ക്യുബെക്ക്: ക്യുബെക്ക് പ്രവിശ്യയിലുള്ള സിസ്കോ (Cisco) ലിഥിയം പദ്ധതി പ്രദേശത്ത് വൻതോതിലുള്ള ലിഥിയം ശേഖരം കണ്ടെത്തി. ഏകദേശം 36 കോടി ടൺ അയിര് ഈ പ്രദേശത്ത് ഉണ്ടെന്നാണ് പ്രാഥമിക നിഗമനം. ഓസ്ട്രേലിയൻ കമ്പനിയായ ഫ്ലീറ്റ് സ്പേസ് ടെക്നോളജീസിന്റെ (Fleet Space Technologies) ആധുനിക കൃത്രിമോപഗ്രഹ-ആർട്ടിഫിഷ്യൽ ഇന്റലിജൻസ് സാങ്കേതികവിദ്യ ഉപയോഗിച്ച് നടത്തിയ പര്യവേഷണത്തിലാണ് ഈ കണ്ടെത്തൽ.
ഭൂമിക്കടിയിലെ മാറ്റങ്ങൾ നിരീക്ഷിക്കാൻ ‘എക്സോസ്ഫിയർ’ (ExoSphere) എന്ന പ്ലാറ്റ്ഫോമാണ് പര്യവേഷണത്തിനായി ഉപയോഗിച്ചത്. കൃത്രിമോപഗ്രഹങ്ങളും ഭൂമിയിൽ സ്ഥാപിച്ചിട്ടുള്ള പ്രത്യേക സെൻസറുകളും (Geodes) സംയോജിപ്പിച്ചാണ് ഇത് പ്രവർത്തിക്കുന്നത്. സ്ഫോടനങ്ങളോ ഖനനമോ ഇല്ലാതെ തന്നെ ഭൂമിക്കടിയിലെ ധാതുക്കളുടെ സാന്നിധ്യം തിരിച്ചറിയാൻ ഈ സാങ്കേതികവിദ്യയ്ക്ക് സാധിക്കും.
48 മണിക്കൂറിനുള്ളിൽ കൃത്യമായ മാപ്പുകൾ തയ്യാറാക്കി ഖനനം നടത്തേണ്ട പോയിന്റുകൾ നിശ്ചയിക്കാൻ ഇതുവഴി സാധിക്കുമെന്ന് കമ്പനി അവകാശപ്പെടുന്നു.
ക്യബെക്കിലെ ജെയിംസ് ബേ മേഖലയിലാണ് സിസ്കോ പദ്ധതി സ്ഥിതി ചെയ്യുന്നത്. നിലവിൽ ലോകത്തിലെ തന്നെ ഏറ്റവും വലിയ ലിഥിയം സ്രോതസ്സുകളിലൊന്നായി ഈ പ്രദേശം മാറുമെന്നാണ് കരുതപ്പെടുന്നത്. ഇലക്ട്രിക് വാഹനങ്ങളുടെ ബാറ്ററികൾ നിർമ്മിക്കാൻ ആവശ്യമായ ലിഥിയം അലുമിനിയം സിലിക്കേറ്റ് ധാതുവായ ‘സ്പോഡുമീൻ’ (Spodumene) ആണ് ഇവിടെ നിന്ന് പ്രധാനമായും ഖനനം ചെയ്യുന്നത്.
റോഡ് സൗകര്യങ്ങളും ജലവൈദ്യുത പദ്ധതികളും ഉള്ള പ്രദേശമായതിനാൽ ഇവിടുത്തെ ഉൽപ്പാദന ചെലവ് കുറവായിരിക്കുമെന്നും വിലയിരുത്തപ്പെടുന്നു. സാധാരണ ഖനന പര്യവേഷണങ്ങളിൽ വലിയ തോതിൽ മണ്ണ് നീക്കം ചെയ്യേണ്ടി വരാറുണ്ട്. എന്നാൽ എഐ സാങ്കേതികവിദ്യ ഉപയോഗിച്ച് കൃത്യമായ സ്ഥലം കണ്ടെത്തുന്നത് വഴി പരിസ്ഥിതി ആഘാതം കുറയ്ക്കാൻ സാധിക്കും. ഖനനത്തിനായി കുറഞ്ഞ സ്ഥലം മാത്രം ഉപയോഗിച്ചാൽ മതിയെന്നത് തദ്ദേശീയരായ ക്രീ (Cree) വിഭാഗം ജനങ്ങളുടെ ആശങ്കകൾ പരിഹരിക്കാനും സഹായിക്കും.
പരിസ്ഥിതി ആഘാത പഠനത്തിന് ശേഷം മാത്രമേ ഇവിടെ പൂർണ്ണതോതിലുള്ള ഖനനം ആരംഭിക്കുകയുള്ളൂ. 2030-ഓടെ ആഗോളതലത്തിൽ ലിഥിയത്തിന്റെ ആവശ്യം കുത്തനെ വർദ്ധിക്കുമെന്നാണ് അന്താരാഷ്ട്ര ഊർജ്ജ ഏജൻസിയുടെ (IEA) കണക്കുകൾ സൂചിപ്പിക്കുന്നത്. ഒരു ഖനി കണ്ടെത്തി ഉൽപ്പാദനം തുടങ്ങാൻ സാധാരണഗതിയിൽ പത്ത് വർഷത്തോളം സമയമെടുക്കാറുണ്ട്.
എന്നാൽ പുതിയ സാങ്കേതികവിദ്യ പര്യവേഷണ ഘട്ടത്തിലെ സമയം ഗണ്യമായി കുറയ്ക്കുന്നു. കാനഡയിലെ ഈ കണ്ടെത്തൽ വടക്കേ അമേരിക്കയിലെ ഇലക്ട്രിക് വാഹന നിർമ്മാണ മേഖലയ്ക്ക് വലിയ കരുത്താകും. ഇതൊരു പര്യവേഷണ പ്രോജക്റ്റ് മാത്രമാണെന്നും ഇതിനെ ഔദ്യോഗിക ഖനിജ ശേഖരമായി പ്രഖ്യാപിക്കുന്നതിന് മുൻപ് കൂടുതൽ ശാസ്ത്രീയ പരിശോധനകളും കനേഡിയൻ മാനദണ്ഡങ്ങൾ അനുസരിച്ചുള്ള സ്ഥിരീകരണങ്ങളും ആവശ്യമാണെന്നും വിദഗ്ധർ ചൂണ്ടിക്കാട്ടുന്നു.
an-almost-inexhaustible-reserve-of-lithium-discovered-in-canada
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
