയും ശ്രദ്ധയിൽപ്പെട്ടിട്ടുണ്ട്.

സാധാരണയായി വീടുകളിൽ കാണുന്ന ഈച്ചകളെപ്പോലെ തോന്നുമെങ്കിലും, വിൻസം ഈച്ചകൾ വളരെ വ്യത്യസ്തമാണ്. ജാപ്പനീസ് വണ്ടുകളുടെ മുട്ടകളിൽ സ്വന്തം മുട്ടകൾ നിക്ഷേപിക്കുക എന്നതാണ് ഇവയുടെ പ്രധാന ദൗത്യം. മുട്ടകൾ വിരിഞ്ഞാലുടൻ ഈച്ചയുടെ ലാർവകൾ വണ്ടുകളുടെ ശരീരത്തിനുള്ളിൽ പ്രവേശിച്ച് വളരുന്നു. ഇതോടെ വണ്ടുകൾ സ്വയം ചാവുന്നു. ലാർവകൾ പിന്നീട് അടുത്ത വസന്തകാലത്ത് ഈച്ചകളായി രൂപാന്തരപ്പെട്ട് പുതിയ വണ്ടുകളെ തേടി മണ്ണിൽനിന്നു പുറത്തുവരും. ജാപ്പനീസ് വണ്ടുകളെ നശിപ്പിക്കുന്നതിന് ഈ രീതി സഹായകരമാകുമെന്ന് അഗ്രികൾച്ചർ ആൻഡ് അഗ്രി-ഫുഡ് കാനഡയിലെ ഗവേഷകനായ പോൾ അബ്രാം പറയുന്നു.

ക്യുബെക്കിലെ ചില പ്രദേശങ്ങളിൽ 75 ശതമാനം ജാപ്പനീസ് വണ്ടുകളെയും നശിപ്പിക്കാൻ വിൻസം ഈച്ചകൾക്ക് കഴിഞ്ഞിട്ടുണ്ടെന്ന് ഗവേഷകർ സാക്ഷ്യപ്പെടുത്തുന്നു. എന്നാൽ കാംലൂപ്‌സിലെ വരണ്ട കാലാവസ്ഥ വിൻസം ഈച്ചകൾക്ക് അനുയോജ്യമാണോ എന്ന ചോദ്യമുയരുന്നുണ്ട്. ജപ്പാനിലെ ഈർപ്പമുള്ള കാലാവസ്ഥയിൽ ജീവിച്ചുശീലിച്ച വിൻസം ഈച്ചകൾക്ക് കാംലൂപ്‌സിലെ കാലാവസ്ഥയിൽ അതിജീവിക്കാൻ കഴിഞ്ഞേക്കില്ല. എന്നിരുന്നാലും, മഞ്ഞുവീഴ്ചയെ ഇഷ്ടപ്പെടുന്ന ഈച്ചകൾക്ക് കാംലൂപ്‌സിലെ തണുത്ത കാലാവസ്ഥ സഹായകമായേക്കാം എന്നും പോൾ അബ്രാം കൂട്ടിച്ചേർക്കുന്നു.
പരിസ്ഥിതി സൗഹൃദപരമായ ഈ രീതി ജാപ്പനീസ് വണ്ടുകളെ പൂർണ്ണമായി ഇല്ലാതാക്കുമെന്ന് ഉറപ്പില്ലെങ്കിലും, വലിയൊരളവുവരെ ഇവയെ നിയന്ത്രിക്കാൻ സാധിക്കുമെന്നാണ് ഗവേഷകരുടെ പ്രതീക്ഷ. ഒരു ജീവിയെക്കൊണ്ട് മറ്റൊരു ജീവിയെ നശിപ്പിക്കുന്ന ഇത്തരം ജൈവിക നിയന്ത്രണ രീതികളിൽ മുൻപ് സുരക്ഷാ പ്രശ്നങ്ങൾ ഉണ്ടായിട്ടുണ്ട്.

കരിമ്പിൻ തോട്ടങ്ങളിലെ കീടങ്ങളെ നിയന്ത്രിക്കാൻ തെക്കേ അമേരിക്കയിൽനിന്ന് കാനയിലേക്കു കൊണ്ടുവന്ന കരിമ്പ് തവളകൾ (Cane toad) പിന്നീട് ലോകത്തിലെ ഏറ്റവും വലിയ വിനാശകാരികളിലൊന്നായി മാറിയിരുന്നു. എന്നാൽ വിൻസം ഈച്ചകളുടെ കാര്യത്തിൽ അത്തരം സുരക്ഷാ പ്രശ്നങ്ങളില്ലെന്നും വണ്ടുകളുടെ എണ്ണം കുറയുന്നതിനനുസരിച്ച് ഈച്ചകളുടെയും എണ്ണം കുറയുമെന്നും ഗവേഷകർ പറയുന്നു. നിലവിൽ, ജാപ്പനീസ് വണ്ടുകളെ കണ്ടെത്തുന്നവർ അവയെ കുടുക്കി ഫ്രീസറിൽ വെച്ച് സിഎഫ്ഐഎയെ അറിയിക്കണമെന്ന് ഏജൻസി ആവശ്യപ്പെട്ടിട്ടുണ്ട്. വണ്ടുകളുടെ സാന്നിധ്യം കണ്ടെത്തിയ പ്രദേശങ്ങൾ അടയാളപ്പെടുത്തുന്നതിന് ഇത് സഹായകമാകുമെന്നും അവർ കൂട്ടിച്ചേർത്തു.

Another enemy to chase away! Winsome flies arrive to destroy Japanese beetles